नेबिक अध्यक्षमा पाण्डे- बजार - कान्तिपुर समाचार
कान्तिपुर वेबसाईट
AdvertisementAdvertisement

नेबिक अध्यक्षमा पाण्डे

कान्तिपुर संवाददाता

काठमाडौँ — नेपाल एग्री बिजनेस इन्नोभेसन सेन्टर (नेबिक) ले सिद्धान्तराज पाण्डेलाई सञ्चालक समिति अध्यक्षमा नियुक्त गरेको छ ।

पाण्डे बिजनेस अक्सिजनका प्रमुख कार्यकारी अधिकृत पनि हुन् । काठमाडौं विश्वविद्यालयका डिन सुवास केसीले नेबिक अध्यक्षबाट राजीनामा दिएपछि पाण्डे अध्यक्ष भएका हुन् ।

काठमाडौं विश्वविद्यालयबाट सेवानिवृत्त भएसँगै केसीले नेबिकको अध्यक्षबाट राजीनामा दिएका थिए ।

नेबिकको सञ्चालक समितिमा एनएमबी बैंकका प्रमुख कार्यकारी अधिकृत सुनिल केसी, कृषि तथा पशुपन्छी मन्त्रालयका प्रतिनिधि बद्रीप्रसाद दाहाल, महालक्ष्मी श्रेष्ठ र काठमाडौं विश्वविद्यालयका सविनविक्रम जोशी सदस्य छन् ।

नेबिकका प्रमुख कार्यकारी अधिकृत भूषण शाह हुन् । नेबिक नेपालकै पहिलो कृषिमा केन्द्रित व्यवसायका लागि अन्वेषण गर्ने मञ्च हो । कृषिमा आधारित व्यवसाय र नवप्रवर्तनलाई लक्ष्य हासिल गर्न सघाउने उद्देश्यले नेबिकको स्थापना भएको हो ।

प्रकाशित : फाल्गुन १०, २०७७ २१:५७
प्रतिक्रिया
पठाउनुहोस्

परराष्ट्र नीतिको समीक्षा गर्दै सरकार

जगदीश्वर पाण्डे

काठमाडौँ — सरकारले तीन महिनाअघि ल्याइएको नयाँ परराष्ट्र नीतिको समीक्षा गर्न थालेको छ । सम्बन्धित निकायसँग पर्याप्त छलफल नगरी सरकारले हतारमा परराष्ट्र नीति जारी गरेको भन्दै आलोचना भएकाले समीक्षासहित सुझाव संकलन थालिएको हो ।

सरकारले मंसिर २१ मा पहिलो पटक एकीकृत रूपमा तयार ‘नेपालको परराष्ट्र नीति–२०७७’ गत मंसिर २१ मा सार्वजनिक गरेको थियो ।

परराष्ट्र मन्त्रालयकी प्रवक्ता सेवा लम्सालका अनुसार परराष्ट्र नीतिमाथि विभिन्न पक्षले समीक्षा गरिरहेका छन् । ‘संविधानलाई त परिवर्तनीय दस्तावेजका रूपमा लिइन्छ । उचित सुझाव र सल्लाह आए परराष्ट्र नीतिलाई पनि परिमार्जन गरेर कार्यान्वयनमा लान सकिन्छ,’ उनले भनिन् । परराष्ट्र मन्त्रालयले परराष्ट्र मामिला अध्ययन प्रतिष्ठान र अन्य सम्बन्धित निकायलाई पनि नयाँ परराष्ट्र नीतिको समीक्षा गर्दै रायसुझाव दिन आग्रह गरेको छ । प्रतिष्ठानका एक अधिकारीले परराष्ट्र नीतिमाथि अध्ययन र समीक्षा भइरहेको जानकारी दिए ।

परराष्ट्रमन्त्री प्रदीपकुमार ज्ञवालीले सरकारका नीति तथा कार्यक्रम, सुरक्षा नीति, औपचारिक सभा तथा सम्मेलनमा प्रधानमन्त्रीले दिएका मन्तव्यका आधारमा परराष्ट्र नीति सञ्चालित हुँदै आएकामा वर्तमान सरकारले स्पष्ट रूपमा छुट्टै परराष्ट्र नीति ल्याएको बताएका थिए । मन्त्रालयले नेपालको संविधानको दिशानिर्देश, परराष्ट्र नीति तय गर्न विभिन्न समयमा बनेका विज्ञ समूहका सुझाव र सिफारिस, परराष्ट्र नीतिसम्बन्धी गत वर्ष भएको सर्वदलीय र सर्वपक्षीय राष्ट्रिय संवाद, परराष्ट्र नीतिबारे राजनीतिक दलका दस्तावेजमा रहेका विषयको अध्ययनबाट निस्केका निचोड तथा परराष्ट्र मामिलासँग सम्बन्धित अनुसन्धाताले दिएका सुझाव समेटेर परराष्ट्र नीति तयार गरिएको जनाएको छ ।

नीतिमा मूलभूत रूपमा १३ चुनौती उल्लेख गरिएको छ । नेपालको भारतसँग सीमा विवाद र सत्तारूढ नेकपाभित्रै अमेरिकाको मिलेनियम च्यालेन्ज कर्पोरेसन (एमसीसी) को सहयोग लिने विषयमा भइरहेको अन्तरविरोधलाई चुनौतीको रूपमा लिइएको छ । छिमेकीका भूराजनीतिक गतिविधि पनि परराष्ट्र नीतिको जोखिम रहेको दस्तावेजमा उल्लेख छ । मुलुकको व्यवस्था, दिगो शान्ति, राष्ट्रिय हित र परराष्ट्र नीतिका सम्बन्धमा संविधानले स्पष्ट मार्गदर्शन गर्नुलाई नेपालको परराष्ट्र नीतिको अवसरका रूपमा व्याख्या गरिएको छ ।

मन्त्रालयले शनिबार धुलिखेलमा मन्त्रालयका सम्पूर्ण कर्मचारीलाई नयाँ नेपालको परराष्ट्र नीति र यसको कार्यान्वयनको विषयमा छलफल गराएको छ । छलफल मन्त्री ज्ञवाली र परराष्ट्र सचिव भरत पौड्यालको उपस्थितिमा भएको थियो ।

प्रकाशित : फाल्गुन १०, २०७७ २१:०४
पूरा पढ्नुहोस्
प्रतिक्रिया
पठाउनुहोस्
×