आन्तरिक उडानमा यतीले ‘इन्फ्लाइट इन्टरटेन्मेन्ट सेवा’ सुरु गर्दै- बजार - कान्तिपुर समाचार
कान्तिपुर वेबसाईट
AdvertisementAdvertisement

आन्तरिक उडानमा यतीले ‘इन्फ्लाइट इन्टरटेन्मेन्ट सेवा’ सुरु गर्दै

कान्तिपुर संवाददाता

काठमाडौँ — आन्तरिक उडानमा यात्रुहरुलाई नेपालमै पहिलो पटक यती एयरलाइन्सले इन्फ्लाइट इन्टरटेन्मेन्ट सेवा सुरु गर्ने भएको छ ।  आफ्ना यात्रुहरुलाई उत्कृष्ट यात्रा अनुभव प्रदान गर्नका लागि यो मनोरञ्जन सेवा सुरु गर्न लागिएको एयरलाइन्सका प्रवक्ता सुदर्शन बर्तौलाले बताए ।

'अब हरेक यात्रुले आफ्नै मोबाइलमा भिडियो हेर्दै यात्रा गर्न पाउनु हुनेछ । इन्फ्लाइट मनोरञ्जनका लागि बायुयानभित्र रहेको डिभाइसमा कनेक्ट गरी हरेक उमेर समूहलाई लक्षित विभिन्न मनोरञ्जनात्मक भिडियो, गीतसंगीत, भिडियो गेम, विज्ञापन तथा पुस्तक सामग्रीहरु राखिनेछ ।'

यस सेवा अन्तर्गत, मनोरञ्जनात्मक सामग्री मात्र नभई फ्लाइटबाटै क्याब तथा होटलहरु बुक गर्न मिल्ने, अनलाइन सपिङ्ग गर्न मिल्ने लगायत अन्य सुविधाहरु पनि हुनेछ । यथाशीघ्र इन्फ्लाइट इन्टरटेन्मेन्ट सेवा सुरु गर्ने उद्देश्यले आवश्यक तयारी र परीक्षण भइरहेको र परीक्षणपछि यती एअरलाइन्सको सम्पूर्ण जहाजमा यो सुविधा उपलब्ध हुने कम्पनीले जनाएको छ ।

प्रकाशित : असार २१, २०७९ १३:००
प्रतिक्रिया
पठाउनुहोस्

आँप र अम्बामा बाहिरियो ७२ करोड

कान्तिपुर संवाददाता

काठमाडौँ — चालु आर्थिक वर्षको पहिलो ११ महिनामा ७२ करोडको आँप र अम्बा भित्रिएको छ। भन्सार विभागका अनुसार साउनदेखि जेठसम्म ७१ करोड ७५ लाख ९४ हजार रुपैयाँ बराबरको १ करोड ४८ लाख ५२ हजार ६२९ किलो आँप र अम्बा आयात गरिएको हो । जसबापत विभागले ६ करोड ९६ लाख १८ हजार रुपैयाँ राजश्व उठाएको छ । आँपको मुख्य सिजन असारको तथ्यांक आउन बाँकी रहेकाले यस आर्थिक वर्ष १ अर्ब बढीको आँप आयात हुने अनुमान छ ।

फाइल तस्बिर

नेपालमा सबैभन्दा बढी आँप भारतबाट भित्रिएको विभागको तथ्यांक छ । चालु आर्थिक वर्षको ११ महिनामा भारतबाट मात्रै ७१ करोड ७३ लाख २६ हजार रुपैयाँ बराबरको आँप आयात गरिएको छ । भारतबाट मात्रै १ करोड ४८ लाख ५२ हजार ८९ किलो आँप आयात हुँदा थाइल्याण्डबाट १ लाख २९ हजार रुपैयाँ बराबरको ३०० किलो आँप र अम्बा आयात भएको छ । युगाण्डाबाट समेत १ लाख ३८ हजार रुपैयाँको २४० किलो आँप र अम्बा आयात भएको विभागको तथ्यांक छ ।

आँप र अम्बाको छुट्टाछुट्टै कोड नबनाइएको हुँदा एउटै कोडमा आयात हुने गरेको भन्सार विभागका सूचना अधिकारी पुण्य विक्रम खड्काले बताए । गत वर्ष १ अर्ब १७ करोड ८४ लाख ४४ हजार रुपैयाँ बराबरको २ करोड ४० लाख ९३ हजार २३६ किलो आँप र अम्बा आयात गरिएको विभागको तथ्यांक छ ।

प्रकाशित : असार २१, २०७९ १२:५५
पूरा पढ्नुहोस्
प्रतिक्रिया
पठाउनुहोस्
×