कर्न ब्राण्डका विश्वस्तरीय 'स्मार्ट वाच' नेपाली बजारमा- बजार - कान्तिपुर समाचार
कान्तिपुर वेबसाईट
AdvertisementAdvertisement

कर्न ब्राण्डका विश्वस्तरीय 'स्मार्ट वाच' नेपाली बजारमा

क्यामियोले भित्र्यायो ३ ओटा मोडल
कान्तिपुर संवाददाता

काठमाडौँ — अन्तर्राष्ट्रिय ब्राण्ड कर्नले नेपाली बजारमा 'स्मार्ट वाच'का ३ नयाँ मोडल लन्च गरेको छ । कम्पनीको नेपालका लागि एक मात्र आधिकारिक आयातकर्ता तथा बितरक क्यामियो इन्टरनेसनल प्रालिले एक कार्यक्रमका बीच नेपालमा नयाँ स्मार्ट वाचको घोषणा गरेको हो । कर्नका विश्वस्तरीय स्मार्ट वाचहरु डब्लूबी ०२, डब्लूबी ०३ र डब्लूबी ०५ अब नेपालमा उपलब्ध भएका छन् ।

यी स्मार्ट वाचमा एमोलेड डिस्प्ले, वाटरप्रुफ फिचर, बिग ब्याट्री क्यापासिटी, नर्डिक सीपीयू लगायतका विशेषता रहेको कम्पनीले जनाएको छ । साथै प्रमुख विशेषतामा ३६५ दिनको वारेन्टी उपलव्ध छ ।

कम्पनीका म्यानेजिङ डाइरेक्टर राज गुप्ताले नेपाली बजारमा विश्वस्तरका गुणस्तरीय एसेसरिजहरु उपलब्ध गराउँदै आएकोमा अब 'स्मार्ट वाच' पनि ल्याएको बताए । कम्पनीले नेपाली बजारमा लन्च गरेका तीन ओटा मोडलका स्मार्टवाचहरुको मूल्य डब्लूबी ०२ को ७ हजार ९९९ रूपैयाँ, डब्लूबी ०३ को ८ हजार १९९ र डब्लूबी ०५ को ११ हजार ९९९ रूपैयाँ तोकिएको छ ।

सन् २०१८ मा शुरु भएको कर्न ब्राण्ड विश्वका ३७ वटा भन्दा बढी देशहरुमा बिक्री हुँदै आएको छ ।


प्रकाशित : मंसिर १४, २०७८ १९:०१
प्रतिक्रिया
पठाउनुहोस्

राखेपका नवनियुक्त सदस्य सचिवको पदभार ग्रहण

रासस

काठमाडौँ — राष्ट्रिय खेलकुद परिषद् (राखेप) का नवनियुक्त सदस्य सचिव टंकलाल घिसिङले मंगलबार पद तथा गोपनियताको शपथ लिएका छन् । 

युवा तथा खेलकुदमन्त्री महेश्वरजङ्ग गहतराजले सिंहदरबारस्थित मन्त्रालयमा घिसिङलाई शपथ गराएका हुन् । मन्त्री गहतराजले खेलकुद परिषद्ले राजनीतिभन्दा पनि खेलाडीको हकहितमा रहेर काम गर्नुपर्ने उल्लेख गर्दै खेलाडीको मनोबल उच्च बनाउन आफूले सक्दो प्रयास गर्ने बताए ।

मन्त्रिपरिषद्को सोमबारको बैठकले घिसिङलाई सदस्य सचिव पदमा नियुक्त गरेको थियो । उनी चार वर्षका लागि नियुक्त भएका हुन् । घिसिङ नेपाल रग्बी संघका अध्यक्ष थिए । उनले आजै राखेपमा पनि पदभार ग्रहण गरेका छन् ।

राखेपका नवनियुक्त सदस्य सचिव घिसिङले राष्ट्रिय टोलीको सुधारलाई जोड दिने जनाउँदै अन्तर्राष्ट्रिय प्रतियोगितामा नेपाललाई कसरी सफलता दिलाउन सकिन्छ, त्यस विषयमा विशेष ध्यान दिने बताए । उनले राष्ट्रिय टिम निर्माणका लागि आवश्यक तयारी रोकिएको र त्यसलाई सञ्चालन गर्ने तथा खेलाडीलाई बीमा गर्ने ठोस नीति कार्यक्रम नभएकाले यसलाई अगाडि बढाउने निर्णयसमेत आफूले गर्ने तयारी गरेको सुनाए ।

राष्ट्रिय खेलकुद विकास ऐन २०७७ लागू भएयता छनोटबाट नियुक्त हुने घिसिङ दोस्रो सदस्य सचिव हुन् । यसअघि गत वर्ष असारमा ऐन लागू भएपछि रमेश सिलवाल पहिलो सदस्य सचिवका रुपमा नियुक्त भएका थिए ।

प्रकाशित : मंसिर १४, २०७८ १८:५७
पूरा पढ्नुहोस्
प्रतिक्रिया
पठाउनुहोस्
×