टीभीएस अपाचे आरटीआर १६० फोरभी आरटीएफआई बजारमा- बजार - कान्तिपुर समाचार

टीभीएस अपाचे आरटीआर १६० फोरभी आरटीएफआई बजारमा

कान्तिपुर संवाददाता

काठमाडौँ — जगदम्बा मोटर्सले टीभीएस अपाचे आरटीआर १६० फोरभी आरटीएफआई तथा बीएस भीआईको नयाँ मोडल नेपाली बजारमा ल्याएको छ । नेपालमा असार ९ गते सार्वजनिक भएको सो मोटरसाइकलको बीएस भीआई मोडलमा यस वर्गमै पहिलो र सबैभन्दा उत्कृष्ट ३ राइड मोडहरु रेन, अरबन र स्पोर्टस् छन् । जसलाई चालकले सहजता र परिस्थितिको आधारमा मोटरसाइकल कुदाउँदा परिवर्तन गर्न सक्नेछन्  । यी फिचर्सले चालकको राइडिङ् अनुभवलाई थप सहज र सुरक्षित बनाउने कम्पनीको भनाइ छ ।

यस मोटरसाइकलको अर्को सशक्त पक्ष भनेको रेस ट्यून्ड फ्यूल इन्जेक्सन आरटीएफआई टेक्नोलोजी युक्त बीएस भीआई कम्पलाएन्ट इन्जिन रहेको छ। अटोमोबाइल जगतमा आरटीएफआई टेक्नोलोजीलाई निकै नै उत्कृष्ट मानिन्छ । यसैगरी बीएस भीआई कम्पलाएन्ट इन्जिन सहितको अपाचे आरटीआरलाई नेपाली मोटरसाइकल प्रेमीले धेरै पहिलादेखि नै प्रतिक्षा गरिरहेको पाइन्छ । यस टेक्नोलोजी युक्त इन्जिनले माइलेज वृद्धि गर्नुका साथै वातावरण मैत्री हुन्छ।

त्यति मात्र नभएर यस मोटरसाइकलमा स्मार्ट एक्स कनेक्ट फिचर छ जसको सहायताले मोटरसाइकलमा ब्लुटुथ कनेक्ट प्रणालीमार्फत रेस टेलिमेट्री, टर्न बाई टर्न नेभिगेसन, मल्टिपल स्पट प्लटिङ, लिन एङ्गल मोड, साथै कल र एसएमएस अलर्ट जस्ता आधुनिक सेवा जडान गरिएका हुन्छन् । यसले बाटोमा यात्रा गर्दा अरु सामान्य मोटरसाइकल भन्दा अतिरिक्त फाइदा दिन्छ।

जगदम्बा मोटर्सले नयाँ बाइक काठमाडौंको पर्पल हेज रक बारबाट सार्वजनिक गरेको हो । जगदम्बा मोटर्स नेपालमा टिभिएस टू–ह्वीलर्सको लागि एकमात्र आधिकारिक वितरक हो । नेपालभर १३२ भन्दा बढी डिलरहरुको बलियो वितरण सञ्जालका साथ टीभीएसले बजारमा आफ्नो मजबुत पकड राख्न सक्षम भएको छ । गुणस्तरीय उत्पादनहरु, बिक्री पश्चातको व्यापक सेवा र देशभरमा जगेडा पार्टपुर्जाहरुको उपलब्धता कम्पनीले प्रदान गर्दै आएको छ ।


प्रकाशित : असार १०, २०७९ १२:४५
प्रतिक्रिया
पठाउनुहोस्

एमालेले हस्ताक्षर नगर्दा हेटौंडाको नगरसभा प्रभावित

सुवास विडारी

मकवानपुर — नगरसभामा बहुमत रहेको नेकपा एमालेले उपस्थिति पुस्तिकामा हस्ताक्षर नगर्दा हेटौंडा उपमहानगरपालिकाको नगरसभा प्रभावित बनेको छ ।

बिहान १० बजेका लागि बोलाइएको ११ औं अधिवेशन एमालेबाट निर्वाचित नगरसभा सदस्यहरुले उपस्थितिमा हस्ताक्षर नगर्दा अझै सुरु हुन सकेको छैन । हेटौंडा–४ स्थित रोयल पार्टी प्यालेसमा नगरसभाका लागि सत्तारुढ गठबन्धन र नेकपा एमालेबाट निर्वाचित प्रतिनिधि उपस्थित रहेका छन् । एमालेबाट निर्वाचित जनप्रतिनिधि हलमा प्रवेश नगरी बाहिरै बसिरहेका छन् । उनीहरुले उपस्थिति पुस्तिकामा हस्ताक्षर पनि गरेका छैनन् ।

एमालेले मेयरको अधिकार कटौती गर्नुपर्ने माग राख्दै पहिलो कार्यपालिकाको बैठकबाटै नेकपा (एस)बाट निर्वाचित मेयर मीना लामालाई असहयोग गरिरहेको छ । एमालेले बैठक सञ्चालन कार्यविधि–२०७४ को १५(२) र १५(३) मा रहेको व्यवस्थालाई संशोधन गरिनुपर्ने माग राख्दै आएको छ । एमालेले नगरसभामा बहुमत रहेको दलसँग समन्वय नै नगरी नीति तथा कार्यक्रम र बजेट तयार पारेको भन्दै विरोध समेत गर्दै आएको थियो ।

कुल ९७ नगरसभा सदस्यमध्ये नेकपा एमालेका ५४ जना रहेका छन् । बहुमत नगरसभा सदस्य बाहिर बसे पनि मेयर लामा र उपमेयर राजेश बानियाँ पनि बाहिरै बसिरहेका छन् । नगरसभा सञ्चालन गर्ने विषयमा आवश्यक छलफल समेत अगाडि बढ्न सकेको छैन ।

वाग्मती प्रदेशको एक मात्रै उपमहानगर हेटौंडाले आगामी आर्थिक वर्षका लागि नीति तथा कार्यक्रमहरु कार्यान्वयन गर्न करिब २ अर्ब ७१ करोड ७९ लाख बजेट सार्वजनिक गर्ने तयारी गरेको छ । अनुमान गरिएको खर्च बेहोर्ने आन्तरिक स्रोतबाट ९४ करोड ३६ लाख, राजस्व बाँडफाँटबाट ५८ करोड ९३ लाख, प्रदेश सरकारको विभिन्न अनुदानबाट ९ करोड ५८ लाख, संघीय सरकारको अनुदानबाट १ अर्व ६ करोड ९५ लाख बेहोरिने गरी तयारी गरिएको बुझिएको छ । अन्य आय र संघसंस्था अनुदानबाट १ करोड ९६ लाख बेहोरिने गरी बजेट ल्याउने तयारी भएको आन्तरिक स्रोतले जनाएको छ ।

प्रकाशित : असार १०, २०७९ १२:४०
पूरा पढ्नुहोस्
प्रतिक्रिया
पठाउनुहोस्
×