सुर्खेतको भेरीगंगामा गठबन्धनलाई पराजित गर्दै एमाले विजयी, चौकुनेमा गठबन्धन विजयी- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

सुर्खेतको भेरीगंगामा गठबन्धनलाई पराजित गर्दै एमाले विजयी, चौकुनेमा गठबन्धन विजयी

चाँदनी कठायत

वीरेन्द्रनगर — सुर्खेतको भेरीगंगा नगरपालिकामा कांग्रेसको गढ भत्काउँदै नेकपा एमालेका उम्मेदवार विजयी भएका छन् । भेरीगंगाको प्रमुखमा एमालेका यज्ञप्रसाद ढकाल विजयी भएका हुन् । ढकालले १० हजार १२ मत ल्याएर विजयी भएका छन् ।

उनका निकटतम प्रतिद्वन्द्वी नेपाली कांग्रेसका रामप्रसाद सिंहले ९ हजार ७ सय ९७ मत ल्याएर परजित भएका छन् ।

भेरीगंगामा नेकपा माओवादी केन्द्र र नेपाली कांग्रेसबीच चुनावी गठबन्धन भएको थियो । उपप्रमुखमा पनि एमालेका धनसरा बोहोरा विजयी भएकी छन् । बोहोराले ९ हजार ६ सय १४ मत ल्याएर विजयी हुँदा गठबन्धनतर्फ नेकपा माओवादी केन्द्रका नन्दबहादुर कार्की ८ हजार ९ सय १३ मत ल्याएर पराजित भएका छन् । यसअघिको निर्वाचनमा भेरीगंगाको प्रमुख र उपप्रमुख कांग्रेसले जितेको थियो ।

यसैबीच, सुर्खेतको चौकुने गाउँपालिकामा माओवादी केन्द्र र कांग्रेसको गठबन्धन विजयी भएको छ । बुधबार साँझ आएको अन्तिम मतपरिणामअनुसार माओवादी केन्द्रका खडक विक अध्यक्षमा निर्वाचित भएका हुन् । उपाध्यक्षमा कांग्रेसका नरबहादुर बान्तोलाले जित हात पारेका छन् ।

विकले एमाले उम्मेदवार हरी अधिकारीलाई दुई हजार मतान्तरले पराजित गरेका हुन् । विकले ५ हजार ४ सय ७६ मत ल्याउँदा अधिकारीले ३ हजार ४ सय १४ मत ल्याए । उपाध्यक्षमा बान्तोलाले ४ हजार ७ सय ९१ मत ल्याए भने एमालेकी उपाध्यक्ष उम्मेदवार निर्मला राना मगरले ३ हजार ९ मत पाइन् । मगर यसअघिको निर्वाचनमा उनी उपाध्यक्षमा निर्वाचित भएकी थिइन् ।

प्रकाशित : जेष्ठ ५, २०७९ १०:१४
प्रतिक्रिया
पठाउनुहोस्

कर्णालीका ६३ वटा स्थानीय तहको नतिजा सार्वजनिक

चाँदनी कठायत

वीरेन्द्रनगर — स्थानीय तह सदस्य निर्वाचनअन्तर्गत जारी मतगणनाअनुसार बुधबार साँझसम्म कर्णालीका ६३ स्थानीय तहको नतिजा सार्वजनिक भएको छ । प्रदेशका ७९ स्थानीय तहमध्ये कर्णालीका ६३ स्थानीय तहको नतिजा सार्वजनिक भएको निर्वाचन आयोगले जनाएको छ ।

अन्य १६ स्थानीय तहको मतगणना जारी छ । जारी मतगणनाअनुसार हालसम्म नेपाली कांग्रेसले प्रमुख पदमा अग्रता कायम गरेको छ । कांग्रेसले कर्णालीका २५ स्थानीय तहको प्रमुखमा जित हात पारेको छ ।

आयोगका अनुसार कर्णालीका १८ स्थानीय तहमा नेकपा माओवादी केन्द्रले जित हासिल गर्दा नेकपा एमाले १२ स्थानीय तहको नेतृत्व हात पार्न सफल भएको छ । यस्तै, नेकपा एकीकृत (समाजवादीले) ले तीन स्थानमा जित हात पार्दा स्वतन्त्र उम्मेदवारले कर्णालीका चार स्थानीय तहमा जितेका छन् ।

कांग्रेसले सुर्खेतको गुर्भाकोट, पञ्चपुरी र लेकवेशी नगरपालिका तथा बराहताल गाउँपालिका, दैलेखको भैरवी गाउँपालिका, महाबु गाउँपालिका, चामुण्डाविन्द्रासैनी नगरपालिका र ठाँटीकाँध गाउँपालिकामा कांग्रेसले प्रमुख/अध्यक्ष पद हात पारेको छ । यस्तै, कालिकोटको नरहरिनाथ गाउँपालिका र तिलागुफा नगरपालिकामा प्रमुख पद कांग्रेसले जितेको छ ।

जाजरकोटको छेडागाड नगरपालिकामा प्रमुख तथा कुशे गाउँपालिका र शिवालय गाउँपालिकामा कांग्रेसले जितेको छ । जुम्लाको पातारासी गाउँपालिका, हिमा गाउँपालिका र कनकासुन्दरी गाउँपालिकामा जितेको कांग्रेसले रुकुम पश्चिमको बाँफिकोट गाउँपालिकामा जितेको छ । सल्यानको शारदा नगरपालिका, सिद्धकुमाख गाउँपालिका, कुमाख गाउँपालिका र त्रिवेणी गाउँपालिकामा कांग्रेस विजयी भएको छ ।हुम्लाको खार्पुनाथ गाउँपालिकामा विजयी हासिल गरेको कांग्रेसले मुगुको मुगुम कार्मारोङ गाउँपालिका, छायाँनाथ रारा नगरपालिकामा जितेको छ ।

कर्णालीमा नेकपा माओवादी केन्द्रले डोल्पाको जगदुल्ला गाउँपालिका र मुड्केचुला गाउँपालिकामा नेतृत्व हात पारेको छ । दैलेखको नौमुले गाउँपालिका, भगवतीमाई गाउँपालिका जितेको माओवादीले हुम्लाको नाम्खा, ताँजाकोट र सिमकोट गाउँपालिकामा विजयी भएको छ । यस्तै, रुकुम पश्चिमको सानीभेरी गाउँपालिका, चौरजहारी नगरपालिका, आठबीसकोट नगरपालिका र त्रिवेणी गाउँपालिकामा माओवादीले जितेको छ । निर्वाचन आयोगका अनुसार माओवादीले कालिकोटको पलाँता गाउँपालिका, शुभकालिका गाउँपालिका र महावै गाउँपालिकामा विजयी हाँसिल गरेको छ ।

सल्यानको दार्मा गाउँपालिका र बनगाड कुपिन्डे नगरपालिकामा नेतृत्व हासिल गरेको माओवादीले जुम्लाको सिंजा गाउँपालिकामा जितेको छ । यसैगरी नेकपा एमालेले डोल्पाको शे–फोक्सुन्डो गाउँपालिका, त्रिपुरासुन्दरी नगरपालिका, सुर्खेतको भेरीगंगा नगरपालिका, चिंगाड गाउँपालिका, दैलेखको गुराँस गाउँपालिका, डुंगेश्वर गाउँपालिका, नारायण नगरपालिका र आठबीस नगरपालिकामा जितेको छ ।

जाजरकोटको भेरी नगरपालिका, जुनीचाँदे गाउँपालिका र बारेकोट गाउँपालिकामा पनि एमालेले जितेको छ । सल्यानको कालीमाटी, छत्रेश्वरी गाउँपालिकामा पनि जितेको एमालेले जित हात पारेको छ ।

यस्तै, डोल्पाको काइके गाउँपालिकामा र छार्काताङसोङ गाउँपालिका एकीकृत समाजवादीका उम्मदेवार निर्विरोध भइसकेका छन् । सल्यानको कपुरकोट गाउँपालिकामा पनि समाजवादीले जितेको छ ।

कर्णालीका चार स्थानीय तहमा स्वतन्त्र उम्मेदवारले जितेका छन् । कालिकोटको खाँडाचक्र नगरपालिका र सान्नीत्रिवेणी गाउँपालिका, डोल्पाको डोल्पोबुद्ध गाउँपालिका तथा जुम्लाको चन्दननाथ नगरपालिकामा पनि स्वतन्त्र उम्मेदवारले जितेका हुन् ।

प्रकाशित : जेष्ठ ४, २०७९ २१:५१
पूरा पढ्नुहोस्
प्रतिक्रिया
पठाउनुहोस्
×