महिन्द्राको ट्रियो इलेक्ट्रिक अटो अब चितवनमा 

अग्नि ग्रुपअन्तर्गतको सहायक कम्पनी तथा महिन्द्रा इलेक्ट्रिक भेहिकल्स (इभी)का आधिकारिक विक्रेता अग्नि इनर्जी प्रालिले भरतपुर–९, हाकिमचोकमा ट्रियो इलेक्ट्रिक अटो सार्वजनिक गरेको हो । महिन्द्रा ट्रियो अटोको ‘सफ्ट टप’ भेरियन्टमा ८ लाख ४० हजार रुपैयाँ मूल्य तय गरिएको छ ।

अटो महिन्द्राको भारतको बेंगलुरुस्थित फ्याक्ट्रीमै निर्माण भइरहेको छ । ट्रियोसँग ग्राहकले पेट्रोल अटोको तुलनामा वार्षिक दुई लाख रुपैयाँ बचत गर्न सक्ने कम्पनीको दावी छ ।

चितवनका लागि बिक्रेता सेन्ट्रल अटो जोन प्रा.लिका प्रबन्ध निर्देशक राजेन्द्र बाटाजुका अनुसार महिन्द्रा ट्रियो किन्नेले उत्कृष्ट इन्जिनियरिङ र विश्वसनीयताबाट लाभ उठाउन सक्छन् । अटोको अगाडि हाइड्रोलिक सक एब्जर्भर र पछाडि लिफ स्प्रिङको प्रयोग गरिएको छ ।

यस सवारी साधनमा राम्रो रोक्ने शक्ति भएको हाइड्रोलिक ब्रेक पनि उपलब्ध छ । पूर्ण रूपमा डिजिटल यान्त्रिक कन्सोलले चार्जको अवस्था (स्टेट अफ चार्ज–एओसी), गाडी चलाउने दायरा, गति, ड्राइभ मोड संलग्नता र अन्य विभिन्न सूचनाहरूको विस्तृत जानकारी प्रदान गर्ने कम्पनीले जनाएको छ । ८ युनिट बिजुलीमा फुल चार्ज हुने र प्रति युनिट १२ का दरले फुल चार्जमा १२० किलोमिटर गुड्ने कम्पनीको दावी छ ।

८ किलोवाटको ऊर्जा शक्ति र ४२ एनएमको टर्क यसले उत्सर्जन गर्नेछ । प्रतिघण्टा ५५ किलोमिटर (केएमपीएच) सम्मको स्पिड लिन सक्ने कम्पनीले जनाएको छ । कम्पनीका अनुसार १५ एम्पियर सकेटमा जोडेर सजिलै ब्याट्री चार्ज गर्न सकिन्छ ।