कैलारीमा गठबन्धनबाट कारबाहीमा परेका कांग्रेसका चौधरी विजयी - स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

कैलारीमा गठबन्धनबाट कारबाहीमा परेका कांग्रेसका चौधरी विजयी 

मोहन बुडाऐर

धनगढी — सत्तासाझेदार गठबन्धनको कारबाहीमा परेका नेपाली कांग्रेसका उम्मेदवार राजसमझ चौधरी कैलालीको कैलारी गाउँपालिकाको अध्यक्षमा विजयी भएका छन् । उनले गठबन्धनका आधिकारिक उम्मेदवार निर्वतमान गाउँपालिका अध्यक्ष माओवादीका लाजुराम चौधरीलाई ४ हजार बढीको मतान्तरले पराजित गरेका हुन् ।

राजसमझले १० हजार ४ सय ९२ मत प्राप्त गरे भने लाजुरामले ६ हजार ४ सय ३० मत प्राप्त गरेका छन् । उपाध्यक्षमा कांग्रेसकी भागवतीकुमारी चौधरी विजयी भएकी छन् । उनले १० हजार ४ सय ८४ मत ल्याएर निर्वतमान उपाध्यक्ष माओवादीकी लक्ष्मी सत्गौवा थारुलाई पराजित गरेकी हुन् । सत्गौवाले ६ हजार ४ सय ७७ मत प्राप्त गरिन् ।

कैलारी गाउँपालिका १ देखि ९ वडासम्म कांग्रेसका प्यानल नै जितेको छ ।

उम्मेवारी फिर्ता लिने बेलासम्म गठबन्धन दलमा सहमति नजुट्दा कांग्रेसका तर्फबाट अध्यक्षमा राजसमझ चौधरीको उम्मेदवारी कायम रहेको थियो । उम्मेदवारी फिर्ता लिने समय सीमा सकिएपछि गठबन्धन दलले माओवादीका उम्मेदवार लाजुराम चौधरीलाई आधिकारिक उम्मेदवार घोषणा गरेको थियो । तर, गठबन्धनको उक्त सहमति र निर्णयलाई उल्लंघन गर्दै कांग्रेसका रामसमज चौधरी प्रचारमा हिँडेका थिए । उनलाई स्थानीय कांग्रेसले प्रचारमा साथ दिएका थिए ।

कांगेसका जिल्लास्तर तथा केन्द्रस्तरका नेताहरू भने गठबन्धनको आधिकारिक उम्मेदवार नभएकोले खुलेर साथ दिएका थिएनन् । उपाध्यक्षमा कांग्रेसकी भागवतीकुमारी चौधरीलाई आधिकारिक उम्मेदवार घोषणा गरिएको थियो ।

माओवादीका अध्यक्ष पुष्पकमल दाहालले कैलारीको चुनावी सभालाई सम्बोधन गर्दै कांग्रेसले कैलारी गाउँपालिकामा बेइमानी गरेको बताएका थिए ।

प्रकाशित : जेष्ठ ५, २०७९ ०६:३२
प्रतिक्रिया
पठाउनुहोस्

कैलालीका चार पालिकामा रेशम चौधरीको पार्टीका उम्मेदवारको अग्रता

मोहन बुडाऐर

धनगढी — कैलालीको  पूर्वी भेगका चार वटा स्थानीय तहको प्रमुख/उप प्रमुखमा नागरिक उन्मुक्ति पार्टी जितको नजिक पुगेका छन्। बुधवार दिउँसो १ बजे सम्मको मत गणनामा नागरिक उन्मुक्तिका उम्मेदवारले आफनो मतान्तरलाई धेरै बढाएका छन्। 

अखण्ड सुदूरपश्चिम र थारुवान/थारुहट आन्दोलनबाट सिर्जित टिकापुर हिंसात्मक घटनाका अभियुक्त रेशम चौधरीकी पत्नी रन्जिता श्रेष्ठ अध्यक्ष रहेको नागरिक उन्मुक्ति ३ महिनाअघि मात्रै निर्वाचन आयोगमा दर्ता भएको थियो । उक्त पार्टीले स्थानीय तहको निर्वाचन माध्यम आफ्नो पहिलो जग टीकापुरसहित वरपरकै जानकी , जोशीपुर र भजनी नगरपालिकामा बसाउन खोजेको राजनीतिक बिष्लेषकहरुले प्रारम्भिक मत गणनाको रुझानलाई हेरेर बताउन थालेका छन् ।

‘टीकापुर हिंसात्मक घटनाको प्रत्यक्ष प्रभावमा परेका थारु बाहुल्य स्थानीय तहमा नागरिक उन्मुक्ति पार्टीप्रति साहनुभूति प्रकट भएको देखिन्छ’ टीकापुरका भरत अधिकारीले भने,'अब स्थानीय नेतृत्व नागरिक उन्मुक्तिलाई जनताले दिनुको अर्थ सामाजिक सद्भाव कायम राख्ने जनादेश दिनु पनि हो ।’

बुधबार दिउँसोसम्मको मत गणनाको परिणामअनुसार टीकापुर नगरपालिकाको मेयरमा नागरिक उन्मुक्तीका रामलाल डगौराले अग्रता लिइरहेका छन् । उनलाई कांग्रेसका उम्मेदवार पछ्याइरहेका छन् । हरेक वडाबाट मतान्तर बढ्दै गएको छ।

भजनी नगरपालिकामा उन्मुक्ति पार्टीका केवल चौधरीले फराकिलो मतान्तरले अग्रता लिएका छन्। त्यहाँ माओवादीका शेरबहादुर चौधरीले पछ्याइरहेका छन् । यो २०७४मा माओवादीले जितेको स्थानीय तह हो। माओवादीका चौधरी पुनः दोहोरिन खोजेका हुन्।

२०७४मा कांग्रेसले जितेको जोशीपुर गाउँपालिकामा नागरिक उन्मुक्ति पार्टीले अग्रता लिएको छ। बुधवार रातीसम्म परिणाम आउने सम्भावना रहेको छ । नागरिक उन्मुक्ती पार्टीका चित्रबहादुर चौधरीले अग्रता लिएका छन् । उनलाई राप्रपाले पच्छयाइरहेको छ ।

पहिला फोरमले जितेको जानकी गाउँपालिका पनि उन्मुक्तिका गणेश चौधरी अग्रता लिएका छन्। उनको पछिपछि कांग्रेसका परशुराम महतौ (कठौरिया) छन् ।


प्रकाशित : जेष्ठ ४, २०७९ १६:१४
पूरा पढ्नुहोस्
प्रतिक्रिया
पठाउनुहोस्
×