२५.१२°C काठमाडौं
सिटिजन्सले अधिग्रहण गर्यो सिर्जना फाइनान्स
काठमाडौँ — सिटिजन्स बैंकले विराटनगरमा रहेको सिर्जना फाइनान्स लिमिटेडलाई अधिग्रहण गरेको छ । अधिग्रहण गर्ने अन्तिम सम्झौतापत्रमा मंगलबार दुवै संस्थाबीच हस्ताक्षर भएको छ ।
सम्झौतापत्रमा सिटिजन्स बैंकका तर्फबाट मर्जर समितिका संयोजक प्रबलजंग पाण्डे र सिर्जना फाइनान्सका तर्फबाट मर्जर समितिका संयोजक सुवास आचार्यले हस्ताक्षर गरे ।
चालू आर्थिक वर्षभित्र एकीकृत कारोबार सुरु हुने आचार्यले बताए । दुवै संस्थाले आफ्नो विशेष साधारणसभाबाट अन्तिम सम्झौता पारित गर्नेछन् । उक्त सम्झौतालाई नियामक नेपाल राष्ट्र बैंकले स्वीकृति दिएपछि एकीकृत कारोबार सुरु हुने आचार्यको भनाइ छ ।
गत माघ २८ मा दुई संस्थाले प्राप्तिका लागि प्रारम्भिक सम्झौतापत्रमा हस्ताक्षर गरेका थिए ।
सिर्जना फाइनान्सका लगानीकर्ताले सिटिजन्स बैंकमा एक सय बराबर ९५ कित्ता सेयर पाउनेछन । अधिग्रहणपछि बैंकको चुक्ता पूँजी बढेर १२ अर्ब ५८ करोड रुपैयाँ पुग्ने आचार्यले बताए ।
सिर्जनालाई अधिग्रहण गरेपछि सिटिजन्स बैंकको निक्षेप परिचालन १ खर्ब ३७ अर्ब रुपैयाँ पुग्नेछ । कर्जा प्रवाह पनि १ खर्ब २१ अर्ब रुपैयाा पुग्नेछ । बैंकको कुल शाखा संख्या १८९ हुनेछ ।
प्रकाशित : जेष्ठ ११, २०७८ २०:३०
