थलीमा राष्ट्रिय वाणिज्य बैंकको शाखा - बजार - कान्तिपुर समाचार
कान्तिपुर वेबसाईट
AdvertisementAdvertisement

थलीमा राष्ट्रिय वाणिज्य बैंकको शाखा 

कान्तिपुर संवाददाता

काठमाडौँ — राष्ट्रिय वाणिज्य बैंकले काठमाडौंको कागेश्वरी मनोहरा नगरपालिका वडा न.५ स्थित थली शाखा कार्यालय संचालनमा ल्याएको छ । कागेश्वरी मनोहरा नगरपालिकका प्रमुख कृष्णहरि थापाले बिहीबार विधिवत रुपमा उक्त शाखाको उद्घाटन गरे । 

उक्त अवसरमा नगर प्रमुख थापाले कागेश्वरी मनोहरा नगरपालिकामा एक लाख तीन हजार जनसंख्या रहेको र नगर सबै दृष्टिकोणले सम्भावनायुक्त भएको बताए । उनले सरकारी राष्ट्रिय वाणिज्य बैंकलाई सबैको सहयोग रहने बताए । बैंक संचालक समितिका अध्यक्ष डा. बलराम पाठकले सेवाको आधारमा पनि एक नम्बरको बैंक हुने बताए ।

प्रमुख कार्यकारी अधिकृत किरणकुमार श्रेष्ठले बैंकले सबै खाले बैंकिङ्ग सेवा दिदैं आम नागरिकमा वित्तीय पहुाच विस्तार गरिरहेको बताए । बैंकको हाल देशभर २५६ वटा शाखा कार्यालय, २४१ वटा एटीएम र ९८ वटा शाखारहित बैंकिङ सेवा संचालनमा छ ।


प्रकाशित : मंसिर १६, २०७८ १९:४६
प्रतिक्रिया
पठाउनुहोस्

नाडा अध्यक्षमा चौधरी र थापा भिड्दै, प्यानलसहितको उम्मेदवारी घोषणा

कान्तिपुर संवाददाता

काठमाडौँ — अटोमोबाइल्स एसोसिएसन अफ नेपाल (नाडा) को आगामी निर्वाचनका लागि करण चौधरी र ध्रुव थापाले अध्यक्ष पदमा प्यानलसहित उम्मेदवारी घोषणा गरेका छन् । राजधानीमा पत्रकार सम्मेलन गर्दै बुधबार चौधरी र बिहीबार थापाले नाडाको नयाँ नेतृत्वका लागि उम्मेदवारी घोषणा गरेका हुन् ।

यही मंसिर २२ र २३ मा नाडाको निर्वाचन तथा ४५ औं साधारणसभा हुँदै छ । आफ्नो प्यानलमा अटोमाबाइल क्षेत्रमा लामो अनुभव बोकेका व्यवसायीदेखि नयाँ युवा पुस्तासमेत समेटिएको चौधरीले बताए । थापाले पनि आफ्नो प्यानलमा महिलादेखि सानाठूला सबै वर्ग र क्षेत्रका अटो व्यवसायी रहेको दाबी गरे ।

‘अटोक्षेत्रको प्रतिनिधित्व गर्ने चारपांग्रे, दुईपांग्रे, ब्याट्री, लुब्रिकेन्ट, टायर, स्पेयर पार्ट्स, हेभी इक्विपमेन्टलगायत सबै क्षेत्रलाई समेटर टिम बनाएका छौं,’ चौधरीले भने, ‘हाम्रो समूहमा अनुभव र जोसको उत्तम समिश्रण छ । त्यसैले अनुकूलता र प्रतिकूलता दुवैमा अटोमोबाइल क्षेत्रको सन्तुलित विकास गर्दै अघि बढ्न यो टिम सक्षम छ ।’

सानो क्षेत्रबाट व्यवसाय सुरु गरेकाले सबै अटो व्यवसायीको समस्या बुझेको थापाले बताए । ‘नाडामा मेरो संलग्नता २० वर्ष पूरा भइसकेको छ । केन्द्रबाहिर रहेर पनि व्यवसाय गरेकाले व्यवसायीहरुलाई हुने समस्यासँग जानकार छु,’ उनले भने, ‘सधैं राजधानी केन्द्रित नाडाको नेतृत्वले मोफसल र साना व्यवसायीको आवाज सुन्न सकेन । हाम्रो टिम भने त्यसलाई परिवर्तन गर्दै अटो व्यवसायीलाई प्राथमिकतामा राखेर काम गर्न समक्ष छ ।’ यसअघि नाडामा दुई कार्यकाल उपाध्यक्षका रुपमा काम गरिसकेकाले नयाँ नेतृत्वको भूमिका पनि आफूले जिम्मेवारपूर्वक पूरा गर्ने थापाको दाबी छ ।

‘हाम्रो टिमले नाडाको सचिवालय सुधार, नीतिगत सुधार, सवारीसाधनको डाटा हब निर्माण र आन्तरिक बजार प्रवद्र्धनका लागि प्रदेशमा नाडा अटो सो आयोजना गर्न काम गर्नेछ,’ थापाले भने, ‘अटो व्यवसायमैत्री वातावरण सिर्जना गर्न सरकारसँग समन्वयकारी भूमिका खेल्नेछ ।’ विद्युतीय सवारीसाधनलाई प्राथमिकतामा राखी यसलाई प्रभावकारी सञ्चालन गर्न सरकारसँग ‘लबिइङ’ गर्ने उनले जानकारी दिए ।

नाडाको भेहिकल कमिटी सभापति भएर दुई कार्यकाल काम गरेका चौधरी एक कार्यकाल उपाध्यक्ष थिए । आफू नाडामा १६ वर्षदेखि आबद्ध रहेको उनको भनाइ छ । उनको प्यानलमा अनुपकुमार बराल, सुरेन्द्रकुमार उप्रेती, विक्रम सिंघानिया, राजनबाबु श्रेष्ठ, अभिक ज्योति, मिलनबाबु मल्ल, नीलमणि पाठक, पंकज अग्रवाल, राजेन्द्र अग्रवाल, वर्ण न्यौपाने, सुनिल रिजाल, वरदान बस्नेत, निशान ढकाल, प्रकाश कपुरी, देवराज भण्डारी, गोपाल भट्टराई र गंगाराज भट्टराईले सदस्यमा उम्मेदवारी दिएका छन् ।

थापाको प्यानलमा भने यमुना श्रेष्ठ, आकाश गोल्छा, अमर ज्योति, बीएन पाठक, दीपककुमार अग्रवाल, दीपेन्द्रकुमार मिश्र, कपिल शिवाकोटी, नारायणप्रसाद पौडेल, नभराज भुसाल, निराकर श्रेष्ठ, प्रदीपमान प्रधान, प्रकाश सिग्देल, ऋद्धि कार्की, सगुन बीएस कंसाकार, सञ्जयकुमार खेतान र शुभाशिष थपलिया छन् ।

प्रकाशित : मंसिर १६, २०७८ १९:३९
पूरा पढ्नुहोस्
प्रतिक्रिया
पठाउनुहोस्
×