जिल्ला समन्वय समिति पाँचथरमा गठबन्धनबाट एकल उम्मेदवारी

जेठ २३ गते हुने निर्वाचनका लागि प्रमुख पदमा कांग्रेसका रामराज आङ्देम्बे, उपप्रमुखमा माओवादी केन्द्रका यामकुमार आङ्बोको उम्मेदवारी दर्ता भएको हो । यस्तै ७ जना सदस्यका लागि पनि गठबन्धन तर्फबाटै एकल उम्मेदवारी परेको हो ।

गठबन्धनबीच भागबन्डा गर्दा कांग्रेसले समन्वय प्रमुख र तीन जना सदस्य, माओवादी केन्द्रले उपप्रमुखसहित तीनजना सदस्य र एकीकृत समाजवादीले एक जना सदस्य लिएका छन् । समन्वय समितिको सदस्य पदमा डिलेन्द्र सेर्मा, टेकराज योङहाङ, हिमओती जबेगु, रिना गुरुङ, मणिकुमार थाम्सुहाङ, अमृत राई बान्तावा र लेन्जो थाम्सुहाङको उम्मेदवारी परेको छ ।

सबै पदमा एक/एक जनाको मात्रै उम्मेदवारी परेकाले उनीहरुविरुद्ध दाबी/विरोध नपरे निर्विरोध निर्वाचित भएको घोषणा गरिने मुख्य निर्वाचन अधिकृत योगेन्द्रप्रसाद साहले जानकारी दिए । उनका अनुसार उम्मेदवारविरुद्ध दाबी/विरोधका लागि जेठ २२ गतेका लागि तोकिएको छ ।