जो प्रधानपञ्चदेखि मेयरसम्म बने- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

जो प्रधानपञ्चदेखि मेयरसम्म बने

आश गुरुङ

लमजुङ — पहिलो पटक जनप्रतिनिधि हुँदा बेंसीसहरका गुमानसिंह अर्याल ३० वर्षका थिए । पञ्चायतकालमा जनपक्षीय उम्मेदवार बनेका उनी २०४३ सालमा बेंसीसहर गाउँ पञ्चायतको प्रधानपञ्च बने । त्यतिबेलाका चर्चित व्यक्तित्वहरू रणबहादुर अधिकारी, गणेशबहादुर रावल, बमबहादुर अर्याल, केन्द्रबहादुर सिलवाल, कमलबहादुर पौडेललगायत ७ उम्मेदवारलाई हराउँदै उनी प्रधानपञ्च बनेका थिए । उनीसँगै जिल्लाभर ४ जना जनपक्षीय उम्मेदवारले चुनाव जितेका थिए । 

०४९ को स्थानीय निकायको निर्वाचनमा नेकपा एमालेले बालकृष्ण बराललाई गाविस अध्यक्षमा र अर्याललाई वडा नम्बर ८ को अध्यक्षको उम्मेदवार बनायो । नेपाली कांग्रेसका रणबहादुर अधिकारीसँग चुनाव लडेका बालकृष्ण बराल पराजित भए । भीमबहादुर कुँवरलाई पराजित गर्दै अर्याल वडाध्यक्षमा निर्वाचित भए । ०५४ मा भएको स्थानीय निर्वाचनमा एमालेले अर्याललाई फेरि बेंसीसहर गाविसको अध्यक्षमा उठायो । मोहनबहादुर थापालाई उपाध्यक्षको टिकट दियो । कांग्रेस उम्मेदवार बेंसीसहरका तिलकबहादुर पौडेललाई हराउँदै अर्याल गाविस अध्यक्षमा निर्वाचित भए । थापाले पनि जिते ।

०७४ को निर्वाचनमा पनि अर्याल कांग्रेसका भेषबहादुर पौडेललाई हराउँदै नगर प्रमुख बने । त्यतिबेला एमाले–माओवादी केन्द्र चुनावी एकताबाट बेंसीसहर नगर प्रमुखको उम्मेदवार बनेका थिए । यसपटक पनि एमालेका उम्मेदवार अर्याल गठबन्धनका उम्मेदवारलाई हराउँदै नगर प्रमुखमा निर्वाचित भएका छन् । उनले कांग्रेस उम्मेदवार श्रीकान्त घिमिरेलाई २ हजार ८ मतले हराए । कानुन व्यवसायमा ०३७ सालदेखि लागेका अर्याल वरिष्ठ अधिवक्ता हुन् । बार इकाईमा उनी अध्यक्ष पनि भए । एमाले गण्डकी प्रदेश कमिटी सचिवालय सदस्य रहेका अर्यालले जिल्ला कमिटी लमजुङको २ कार्यकाल उपाध्यक्ष र पटकपटक कमिटीमा बसेर काम गरेका छन् ।

०४३ देखि हालसम्म भएका ५ वटा चुनावमा उनले विजय हासिल गरेका छन् । झन्डै ४ दशक जनप्रतिनिधि भएर काम गरेका ६५ वर्षीय अर्यालले नगरपालिकालाई समानुपातिक ढंगले विकसित बनाउने बताए । ‘म अख्तियारको दुरुपयोग गर्दिनँ र गर्न पनि दिन्नँ । आर्थिक अपचलन पनि गर्दिनँ र गर्न पनि दिन्नँ । सबैलाई समेटेर समावेशी सिद्धान्तअनुसार नागरिकको सम्मान गर्दै अघि बढ्छु,’ उनले भने । उनले जनताको निःस्वार्थ सेवाको परिणामले आफू लगातार जनप्रतिनिधि बन्न सफल बनेको दाबी गरे ।

प्रकाशित : जेष्ठ ५, २०७९ १२:३४
प्रतिक्रिया
पठाउनुहोस्

लमजुङको क्व्होलासोंथारमा एमालेको 'क्लिन स्विप'

अध्यक्ष, उपाध्यक्ष र ९ वटै वडाअध्यक्षसहित सदस्यमा एमाले विजयी
आश गुरुङ

लमजुङ — क्व्होलासोंथार गाउँपालिकामा नेकपा एमालेले ‘क्लिन स्वीप’ गरेको छ । अध्यक्ष, उपाध्यक्ष, ९ वटै वडाका अध्यक्ष र सबै सदस्यमा एमाले विजयी भएको हो ।

बुधबार राति सकिएको मतगणना अनुसार नेकपा एमाले उपमहासचिव एवं गण्डकी प्रदेशका संस्थापक मुख्यमन्त्री पृथ्वीसुब्बा गुरुङको गाउँपालिका (क्व्होलासोंथार) अध्यक्षमा एमालेका सूर्यप्रसाद गुरुङ विजयी भएका छन् । प्रतिद्वन्द्वी कांग्रेसका टेकबहादुर गुरुङलाई १ हजार ३ सय ६७ मतले हराउँदै आगामी ५ वर्षका लागि क्व्होलासोंथार गाउँपालिकाको अध्यक्षमा निर्वाचित भएका हुन् । सूर्यप्रसादले ३ हजार ८ सय ५६ मत ल्याएका छन् । प्रतिद्वन्द्वी टेकबहादुर गुरुङले २ हजार ४ सय ८९ मत ल्याएका छन् । अध्यक्षमा मंगोल नेश्नल अर्गनाइजेशनमा भुवरजंग गुरुङले ५१ मत प्राप्त गरेका छन् ।

उपाध्यक्षमा गमीमाया गुरुङ निर्वाचित भएकी छन् । कांग्रेस उम्मेदवार सिर्जना गुरुङलाई १ हजार ६ सय ४९ मतान्तरमा उपाध्यक्ष हासिल गरेकी हुन् । गमीमायाले ३ हजार ९ सय ८९ मत पाएकी छन् । सिर्जनाले २ हजार ३ सय ४० मत पाएको निर्वाचन अधिकृत तुलसीप्रसाद घिमिरेले बताए ।

वडाअध्यक्षतर्फ वडा नं. १ मा पेमा गुरुङ, वडा नं. २ मा खुसीमान गुरुङ, वडा नं. ३ मा आसबीर गुरुङ, वडा नं. ४ मा नारायण गुरुङ, वडा नं. ५ मा गीतबहादुर गुरुङ, वडा नं. ६ मा मनलाल गुरुङ, वडा नं. ७ मा लक्षुमन गुरुङ, वडा नं. ८ मा सन्तोष घले र वडा नं. ९ मा हुमराज गुरुङसहित सबै सदस्य एमालेले जितेको छ ।

२०७४ को स्थानीय चुनावमा क्व्होलासोंथर २ र ८ को अध्यक्ष र केही सदस्य कांग्रेसले जितेको थियो । यसपटक पालिका अध्यक्ष, उपाध्यक्ष, वडाअध्यक्ष र सदस्य गरी ९ वटै वडाका ४७ जना जनप्रतिनिधि नै एमालेका उम्मेदवार निर्वाचित भएको सहायक निर्वाचन अधिकृत त्रिलोकचन्द्र गुरुङले बताए । सबै पदमा एमाले मात्रै निर्वाचित भएको र कांग्रेसलगायत अन्य कुनै पनि पार्टी कुनै पनि पदमा निर्वाचित नभएको निर्वाचन अधिकृतको कार्यालयले जनाएको छ ।

प्रकाशित : जेष्ठ ४, २०७९ २३:३३
पूरा पढ्नुहोस्
प्रतिक्रिया
पठाउनुहोस्
×