विवादपछि मुसीकोटको मतगणना रोकियो- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

विवादपछि मुसीकोटको मतगणना रोकियो

हरि गौतम

रुकुम पश्चिम — मुसीकोट नगरपालिकामा मतपेटिकाबाट मतपत्र निकालेर मिलाउने क्रममा मत संकेत देखिएपछि विवाद उत्पन्न हुँदा मतगणना रोकिएको छ । १३ वटा वडाको मतगणना सकेर अन्तिम वडा १४ नम्बर वडामा मतगणना भएर रोकिएको हो ।


मत संकेत गरिएका मतपत्र गणना गर्ने कि बदर गर्ने भन्ने विषयमा विवाद देखिएको छ । यस विषयमा निर्वाचन कर्मचारी र दलका प्रतिनिधिहरीबीच छलफल भइरहेको छ । मुख्य निर्वाचन अधिकृत विद्याराज पौडेलले यस विषयमा उम्मेदवार, राजनीतिक दलसँग छलफल भइरहेको जानकारी दिए ।

मत संकेत गरिएको मतपत्र कति छन् र कुन चुनाव चिन्हमा हो भन्ने खुलाइएको छैन । केही मतपत्रमा कागजका टुक्रा राखिएको पाइएको बताइएको छ । यही वडाबाट नै जित र हारको फैसला हुने छ ।

नगरपालिकाका १४ वडामध्ये १३ वटा वडाको मतगणना सकिँदासम्म प्रमुखमा नेकपा माओवादी केन्द्रका वसन्तकुमार शर्मा र उपप्रमुखमा नेकपामा एकीकृत समाजवादीका विमलकुमार पुनले अग्रता लिएका छन् ।

वडा नम्बर १ देखि नै प्रमुखमा नेपाली कांग्रेसका महेन्द्र केसी र उपप्रमुखमा नेकपा एमालेका थलविर ओलीसँग पछाडि परेका शर्मा र पुनले वडा नम्बर १२ देखि अग्रता लिएका हुन् । १३ नम्बर वडाको मत गणना सकिँदासम्म प्रमुखमा शर्मा केसीभन्दा १ सय ८० र उपप्रमुखमा पुन ओलीभन्दा ३ सय ६४ मतले अगाडि छन् ।

मुसीकोटमा कांग्रेस र एमालेले गठबन्धन गरेका छन् भने माओवादी केन्द्र र एकीकृत समाजवादी पार्टी गरेका छन् । जिल्लाका अरु ५ स्थानीय तहको मतगणना भने सकिसकेको छ ।

प्रकाशित : जेष्ठ ५, २०७९ १४:२०
प्रतिक्रिया
पठाउनुहोस्

डोल्पाको डोल्पोबुद्ध गाउँपालिकामा स्वतन्त्र उम्मेदवार विजयी

हरि गौतम

रुकुम पश्चिम — उपल्लो डोल्पाको डोल्पोबुद्ध गाउँपालिका अध्यक्षमा स्वतन्त्र उम्मेदवार विजयी भएका छन् । माओवादी केन्द्रका उम्मेदवार तेम्बा गुरुङलाई पराजित गर्दै स्वतन्त्र उम्मेदवार कार्मा छोइवेल गुरुङ निर्वाचित भए । कार्माले ५ सय ३५ मत ल्याएका छन् भने तेम्बाको पक्षमा ३ सय २ मत आएको छ ।

तेम्बा निवर्तमान अध्यक्ष पनि हुन् । २०७४ सालको स्थानीय तहको निर्वाचनमा तेम्बा निर्विरोध निर्वाचित भएका थिए । उपाध्यक्षमा नेकपा एकीकृत समाजवादीका पेम्मा धोर्चे गुरुङ निर्वाचित भएका छन् । अर्को उम्मेदवारी नपरेपछि उनी निर्विरोध निर्वाचित भएका हुन् । ६ वडा रहेको डोल्पोबुद्धका ४ वडाका जनप्रतिनिधि निर्विरोध निर्वाचित भए भने २ वडामा मात्रै निर्वाचन भयो । निर्वाचन भएका १ र ३ नम्बर वडामा माओवादी केन्द्रका उम्मेदवार विजयी भएका छन् ।


प्रकाशित : जेष्ठ ५, २०७९ १०:३८
पूरा पढ्नुहोस्
प्रतिक्रिया
पठाउनुहोस्
×