नेपालमै पहिलो पटक ‘साइबर सेक्युरिटी एण्ड डिजिटल फरेन्सिक’ विषय पढाई हुने- बजार - कान्तिपुर समाचार
कान्तिपुर वेबसाईट
AdvertisementAdvertisement

नेपालमै पहिलो पटक ‘साइबर सेक्युरिटी एण्ड डिजिटल फरेन्सिक’ विषय पढाई हुने

कान्तिपुर संवाददाता

काठमाडौँ — प्रतिष्ठित ब्रिटिस एक्रिडेसन काउन्सिल (बीएसी)को मान्यता प्राप्त शैक्षिक संस्था द ब्रिटिस कलेजमा नेपालमै पहिलो पटक ‘बीएससी (हन्स) साइबर सेक्युरिटी एण्ड डिजिटल फरेन्सिक विषय’को पढाई हुने भएको छ । कलेजले बिहीबार एक औपचारिक कार्यक्रमको आयोजना गरेर ब्रिटिस इन्जिनियरिङ काउन्सिल तथा ब्रिटिस कम्प्युटर सोसाइटीबाट समेत मान्यता पाएको सो विषयको पढाई युनिभर्सिटी अफ द वेस्ट अफ इंग्ल्याण्ड (युडब्लुई)को सम्बन्धनमा सुरू गर्ने जानकारी दिएको हो । कलेजले सन् २०२२ को जनवरीबाट ‘बीएससी (हन्स) साइबर सेक्युरिटी एण्ड डिजिटल फरेन्सिक’कार्यक्रमको पढाई सुरू गर्दैछ ।

राष्ट्र बैंकका डेपुटी गभर्नर बमबहादुर मिश्रले शैक्षिक कार्यक्रमको औपचारिक सुरूआत गरे । राष्ट्र बैंकले पनि साइबर सेक्युरिटीको क्षेत्रमा दक्ष जनशक्तिको अभाव महसुस गरेको बताउँदै मिश्रले ब्रिटिस कलेजले यस्तो पाठ्यक्रमलाई संचालन गर्न लागेकोमा खुसी व्यक्त गरे । नेपालमा एटीएम ह्याक हुँदा त्यसको अनुसन्धान गर्न सिंगापुरबाट महँगो रकम तिरेर जनशक्ति ल्याउनुपरेको तीतो यथार्थ पोख्दै उनले ब्रिटिस कलेजबाट यस क्षेत्रलाई योगदान पुर्‍याउने जनशक्ति निर्माण हुने विश्वास व्यक्त गरे । उनले साइबर सेक्युरिटी विषय पढ्नको लागि अब विदेश जान नपर्ने अवस्था आएको समेत बताए ।

एनसेलका प्रमुख सूचना अधिकारी विशाल उपाध्यायले पछिल्लो समय सूचना प्रविधिले फड्को मार्दा चुनौति पनि थपिएकोले यस क्षेत्रमा काम गर्ने जनशक्ति देशलाई आवश्यक रहेको औंल्याए । सञ्चार तथा सूचना प्रविधि मन्त्रालयका सह–सचिव अनिलकुमार दत्तले ब्रिटिस कलेजले मात्रै नभई अन्यले पनि यस्तो विषयको पढाई थाल्नुपर्नेमा जोड दिए ।

कार्यक्रमलाई सम्बोधन गर्दै कलेजका संस्थापक तथा सीईओ राजन कँडेलले नेपाल डिजिटल अर्थतन्त्रतर्फ द्रुत गतिमा अघि बढेकोले साइबर सेक्युरिटी तथा डिजिटल फरेन्सिकको क्षेत्रमा जनशक्तिको ठूलो माग रहेको बताए । यसै क्षेत्रसँग सम्बन्धित शैक्षिक कार्यक्रम नेपालमै नौलो भएको भन्दै उनले भने, ‘नेपाल डिजिटल अर्थतन्त्रतर्फ द्रुत गतिमा अघि बढिरहेको छ त्यसैले देशभित्र साइबर सुरक्षा र डिजिटल फरेन्सिकको ठूलो आवश्यकता छ । यस्ता शैक्षिक कार्यक्रमहरु मार्फत हाम्रो सुरक्षा हुनेछ र सुरक्षित डिजिटल नेपाल निर्माण गर्न मद्दत पुग्नेछ ।’ साथै नेपाली युवाहरुले विश्व बजारमा प्रतिस्पर्धाका लागि ज्ञान र सीप पाउने उनले बताए ।

प्रकाशित : मंसिर १७, २०७८ १९:०३
प्रतिक्रिया
पठाउनुहोस्

कांग्रेस लुम्बिनीमा ८ पदाधिकारीका लागि १७ जनाको उम्मेदवारी

प्यानलगत उम्मेदवारी र प्रचारप्रसारले रगिंयो भैरहवाको महेन्द्र सभागृह
घनश्याम गौतम

रूपन्देही — नेपाली कांग्रेसको लुम्बिनी प्रदेश नेतृत्वका लागि केन्द्रीय नेताहरूबीच नै प्रतिस्पर्धा चलेको छ । शुक्रबार दिउँसो भएको मनोनयनमा सभापतिमा २, उपसभापतिमा ४, महामन्त्रीमा ५ र सहमहामन्त्रीमा ६ जनाको उम्मेदवारी परेको छ ।



पदाधिकारीमा ८ जनाको लागि १७ जनाको उम्मेदवारी परेको छ । निर्वाचन अधिकृत डा. बुद्धबहादुर थापाका अनुसार लुम्बिनी प्रदेशमा १ सभापति, २ उपसभापति, २ महामन्त्री र ३ सहमहामन्त्री निर्वाचित हुनेछन् ।

कांग्रेसको संस्थापन पक्ष र संस्थापनइतर (रामचन्द्र पौडेल) समूह दुवैले प्यानलै बनाएर उम्मेदवारी दिएका छन् । सदस्यमा पनि निर्वाचित हुने संख्या भन्दा झण्डै तिनगुणा बढी उम्मेदवारी परेकाले उम्मेदवारको सूची तयार गर्न ढिलाइ भइरहेको निर्वाचन समितिले जनाएको छ ।

प्रदेशमा पदाधिकारीसहित ६९ जनाको प्रदेश समिति निर्वाचित हुनेछ । लुम्बिनी प्रदेशमा निर्वाचित भएर आएका १ हजार ५ सय ८५ र प्रदेशबाट मनोनित ६३ गरी १ हजार ६ सय ४८ प्रतिनिधिले मतदान गर्नेछन् । मतदान शनिबार हुने अधिकृत डा. थापाले बताए ।

प्रदेश सभापति पदमा देउवा समूहबाट सार्वजनिक लेखा समितिका सभापतिसमेत रहेका रुपन्देहीका भरतकुमार शाहलाई अगाडि सारिएको छ भने देउवाइतर समूहबाट पूर्वराज्यमन्त्री रोल्पाका अमरसिंह पुनलाई अगाडि सारिएको छ । देउवा समूहको टिममा उपसभापतिमा दाङका राजु खनाल र कपिलवस्तुका सुधाकर पाण्डे, महामन्त्रीमा बर्दियाका जन्मजय तिमल्सिना र प्युठानका खिमानसिंह रायमाझी तथा सहमहामन्त्रीमा बाँकेका लक्ष्मीनारायण शाह, रूपन्देहीकी शरिता चौधरी र बाँकेकी माया पुन छन् ।

यस्तै संस्थापनइतरको पौडेल समूहबाट उपसभापतिमा गुल्मीका भुवनप्रसाद श्रेष्ठ र रूपन्देहीका अष्टभुजा पाठक, महामन्त्रीमा नवलपरासी पश्चिमका बिक्रम खनाल र कपिलवस्तुका सुरेन्द्रराज आचार्य, सहमहामन्त्रीमा दाङका खगराज पाण्डे, अर्घाखाँचीका विष्णु मुस्कान र प्युठानकी निमा गिरी छन् । देउवा समूहले बिहीबार राति र पौडेल समूहले शुक्रबार बिहान प्यानल घोषणा गरेका थिए ।

आ–आफ्ना समूह विजयी गराउन संस्थापन समूहबाट शाहसहित गृहमन्त्री बालकृष्ण खाँण खटिएका छन् । त्यस्तै पौडेल समूहबाट केन्द्रीय नेता चन्द्र भण्डारी, दिपक गिरी खटिएका छन् ।

समूहको प्यानलगत निर्वाचन हुने भएपछि प्रचारप्रसारका लागि उम्मेदवारले जिल्ला/जिल्लाबाटै कार्यकर्तालाई बोलाएका छन् । प्रतिनिधि, नेता र कार्यकर्तासहित झण्डै ५ हजार कांग्रेस कार्यकर्ता भैरहवाको महेन्द्र सभागृह परिसरमा छन् । प्यानलगत प्रचारप्रसारले महेन्द्र सभागृह परिसर र भैरहवा नेताका ब्यानर, पर्चा र पम्पलेटले रंगिएको छ ।

प्रकाशित : मंसिर १७, २०७८ १८:५८
पूरा पढ्नुहोस्
प्रतिक्रिया
पठाउनुहोस्
×