टिकापुरको मेयरमा नागरिक उन्मुक्ति पार्टीका उम्मेदवार निर्वाचित- स्थानीय तह निर्वाचन २०७९ - कान्तिपुर समाचार

टिकापुरको मेयरमा नागरिक उन्मुक्ति पार्टीका उम्मेदवार निर्वाचित

मोहन बुडाऐर

धनगढी — कैलालीको टिकापुर नगरपालिकाको मेयरमा नागरिक उन्मुक्ति पार्टीका उम्मेदवार रामलाल डगौरा थारु विजयी भएका छन् । उनले आफ्ना  निकटतम प्रतिस्पर्धी कांग्रेसका नवराज रावललाई तीन हजार मत अन्तरले पराजित गरेका हुन् ।

डगौराले ९ हजार ६ सय ४२ मत प्राप्त गरेका छन् । कांग्रेसका उम्मेदवार रावलले ६ हजार ६ सय ४२ मत पाएका थिए । उपमेयरमा भने माओवादी केन्द्रका खडक शाह निर्वाचित भएका छन् ।

उनले नागरिक उन्मुक्ति पार्टीका उल्कादेवी विकलाई १ सय ५३ मतान्तरले पराजित गरेका थिए । माओवादी केन्द्रका शाहले ७ हजार ९ सय ५५ मत प्राप्त गरेका छन् । उनका निकटतम प्रतिस्पर्धी विकले ७ हजार ८ सय २ मत प्राप्त गरिन् ।

सुदूरपश्चिम अखण्ड र थारुवान/थारुहट आन्दोलनबाट सिर्जित टिकापुर हिंसात्मक घटनाका आरोपित रेशम चौधरीकी पत्नी रन्जिता श्रेष्ठ अध्यक्ष रहेको नागरिक उन्मुक्ती पार्टी ३ महिनाअघि निर्वाचन आयोगमा दर्ता भएको थियो । उक्त पार्टीले स्थानीय तहको निर्वाचनका माध्यमबाट टिकापुरसहित वरपरका जानकी, जोशीपुर र भजनी नगरपालिकाको स्थानीय निर्वाचनमा प्रभाव देखाएको छ ।

'टिकापुर हिंसात्मक घटनाको प्रत्यक्ष प्रभावमा परेका थारु बाहुल्य स्थानीय तहमा नागरिक उन्मुक्ति पार्टीप्रति साहनुभूति प्रकट भएको देखिन्छ’ टिकापुरका भरत अधिकारील भने, 'अब स्थानीय नेतृत्व नागरिक उन्मुक्तिलाई जनताले साथ दिनुको अर्थ समाजिक सद्भाव कायम राख्ने जनादेश दिनु पनि हो ।’

प्रकाशित : जेष्ठ ५, २०७९ ०८:५४
प्रतिक्रिया
पठाउनुहोस्

कांग्रेसको पकड क्षेत्रमा, नागरिक उन्मुक्ति पार्टीको जित

मोहन बुडाऐर

धनगढी — कैलालीको जोशीपुर गाउँपालिकाको अध्यक्षमा नागरिक उन्मुक्ति पार्टीका चित्रबहादुर चौधरी विजयी भएका छन् । उनले  ४ हजार ९ सय ३ मत प्राप्त गरी नेपाली कांग्रेसका बन्सराम बडायकलाई १ हजार ५ सय ३५ को मतान्तरमा विजयी भएका छन् ।

अध्यक्षमा पराजित कांग्रेसका बडायक थारुले ३ हजार ३ सय ६८ मत प्राप्त गरेका छन् ।

गाउँपालिकाको उपाध्यक्षमा नागरिक उन्मुक्ती पार्टीकै रेखादेवी कठरिया विजयी भएकी छन् । उनले ४ हजार ५ सय ८९ मत प्राप्त गरेकी छन् । उनक निकटतम प्रतिद्वन्द्वी माओवादी केन्द्रका दीर्घराज बिनाडीले ३ हजा ९ सय ६१ मत प्राप्त गरेका छन् ।

थारु बाहूल्य जनसंख्या भएको क्षेत्रमा कांग्रेसको पकड क्षेत्रको रुपमा चिनिएको जोशीपुरमा नागरिक उन्मुक्ती पार्टीको पहिलो जित हो । यसअघि २०७४ सालको स्थानीय तहको निर्वाचनमा कांग्रेसका उम्मेदवार निर्वाचित भएका थिए । त्यसबेला कांग्रेस जितेका २ स्थानीय तहमध्ये एउटा जोशीपुर थियो । अर्को धनगढी उपमहानगरपालिका रहेको थियो । यसपटक आफ्नो दुवै पकड क्षेत्रलाई कांग्रेसले गुमाउँदै छ । धनगढी उपमहानगरमा स्वतन्त्र उम्मेदवार फराकिलो मतान्तरमा अग्रता लिएका छन् ।

जोशीपुरमा राष्ट्रिय प्रजातन्त्र पार्टीका उम्मेदवार भीमबहादुर बमले ३ हजार १ सय ८९ प्राप्त गरेको छ भने एमालेका उम्मेदवार केशरबहादुर डगौरा १ हजार २ सय ९६ मत प्राप्त गरेका छन् ।

प्रकाशित : जेष्ठ ५, २०७९ ०७:५९
पूरा पढ्नुहोस्
प्रतिक्रिया
पठाउनुहोस्
×