महिन्द्राले ल्यायो अल-न्यु स्कर्पियो-एन- बजार - कान्तिपुर समाचार
कान्तिपुर वेबसाईट
AdvertisementAdvertisement

महिन्द्राले ल्यायो अल-न्यु स्कर्पियो-एन

कान्तिपुर संवाददाता

काठमाडौँ — महिन्द्रा एन्ड महिन्द्रा लिमिटेडले नेपालमा एसयूभी अल–न्यु स्कर्पियो–एन सार्वजनिक गरेको छ । कार्यदक्षता, प्रविधि, क्षमता र नवीन आविष्कारको संयोजन रहेको अल–न्यु स्कर्पियो–एनले महिन्द्राको प्रामाणिक एसयूभी डीएनको विरासत जीवित राख्दै अत्याधुनिक ड्राइभिङ प्याकेज प्रदान गर्ने कम्पनीले जनाएको छ ।

अल–न्यु स्कर्पियो–एनलाई यसको प्रभावशाली उपस्थिति, हेड–टर्निङ डिजाइन, कमान्डिङ ड्राइभिङ पोजिसन र राम्रोसँग सजावट गरिएको भित्री साजसज्जासहित ल्याइएको कम्पनीको भनाइ छ । भारतसँगै दक्षिण अफ्रिका र नेपालमा अल–न्यु स्कर्पियो–एन एकै साथ अनावरण गरिएको एम एन्ड एम लिमिटेड, अटोमोटिभ डिभिजनका अध्यक्ष विजय नाकराले जनाए । अल–न्यु स्कर्पियो–एन यस वर्ष नेपालमा ल्याउने योजना बनाइएका एसयूभीको शृंखलामध्ये पहिलो रहेको उनको भनाइ छ ।

अत्याधुनिक र सुरक्षा एवम् प्रविधिसहितको द स्कर्पियो–एन बाहिरि जस्तै भित्री रूपमा पनि मनमोहक रहेको कम्पनीले बताएको छ । उत्कृष्ट कफी–ब्ल्याक लेथरेट अपहोल्स्ट्री, उत्कृष्ट कमान्ड सिट पोजिसन, बलियो मेटल फिनिस्ड डुअल रेलमा घेरिएको सेन्टर कन्सोल, उन्नत इन्फोटेनमेन्ट प्रणाली र थप विशेषतासाथ यो सवारी ल्याइएको कम्पनीको भनाइ छ ।

द स्कर्पियो–एन १४९.१४ किलोवाट (२०० पीएस) शक्ति र ३८० एनएम टर्क उत्पादन क्षमताको टीजीडीआई एमस्टालियन (पेट्रोल) इन्जिनद्वारा सञ्चालित छ । साथै १२८.६ किलोवाट (१७५ पीएस) शक्ति र ४०० एनएम टर्कको एमहक (डिजेल) इन्जिनयुक्त पनि छ, दुवै म्यानुअल र अटोमेटिक ६ स्पिड ट्रान्समिसन र फोरव्हील ड्राइभ विकल्पसहित छ ।

प्रकाशित : असार १४, २०७९ १६:१२
प्रतिक्रिया
पठाउनुहोस्

न काम पाउँछन् न फर्कन सक्छन्

कान्तिपुर संवाददाता

काठमाडौँ — कैलालीका देवगण महतो साउदी अरब पुगेको पाँच महिनासम्म काम गर्ने स्थान निश्चित छैन । जनवरी २७ मा साउदी पुगेका उनलाई इस्टर्न कन्स्ट्रक्सन मेन्टिनेन्स कम्पनीले रियाददेखि जेद्दासम्म भिन्न–भिन्न ठाउँमा कुदाइसकेको छ । पछिल्लो समय त्यो कुदाइ जेद्दाको विकट गाउँ बुमफिदामा आएर रोकिएको छ ।

‘हामीलाई बिरालोले बच्चा सारेजसरी कम्पनीले सारेको सार्‍यै गर्छ, आज एउटा ठाउँमा पुर्‍याउँछ, भोलि झोला बोकेर कता पुर्‍याउँछ पत्तै हुँदैन,’ महतोले कान्तिपुरसँग फोनमा भने, ‘अहिले एउटा मजरामा ल्याएर राखेको छ ।’

त्यो मजरा जेद्दा जाने हाइवे रोडबाट मरुभूमितर्फ पर्छ । ‘एउटा सानो पुरानो गाउँ छ, चारैतिर रमल (बालुवा) बाहेक केही देखिँदैन, अलि ठूलो सहर पुग्न दुई घण्टा गाडीमा जानुपर्छ,’ उनले भने, ‘यहाँ ल्याएर हामीलाई सडक बढार्न लगायो । सडकको दायाँबायाँ रूख रोप्ने र काट्ने काम लगायो ।’ ५० डिग्रीको तापक्रममा दिनभर सडकमा काम गर्नुपर्दा उनी गलिसकेका छन् । ‘नेपालमा हामीलाई ठूलो सपना देखाए, काम निकै सजिलो छ भन्थे, यहाँ आएपछि बाँच्नै कठिन भयो,’ उनले भने, ‘सडक बढार्नका लागि दुई लाख रुपैयाँ तिरेर साउदी आएको होइन ।’ उनीहरू एक हजार रियाद न्यूनतम तलब पाउने, खानाबापत ३ सय रियाल पाउने गरी साधारण क्लिनरको काम गर्न साउदी आएका थिए । ‘हामीलाई सुपरमार्केट वा अफिसको क्लिनर भनेर पठाइयो, यहाँ आएपछि ८ सय रियाल तलब पाउने गरी अर्को करारपत्र थमाइयो,’ उनले भने, ‘भित्रको काम नभएर सडकमा कुदाइरहेको छ ।’ आगोको रापजस्तो गर्मीमा काम गर्न नसक्ने भएपछि महतोसहित १४ जना पुरानो घरमा बसिरहेका छन् । ५ महिनामा उनीहरूले एक पैसा पनि घर पठाउन सकेका छैनन् । ‘काम छोडेर बसेको एक महिना भयो, भुइँमै सुत्छौं, अहिलेसम्म कम्पनीले तलबबापत भनेर एक पैसा दिएको छैन, सुरु–सुरुमा त खानाबापत भनेर महिनाको दुई सय रियाल दिएको थियो, काम छाडेर बसेपछि खाना पनि बन्द गरेको छ,’ उनले भने, ‘एउटा खबुज (रोटी) को भरमा ज्यान जोगिएको छ । घरमा खानेपानी आउँदैन । शौचालयको पानी पिइराख्नुपरेको छ ।’

ब्लु ग्यालेक्सी ओभरसिजले उनीसहित १ सय ४५ जनालाई साउदी अरब पठाएको थियो । ती सबैलाई कम्पनीले जहाँ काम भेटिन्छ, त्यहीं पठाउने गरेको पीडित कामदारको भनाइ छ । ‘हामी १४ जना भने बुमफिदामा आइपुगेका छौं, हामीसँगै आएका केही साथीहरू नेपाल फर्किसकेको सूचना आएको छ,’ कैलालीका दीपक महतोले भने, ‘घरमा पैसा नपठाएको ५ महिना भयो । हामीले लिएको ऋणको ब्याज बढेर कहाँ पुग्यो होला ? यता हामीले खाना खान पाएको छैन । गाउँमा हाम्रा बुबाआमा र श्रीमतीले के खाएर बाँचिरहेका होलान् ?’

प्रकाशित : असार १४, २०७९ १६:०७
पूरा पढ्नुहोस्
प्रतिक्रिया
पठाउनुहोस्
×