झापाको गौरीगन्ज गाउँपालिका अध्यक्ष र उपाध्यक्षमा महिला- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

झापाको गौरीगन्ज गाउँपालिका अध्यक्ष र उपाध्यक्षमा महिला

अर्जुन राजवंशी

बिर्तामोड — झापाको गौरीगन्ज गाउँपालिकाको अध्यक्ष र उपाध्यक्ष पदमा महिला उम्मेदवार विजयी भएका छन् । अध्यक्षमा कांग्रेस उम्मेदवार फूलवती राजवंशी तथा उपाध्यक्षमा एमाले उम्मेदवार पुजन न्यौपाने कुँवर निर्वाचित भएका हुन् ।

स्थानीय तह निर्वाचनअन्तर्गत आइतबार राति सार्वजनिक अन्तिम मत परिणाममा अध्यक्षमा निर्वाचित राजवंशीले एमाले उम्मेदवार विजयकुमार अग्रवाललाई २ हजार ३ सय ५९ मतान्तरले पराजित गरेकी हुन् ।

राजवंशीले ५ हजार ६ सय ८९ तथा पराजित अग्रवालले ३ हजार ३ सय ३० मत पाएका थिए । गाउँपालिकाको उपाध्यक्षमा एमालेकी कुँवरले कांग्रेका मखना महतोलाई ९ सय ३० मतान्तरले पराजित गरिन् । न्यौपानेले ४ हजार ७ सय ५५ तथा महतोले ३ हजार ७ सय ९५ मत पाएका थिए ।


प्रकाशित : जेष्ठ ८, २०७९ २१:३६
प्रतिक्रिया
पठाउनुहोस्

ओखलढुंगामा बेपत्ता किशोरी अचेत अवस्थामा भेटिइन् 

शंकास्पद एक जना पक्राउ 
कुम्भराज राई

ओखलढुंगा — मानेभन्ज्याङ गाउँपालिका ५ धिमिलेकी १७ वर्षीया किशोरी खाना खाएर शनिबार साँझ घरमै सुतेकी थिइन् । तर बिहानपख ब्यूँझिदा उनी ओछ्यानमा थिइनन् । घरमा नदेखिएपछि परिवारका सदस्य र गाउँलेले झिसमिसेमै खोजी गरे । किशोरी घरदेखि करिब डेढ किलोमिटरको दूरीमा पर्ने सडकमा अचेत अवस्थामा भेटिइन् ।

उनको टाउकोमा गहिरो चोट थियो । शरीरका कपडा च्यातिएका थिए । उनलाई तत्काल प्रहरीको सहायतामा ओखलढुंगा सामुदायिक अस्पताल मिसनमा लगियो । उनको उपचारपछि सामान्य होस खुलेको प्रहरीले बतायो ।

उनको उपचारमा खटिएका ओखलढुंगा सामुदायिक अस्पतालका चिकित्सकले बलात्कार भएको हुनसक्ने आशंका गरेका छन् । किशोरीलाई थप उपचारका लागि हेलिकप्टरमार्फत त्रिवि शिक्षण अस्पताल काठमाडौं पठाइएको छ । किशोरीको 'फरेन्सिक ल्याब'मा परीक्षण गरी रिपोर्ट उपलब्ध गराउन प्रहरीले शिक्षण अस्पताललाई अनुरोध गरेको छ । रिपोर्टका आधारमा अनुसन्धान गर्ने जिल्ला प्रहरीका डिएसपी सुकदेव खनालले बताए । किशोरीले प्रहरीलाई संकेत दिएको आधारमा एक व्यक्तिलाई प्रहरीले पक्राउ गरेको छ । ती व्यक्तिलाई छिमेकी जिल्लाबाट पक्राउ गरिएको हो । उनीमाथि थप अनुसन्धान भइरहेकोले पूर्ण जानकारी अहिले नै दिन नसकिने प्रहरीको भनाइ छ।

प्रहरीका अनुसार किशोरीको टाउकोमा भुत्ते वस्तुले बेस्सरी हिर्काएको देखिन्छ । पीडितका परिवारले प्रहरीसमक्ष जाहेरी दिइसकेका छन् । जिल्लास्थित महिला अधिकारकर्मीहरुले समेत अपराधी पत्ता लगाई कानुनी कारबाही गर्न माग गरेका छन् ।

प्रकाशित : जेष्ठ ८, २०७९ २१:२४
पूरा पढ्नुहोस्
प्रतिक्रिया
पठाउनुहोस्
×