रौतहटको माधवनारायण नगरपालिकाको मेयरमा कांग्रेसका यादव विजयी- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

रौतहटको माधवनारायण नगरपालिकाको मेयरमा कांग्रेसका यादव विजयी

शिव पुरी

रौतहट — रौतहटको माधवनारायण नगरपालिकामा नेपाली कांग्रेसका बैजनाथप्रसाद यादव ४ हजार २ सय ८८ मत ल्याई नगरप्रमुख पदमा निर्वाचित भएका छन् । निकटतम प्रतिद्वन्द्वी लोसपाका लिलाप्रसाद तेलीले ३ हजार ३ ससय ३२ मत  प्राप्त गरे ।  

निर्वाचन अधिकृतको कार्यालय माधवनारायणका अनुसार यस नगरपालिकामा उपप्रमुख पदमा जसपाकी निर्मलादेवी रमण ११ झिनो मत अन्तरले विजयी भइन् । रमणले ३ हजार १ सय ६९ मत प्राप्त गरिन् । लोसपाकी जमुनादेवीले ३ हजार १ सय ५८ मत पाइन् ।

निर्वाचन कार्यालयका अनुसार ९ वडा रहेको माधवनारायण नगरपालिकामा एमालेले १, ३, ५ र ६ नम्बर वडा जितेको छ । कांग्रेसले ८, समाजवादीले २, माओवादीले ४, जसपाले ७ र लोसपाले ९ नम्बर वडाको अध्यक्षमा जित हात पारेको छ । अधिकांश वडा गुमाएको कांग्रेसले नगरप्रमुख र एउडा वडामा जितेको छ ।

दुई गाउँपालिका र १६ नगरपालिका रहेको रौतहटमा ८ वटा पालिकाको मतपरिणाम सार्वजनिक भइसकेको छ । बाँकी रहेको १० वटामा मतगणना जारी रहेको छ ।

प्रकाशित : जेष्ठ ७, २०७९ १८:५०
प्रतिक्रिया
पठाउनुहोस्

गुजरा नगरपालिकाको मतगणनास्थल बाहिर ढुंगामुढा, प्रहरीद्वारा अश्रुग्यास प्रहार

शिव पुरी

रौतहट — रौतहटको गुजरा नगरपालिकामा मतपरिणामको विषयलाई लिएर विवाद बढेपछि स्थानीयले मतगणनास्थलको गेट तोडफोडको प्रयास गरेका छन् ।

उम्मेदवारका समर्थकहरुले ढुंगामुढा गर्दै भित्र प्रवेश गर्न खोज्दा तनाव सिर्जना भएको छ । स्थिति नियन्त्रणमा लिन सुरक्षाकर्मीले दुई राउन्ड अश्रुग्यास प्रहार गरेको छ । यस नगरपालिकामा कर्मचारीले मतपरिणाम सार्वजनिक गर्दा पटक-पटक त्रुटि गर्दै आएका छन् । पछिल्लो पटक उम्मेदवारका समर्थक भने ढुंगामुढामा उत्रिएका हुन् ।

इलाका प्रहरी कार्यालय चन्द्रनिगाहपुरबाट प्रहरीको थप मद्दत टोलीसमेत त्यस क्षेत्रमा पुगेको छ । अहिले मतदानस्थल बाहिरको अवस्था तनावपूर्ण छ । मतपरिणाम नै गलत सुनाएपछि मतगणना दिउँसोबाट रोकिएको छ । अन्तिम चरणमा पुगेको मतगणना निर्वाचन अधिकृत बद्रीनारायण शर्माका कारणले रोकिएको मतगणनामा खटिएका एक कर्मचारी बताउँछन् ।

'गणना भएको मतसंख्या लेख्ने क्रममा त्रुटि भएको थियो । पछि सच्याइएको छ,' ती कर्मचारीले बताए । परिणाम गलत आउन थालेपछि मतगणनास्थल बाहिर बसेका उम्मेदवारका समर्थकले नाराबाजी गरेका थिए । त्यसपछि ढुंगामुढा गर्दै मतगणनास्थलको मुख्य ढोका फोरेर भित्र प्रवेश गर्न लागेका हुन् ।

प्रमुख जिल्ला अधिकारी कृष्णबहादुर शाहीले मतपरिणाम गलत लेख्ने कर्मचारीलाई हटाइएको बताएका छन् । ‘मैले तथ्यांक राख्ने कर्मचारीलाई हटाएर अर्को राख्न भनिसकेको छु,’ उनले भने, ‘बाहिर केही विवाद र नाराबाजी गरे पनि भित्रको अवस्था शान्त छ । अहिले सेना र थप प्रहरी त्यहाँ पुगेको छ ।’

नगरप्रमुख पदका उम्मेदवार जसपाका शन्तलाल चौधरीको छाता छाप र वडा नम्बर ५ का स्वतन्त्र उम्मेदवार शेख जमालुद्दिनले पाएको मत परिणाम गलत सुनाएपछि विवाद बढेको हो । अहिले कांग्रेस, एमाले र एकीकृत समाजवादीलगायत दलले पुन: मतगणनाको माग अघि सारेका छन् ।

प्रकाशित : जेष्ठ ७, २०७९ १८:४४
पूरा पढ्नुहोस्
प्रतिक्रिया
पठाउनुहोस्
×