नेपाल टेलिकमले मोबाइल डेटा शुल्क घटाउने

‘होली, नयाँ वर्ष लगायत विभिन्न चाडपर्व, दिवस र अवसरका बेला प्रदान गरिने सिजनल अफरहरूलाई पर्मानेन्ट बनाउन हामीले नेपाल दूरसञ्चार प्राधिकरणलाई अनुरोध गरेका छौं,’ शुक्रबार एक कार्यक्रमा पहाडीले भनिन्, ‘रेगुलर डेटामा १५ देखि २० प्रतिशत मूल्य घटाउने उद्देश्य हो ।’

टेलिकमले तयार पारेका प्याकेज नलिई मेन ब्यालेन्सबाट इन्टरनेट चलाउँदा हाल प्रतिएमबीपीएस १ रुपैयाँ शुल्क काटिन्छ । तर, प्याकेज लिएमा स्किमअनुसार प्रतिएमबी ४/५ पैसामै इन्टरनेट चलाउन सकिने पहाडीले बताइन् । ‘प्याकेज नलिई प्रयोग गर्दा वायरलेस इन्टेरनेट महँगो पर्न जान्छ,’ उनले भनिन्, ‘यद्यपी, पछिल्लो दुई वर्षमा हामीले डाटाको मूल्य २५ प्रतिशत घटाएका छौं ।’

उनका अनुसार नेपाल टेलिकमको वायरलेस ब्रोडब्यान्ड सेवाको शुल्क महँगो छैन । तर, फिक्स्ड ब्रोडब्यान्ड भने अन्य टेलिकमको भन्दा महँगो भएको उनको भनाइ छ । ‘हामीले ६.५ अमेरिकी डलरमा ब्याडविथ किनिरहेका छौं,’ उनले भनिन्, ‘यो आफैंमा महँगो हो । हामी खुद्रामा किन्दैनौं, थोकमा लिँदा र सरकारी प्रक्रियाअनुरुप भुक्तानी गर्नुपर्ने भएकाले महँगो परेको हो ।’