त्रियुगा नगरपालिकाको मतगणना सुरु- स्थानीय तह निर्वाचन २०७९ - कान्तिपुर समाचार

त्रियुगा नगरपालिकाको मतगणना सुरु

डिल्लीराम खतिवडा

उदयपुर — विवादका कारण रोकिएको त्रियुगा नगरपालिकाको मतगणना सुरु भएको छ । त्रियुगा नगरपालिका – १२ जनप्रेमी आधारभूत विद्यालय मतादान केन्द्रको मतदान प्रक्रिया सकिनै लाग्दा वैशाख ३० गते विवाद भएको थियो ।

विवादका करण स्थागित रहेको मतगणना मंगलबार १ बजेबाट सुरु भएको छ । सोमबार निर्वाचन आयोगले मतगणना गर्ने निर्णय गरेसँगै मतगणना सुरु गरिएको प्रमुख निर्वाचन अधिकृत उत्तम सिलवालले वताए ।

६० हजार ४६ मतदाता रहेको त्रियुगा नगरपालिकामा ४१ हजार ८ सय ८८ मत खसेको थियो। वडा नम्वर १ बाट मतगणना कार्य प्रराम्भ गरिएको सहायक निर्वाचन अधिकृत दिलिप मगरले बताए ।

प्रकाशित : जेष्ठ १०, २०७९ १३:५३
प्रतिक्रिया
पठाउनुहोस्

उदयपुरको त्रियुगा नगरपालिकाको मतगणना सुरु हुँदै

डिल्लीराम खतिवडा

उदयपुर — त्रियुगा नगरपालिकाको मतगणना मंगलबार बिहान साढे १० बजेबाट सुरु हुने भएको छ । जनप्रेमी आधारभूत विद्यालय मतदान केन्द्रमा भएको विवादका कारण मतगणना रोकिएको थियो ।

वैशाख ३० गते मतदानको अन्तिम समयमा वर्षाका कारण त्रियुगा नगरपालिका–१२ जनप्रेमी आधारभूत विद्यालय मतदान केन्द्रमा मतदान कार्य प्रभावित भएको थियो । त्यसै क्रममा ढिलाई भएको भन्दै सामान्य विवाद हुँदा नरपालिकाको मतगणना रोकिको हो । निर्वाचन कार्यक्रम चलिरहेकै समयमा मुख्य निर्वाचन अधिकृत दीपक खनालले स्वास्थ्यका कारण भन्दै राजीनामा दिएपछि थप समस्या उत्पन्न भएको हो ।

खनालको राजनीनामासँगै अर्का न्यायाधीश उत्तम सिलवाललाई उदयपुरको मुख्य निर्वाचन अधिकृत नियुक्त गरी निर्वाचनको बाँकी काम अगाडि बढाइएको थियो । तर नेकपा(एकीकृत समाजवादी), माओवादी केन्द्रलगायत अन्य साना दलले पुन: मतदान हुनुपर्ने भन्दै विवाद झिकेपछि मत गणना कार्य सुरु हुन सकेको थिएन ।

अपरान्ह करिब साढे ४ बजेसम्म भएको मतदानमा करिब ५४ प्रतिशत मत खसेको थियो । तर गणना गर्न असहमत जनाएका दलले विवाद झिकेपछि आयोगबाट आयुक्त रामप्रसाद भण्डारीको नेतृत्वमा आएको टोलीले मतदानस्थल सम्मको घटना विवरणको अध्ययन,अनुसन्धान गरी प्रतिवेदन दिएपछि निर्वाचन आयोगले सोमबार तत्काल मतगणना सुरु गर्ने निर्णय गरेकोले अहिले बिहान साढे १० बजेबाट गणना सुरु गरिने मुख्य निर्वाचन अधिकृत उत्तम सिलवालले वताए ।

उदयपुरका ८ स्थानीय तहमध्ये कटारी नगरपालिकाको मतगणना अन्तिम चरणमा पुगेको छ भने वेलका र चौदण्डीगढी नगरपालिकासहित लिम्चुङवुङ, ताप्ली, उदयपुरगढी र रौतामाई गाउँपालिकाका निर्वाचित पदाधिकारीले पदभारसमेत ग्रहण गरिसकेका छन् ।

प्रकाशित : जेष्ठ १०, २०७९ ०९:१५
पूरा पढ्नुहोस्
प्रतिक्रिया
पठाउनुहोस्
×