पहिलो बादी मेयर : जसले झोला छोइँदा कुटाइ खाएका थिए- स्थानीय तह निर्वाचन २०७९ - कान्तिपुर समाचार

पहिलो बादी मेयर : जसले झोला छोइँदा कुटाइ खाएका थिए

हरि गौतम

रुकुम पश्चिम — कक्षा ४ पढ्दा साथीको झोला छोइएपछि पुष्प बादीले दुई व्यक्तिबाट कुटाइ खाए । एउटा झोलावाला साथी र अर्को शिक्षक । झोलाभित्रको रोटी छोइएको निहुँमा साथीले कुटिन् भने पढाउने शिक्षकबाट पनि उल्टै पुष्पले कुटाइ खाए । आफूलाई कुटेको खबर लिएर शिक्षकहाँ पुग्दा उल्टै रोटी किन छोइदिएको भन्दै शिक्षकबाट कुटिएपछि पुष्पले विभेदबारे थाहा पाउन थाले ।


त्यही कारण केही दिन उनी विद्यालय नै गएनन् । विद्यालय नगएपछि बाबुले यसबारे सोधखोज गरे । विद्यालयमा भएको घटनाबारे बताएपछि बाबुले विभेदको थप अवस्थाबारे बताए । त्यसपछि पुष्प विद्यालय त गए तर कसैको केही छोइन्छ कि भन्दै डराउँदै बसे । बाहिर व्यक्त नगरे पनि भित्रभित्रै चिढिएका पुष्प विस्तारै राजनीतिक संगठनमा संगठित हुन थाले ।

मान्छे-मान्छेबीच विभेद बुझ्दै गएपछि समूह बनाउने, छलफल गर्ने र यसको प्रतिरोध गर्ने काम थालेका पुष्प विस्तारै राजनीतिमा सक्रिय भए । तिनै बादी यसपटक स्थानीय सरकारको प्रमुखमा निर्वाचित भएका छन् । सम्भवत: नगरप्रमुखमा निर्वाचित हुने उनी बादी समुदायका एक मात्र व्यक्ति हुन् । चौरजहारी नगरपालिकामा एमाले–कांग्रेस गठबन्धनका कांग्रेस उम्मेदवार प्रेमबहादुर ओलीलाई ५ सय ७१ मतान्तरले जितेर पुष्प नगर प्रमुखमा चुनिए । सुरुमा विभेदविरुद्ध आवाज उठाउन भन्दै नेपाल उत्पीडित मुक्ति समाजमा आवद्ध भएर विभेदको विरोध थालेका पुष्प माओवादीले थालेको सशस्त्र आन्दोलनमा सहभागी भए ।

माछा मारेर, मादल बनाएर, सुल्पा बनाएर परिवार पाल्ने मान्छे विभेद अन्त्यकै लागि पूर्णकालीन कार्यकर्ता भए । दिनभर माओवादीको कार्यकर्ता बनेर काम गर्ने उनी राति घरमा आएर माछा मारेर परिवारको जोहो गराउँथे ।

‘विद्यालयदेखि नै विभेद देखें र भोगें,’ उनले भने, ‘यसको अन्त्यका लागि परिवार पाल्नुपर्ने भूमिका थियो । तैपनि परिवार छाडेर युद्धमा होमिएँ ।’ युद्धमै हुँदा परिवार पाल्न मुस्किल हुने भएपछि हरेक रात माछा मारेर छाड्ने गरेका उनले बिहान श्रीमतिले त्यही माछा बेचेर गुजारा गर्थिन् । पार्टी भन्दा पनि उनी दलित मोर्चामा नै धेरै क्रियाशील रहे ।

‘मैले धेरै विभेद देखें, भोगेको र महशुस गरेकाले पनि हुन सक्छ, म पार्टीमा कम र दलित मोर्चामा धेरै केन्द्रित भएर लागेको हुँ,’ उनले भने । उनले संगठनभित्र पनि धेरै संघर्ष गर्नुपर्‍यो । संगठन निर्माण गरे । २०५७ सालमा माओवादीको पूर्णकालीन कार्यकर्ता भएका बादी बल्ल पार्टीको वैकल्पिक केन्द्रीय सदस्य छन् । चौरजहारी नगरपालिकाको पार्टी इन्चार्ज रहेका उनलाई पार्टीले सर्वसम्मत नगर प्रमुखको टिकट दिएको थियो । उनी दलित मुक्ति मोर्चाको केन्द्रीय सचिवालय सदस्यसमेत बने ।

कर्णाली प्रदेशको इन्चार्ज, सहइन्चार्ज र संयोजकको भूमिका उनले निर्वाह गरिसकेका छन् । अब आफू अमुक समुदायको मात्रै प्रमुख नभएको उनी बताउँछन् । ‘हिजोसम्म एउटा भूमिकामा थिएँ, अब अर्को भूमिकामा आएपछि म सबैको साझा भएको छु’ उनले भने, ‘मेरो भूमिका निर्वाह पनि त्यसरी नै हुन्छ ।’ समृद्ध चौरजहारी बनाउन आफूले खास योजना बनाएको र त्यसै अनुसार अघि बढ्ने उनले बताए ।

पुष्प अब जनप्रतिनिधिको रुपमा सबैलाई समान व्यवहार गर्ने बताउँछन् । उनले भने, ‘तर मैले भोग्दा जस्तो विभेद अहिले छैन ।’ गरिब, विपन्न, असहायका लागि विशेष कार्यक्रम बनाउने, उनीहरुको सशक्तिकरणका लागि काम गर्ने बादीले बताए । पहिलो स्थानीय सरकारले ५ वर्षसम्म गरेका कामको स्थायित्व, अपूरा काम पूरा गर्ने, स्वास्थ्य, शिक्षा, सामाजिक क्षेत्रमा बढी काम गर्ने गरी योजना बनाएको बादीको भनाइ छ । भौतिक पूर्वाधारमा पहिलो स्थानीय सरकारले गरेका कामलाई निरन्तरता दिँदै आर्थिक उपार्जन, रोजगार र स्वरोजगारमा विशेष जोड दिइने गरी घोषणापत्र बनाइएको छ । त्यसको पूर्ण कार्यान्वयनका लागि आफू सबै समूह, पार्टीको साथ लिएर अघि बढ्ने उनी बताउँछन् ।

प्रकाशित : जेष्ठ ७, २०७९ १४:३५
प्रतिक्रिया
पठाउनुहोस्

काठमाडौं उपत्यकाका १९ तहको परिणाम : १२ पालिकामा कांग्रेस, पाँचमा एमाले

प्रकाश धौलाकोटी

काठमाडौँ — काठमाडौं उपत्यकाका काठमाडौं, ललितपुर र भक्तपुरका २१ मध्ये १९ स्थानीय तहको मतगणना सकिएको छ । काठमाडौं र ललितपुर महानगरपालिबाहेक सबै नगरपालिका र गाउँपालिकाको अन्तिम परिणाम सार्वजनिक भएको छ । भक्तपुरका चार, ललितपुरका पाँच र काठमाडौंका दस स्थानीय तहको अन्तिम परिणाम आउँदा कांग्रेसले १२, नेकपा एमालेले पाँच, राष्ट्रिय प्रजातन्त्र पार्टी र नेपाल मजदुर किसान पार्टीले एक–एक ठाउँमा जितेका छन् ।

गत निर्वाचनमा एमालेले काठमाडौं महानगरपालिकासहित १२ वटा पालिकाको प्रमुख पदमा जितेको थियो । कांग्रेसले ललितपुर महानगरपालिकासहित ७ तथा नेकपा माओवादी केन्द्र र नेपाल मजदुर किसान पार्टीले एक–एक वटा स्थानीय तहमा जितेका थिए ।

यसपटक एमालेको पकड मानिएको स्थानमा कांग्रेसले जितेको छ । उपत्यकाका कतिपय स्थानीय तहमा कांग्रेस र माओवादी केन्द्रको गठबन्धन भएका कारण एमालेको बलियो पकड भएका नगर समेत कांग्रेसले जितेको छ । काठमाडौं र ललितपुरको परिणाम नआउँदै कांग्रेस १२ स्थानीय तहको प्रमुख पदमा विजयी भएको छ ।

कांग्रेसले पहिले जितेका छ स्थानको पकड निरन्तर गर्दै एमालेले जितेका छ स्थानीय तह खोसेको हो । पहिले एमालेले जितेका तारकेश्वर, किर्तिपुर, कागेश्वरी मनोहरा, चाँगुनारायण, मध्यपुरथिमि र महाकांलमा यसपटक कांग्रेसका उम्मेदवार विजयी भएका छन् ।

अघिल्लो पटक काठमाडौं महानगरपालिकासहित १२ स्थानीय तहको प्रमुख जितेको एमाले यसपटक पाँच स्थानमा खुम्चिएको छ । एमालेले पहिले माओवादी केन्द्रले जितेको कोञ्ज्योस्याम गाउँपालिकासहित टोखा, बुढानिलकण्ठ, सुर्यविनायक र महालक्ष्मीमा प्रमुख पदमा जितेको हो ।

नेपाल मजदुर किसान पार्टी (नेमकिपा) र राष्ट्रिय प्रजातन्त्र पार्टी (राप्रपा)ले एक–एक स्थानमा जितेका छन् । नेमकिपाले भक्तपुर नगरपालिकामा निरन्तर जित्दै आएको छ भने राप्रपाले ठूला दल र गठबन्धनलाई समेत चुनौती दिएर शंखरापुर नगरपालिकामा जित हासिल गरेको हो ।

कांग्रेसले गोकणेश्वर, तारेकेश्वर, किर्तिपुर, दक्षिणकाली र गोदावरीमा प्रमुख र उपप्रमुख दुवै पद जितेको छ । एमालेले बुढानिलकण्ठ र सुर्यविनायक नगरपालिकामा दुवै पद जितेको छ ।

एमालेले प्रमुख जितेका टोखा, महालक्ष्मी र कोञ्ज्योस्यायमा कांग्रेसले उपप्रमुख जितेको छ भने कांग्रेसले प्रमुख जितेका नागार्जुन, चन्द्रागिरी, कागेश्वरी मनोहरा र चाँगुनारायणमा एमालेले उपप्रमुख जितेको छ । प्रमुख पदमा शुन्य बनेको नेकपा माओवादी केन्द्रले कांग्रेससँगको गठबन्धनमा मध्यपुरथिमि नगरपालिका र ललितपुरका बागमती र महाकांलमा उपप्रमुख जितेको छ ।

कहाँ कसले जिते ?

कागेश्वरी मनोहरा नगरपालिका

मेयर : उपेन्द्र कार्की, नेपाली कांग्रेस

उपमेयर : शान्ता थापा, नेकपा एमाले

किर्तिपुर नगरपालिका

मेयर : राजकुमार नकर्मी, नेपाली कांग्रेस

उपमेयर : शुभलक्ष्मी शाक्य, नेपाली कांग्रेस

गोकणेश्वर नगरपालिका

मेयर : दिपककुमार रिसाल, नेपाली कांग्रेस

उपमेयर : सान्नानी लामा, नेकपा एमाले

चन्द्रागिरी नगरपालिका

मेयर : घनश्याम गिरी, नेपाली कांग्रेस

उपमेयर : बसन्ती श्रेष्ठ, नेकपा एमाले

टोखा नगरपालिका

मेयर : प्रकाश अधिकारी नेकपा एमाले

उपमेयर : मुरारी तामाङ, नेपाली कांग्रेस

ताकेश्वर नगरपालिका

मेयर : कृष्णहरि महर्जन, नेपाली कांग्रेस

उपमेयर : सृजना बुर्लाकोटी, नेपाली कांग्रेस

दक्षिणकाली नगरपालिका

मेयर : मोहन बस्नेत, नेपाली कांग्रेस

उपमेयर : बसन्ती तामाङ, नेपाली कांग्रेस

नागार्जुन नगरपालिका

मेयर : मोहनबहादुर बस्नेत, नेपाली कांग्रेस

उपमेयर : सुशीला अधिकारी, नेकपा एमाले

बुढानिलकण्ठ नगरपालिका

मेयर : मिठाराम चौधरी, नेकपा एमाले

उपमेयर : अनिता लामा, नेकपा एमाले

शंखुरापुर नगरपालिका

मेयर : रमेश नापित, राष्ट्रिय प्रजातन्त्र पार्टी

उपमेयर : समिता श्रेष्ठ, नेपाली कांग्रेस

चाँगुनारायण नगरपालिका

मेयर : जीवन खत्री, नेपाली कांग्रेस

उपमेयर : रमेश बुढाथोकी, नेपाल एमाले

भक्तपुर नगरपालिका

मेयर : सुनिल प्रजापति, नेमकिपा

उपमेयर : रजनी जोशी, नेमकिपा

मध्यपुरथिमि नगरपालिका

मेयर : सुरेन्द्र श्रेष्ठ, नेपाली कांग्रेस

उपमेयर : विजयकृष्ण श्रेष्ठ, माओवादी केन्द्र

सूर्यविनायक नगरपालिका

मेयर : बासुदेव थापा, नेकपा एमाले

उपमेयर : सरिता भट्टराई (तिमल्सिना), नेकपा एमाले

कोन्ज्योसोम गाउँपालिका

अध्यक्ष :कृष्णमान लामा, नेकपा एमाले

उपाध्यक्ष : राजनप्रसाद घिमिरे, नेपाली कांग्रेस

गोदावरी नगरपालिका

मेयर : गजेन्द्र महर्जन, नेपाली कांग्रेस

उपमेयर : मुना अधिकारी, नेपाली कांग्रेस

महाकांल गाउँपालिका

अध्यक्ष : गणेश केसी, नेपाली कांग्रेस

उपाध्यक्ष : डोल्मामाया गोले, माओवादी केन्द्र

महालक्ष्मी नगरपालिका

अध्यक्ष : हरिगोविन्द श्रेष्ठ, नेकपा एमाले

उपाध्यक्ष : लक्ष्मी महर्जन नेपाली कांग्रेस

बागमती गाउँपालिका

अध्यक्ष : बीरबहादुर लोप्चन, नेपाली कांग्रेस

उपाध्यक्ष : भक्तबहादुर दर्लामी, माओवादी केन्द्र

प्रकाशित : जेष्ठ ७, २०७९ १३:५४
पूरा पढ्नुहोस्
प्रतिक्रिया
पठाउनुहोस्
×