एनआईसी एसिया बैंकको नायब प्रमुख कार्यकारीमा सन्तोष कुमार राठी नियुक्त- बजार - कान्तिपुर समाचार

एनआईसी एसिया बैंकको नायब प्रमुख कार्यकारीमा सन्तोष कुमार राठी नियुक्त

कान्तिपुर संवाददाता

काठमाडौँ — एनआईसी एसिया बैंकको सञ्चालक समितिको ५४५ औं बैठकले सन्तोष कुमार राठीलाई नायब प्रमुख कार्यकारी अधिकृतमा नियुक्त गरेको छ । बैंकको सहायक प्रमुख कार्यकारी अधिकृतको रुपमा कार्यरत रहेका उनलाई नेपाल राष्ट्र बैंकबाट जारी गरिएको एकीकृत निर्देशन बमोजिम सञ्चालक समितिले साउन १ देखि लागू हुनेगरी नायब प्रमुख कार्यकारी अधिकृतको पदमा नियुक्त गर्ने निर्णय गरेको हो । 

२०६४ मंसिर १९ देखि तत्कालीन बैंक अफ एसिया विराटनगर शाखाको प्रबन्धक जिम्मेवारीबाट बैंकको सेवामा जोडिएका राठी बैंकको विराटनगरस्थित प्रादेशिक कार्यालयको प्रमुख, विभिन्न इकोसिस्टमको प्रमुख र बैंकको सहायक प्रमुख कार्यकारी अधिकृत हुँदै नायब प्रमुख कार्यकारी अधिकृतमा नियुक्त भएका हुन् ।

समग्र बैंक व्यवस्थापन, जोखिम व्यवस्थापन, मानव संशाधन व्यवस्थापन, व्यवसाय विस्तार तथा विविधिकरण लगायत विभिन्न रणनीतिक क्षेत्रमा उनले दक्षता हासिल गरेका छन् । नेपालको बैंकिङ्ग क्षेत्रमा करिब २० वर्षको विभिन्न कार्यअनुभव संगालेका उनले वाणिज्यशास्त्रमा स्नातकोत्तरसम्मको अध्ययन पूरा गरेका छन् ।


प्रकाशित : जेष्ठ ११, २०७९ १८:११
प्रतिक्रिया
पठाउनुहोस्

बन्चरेडाँडाका स्थानीयको माग सम्बोधन गर्छौं : मन्त्री झाँक्री

कान्तिपुर संवाददाता

काठमाडौँ — सहरी विकासमन्त्री रामकुमारी झाँक्रीले बन्चरेडाँडा ल्यान्डफिल्ड साइटबाट प्रभावित स्थानीयको माग सम्बोधन गर्न सरकार प्रतिबद्ध रहेको बताएकी छन् । काठमाडौंको फोहोर आकस्मिकरूपमा बन्चरेडाडाँमा फालिएपछि स्थानीयका मागप्रति सरकार प्रतिबद्ध रहेको उनले स्पष्ट पारेकी हुन् ।

मन्त्रालयमा बुधबार आयोजित सर्वपक्षीय छलफलमा मन्त्री झाँक्रीले बन्चरेडाडाँ ल्यान्डफिल्ड साइटले काठमाडौंको फोहोर व्यवस्थापनमा नयाँ मोड ल्याउने बताइन् । बन्चरेडाँडा ल्यान्डफिल्ड साइट व्यवस्थित गर्न स्थानीयको महत्वपूर्ण भूमिका रहेको बताउँदै उनीहरूका मागप्रति नजरअन्दाज नगरिने उनले बताइन् ।

‘बन्चरेडाँडा ल्यान्डफिल्ड साइट व्यवस्थापन हाम्रो साझा काम हो भनेर अघि बढौं,’ उनले भनिन्, ‘उक्त ल्यान्डफिल्ड साइटले काठमाडौंको फोहोर व्यवस्थापनमा नयाँ मोड ल्याउनेछ ।’

छलफलका क्रममा नुवाकोटबाट निर्वाचित सांसद हितबहादुर तामाङले बन्चरेडाँडा ल्यान्डफिल्ड साइटको फोहोर व्यवस्थापनमा देखिएका समस्या दीर्घकालीन समाधानका उपाय खोजेर अघि बढ्न सुझाव दिए । समस्या बारम्बार दोहोरिन नदिन स्थानीय सरकारलाई समेत जवाफदेही बनाउनुपर्ने उनको भनाइ थियो ।

धादिङबाट निर्वाचित सांसद भूमि त्रिपाठीले आयोजना प्रभावित क्षेत्रको प्राविधिक टोलीको अध्ययनअनुसार सरकारले जग्गा अधिग्रहण गर्नुपर्ने बताए ।

धादिङको धुनीबेंसी नगरपालिकाका प्रमुख बालकृष्ण आचार्यले बन्चरेडाँडा ल्यान्डफिल्ड साइट व्यवस्थापन सबैको साझा दायित्वको विषय भएको बताउँदै यसका व्यवहारिक पक्षमा ध्यान दिन आवश्यक रहेको बताए । यस्तै आयोजना प्रभावित क्षेत्रका स्थानीयले आफूहरूले फोहोरको वैज्ञानिक व्यवस्थापन चाहेको बताए ।

प्रकाशित : जेष्ठ ११, २०७९ १८:०४
पूरा पढ्नुहोस्
प्रतिक्रिया
पठाउनुहोस्
×