लोसपा नेता महतोको गाउँमा कांग्रेसको जित- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

लोसपा नेता महतोको गाउँमा कांग्रेसको जित

ओमप्रकाश ठाकुर

सर्लाही — लोकतान्त्रिक समाजवादी पार्टी (लोसपा)का अध्यक्ष मण्डलका सदस्य राजेन्द्र महतोको गाउँ चन्द्रनगरमा नेपाली कांग्रेसले जित निकालेको छ । महतोका दाजु महेन्द्रलाई पछाडि पार्दै कांग्रेसका उम्मेदवार राजकुमार महतोले विजयी हासिल गरे ।  स्थानीय तह निर्वाचन २०७९ अन्तर्गत चन्द्रनगर गाउँपालिकाका अध्यक्षमा नेपाली कांग्रेसका राजकुमारले ३ हजार ९ सय ९५ मत ल्याएर विजयी भएका हुन् ।



उनका निकटतम प्रतिद्वन्द्वी माओवादी केन्द्रका लोकेन्द्र मुखियाले ३ हजार ५ सय ३६ मत ल्याए । चन्द्रनगरको निवर्तमान प्रमुख रहेका लोसपा नेता महेन्द्रको मत तेस्रो ठूलो हो । प्रदेश सांसद उपेन्द्र महतोको बुवा समेत रहेका महेन्द्रले २ हजार ८ सय ८५ मतमा चित्त बुझाउनु पर्‍यो ।

यस्तै उपप्रमुखमा माओवादी केन्द्रकी गीतादेवी महतोले ३ हजार ८ सय ६० मत ल्याएर विजयी भइन् । उनका निकटतम प्रतिद्वन्द्वी कांग्रेसकी मन्जुदेवीले २ हजार ९ सय ५८ मत ल्याइन् । मधेस मुद्दा लिएर स्थापित भएको लोसपाले सर्लाहीमा आफ्नो पकड गुमाउँदै गएको छ । यस अघिका निर्वाचनमा ६ स्थानमा जीत हात पारेको तत्कालीन राजपा (हालको लोसपा) सर्लाहीमा अब एक स्थानीय तहको गणनामा मात्र अग्रस्थानमा छ । लोसपा सर्लाहीमा अब एक स्थानमा सीमित हुने आँकलन गरिएको छ ।


प्रकाशित : जेष्ठ ४, २०७९ १३:२३
प्रतिक्रिया
पठाउनुहोस्

सर्लाहीको मलंगवा नगरपालिकामा कांग्रेस विजयी

ओमप्रकाश ठाकुर

सर्लाही — सर्लाहीको मलंगवा नगरपालिकाको प्रमुख र उपप्रमुखमा कांग्रेसका उम्मेदवार दोस्रो कार्यकालका लागि निर्वाचित भएका छन् । कांग्रेसले मेयर र उपमेयरको उम्मेदवार फेरे पनि जित निकाल्न सफल भएको हो । 

कांग्रेसबाट मेयर पदका लागि उम्मेदवार बनेका नागेन्द्रप्रसाद यादवले ९ हजार ७८ मत प्राप्त गरी विजयी भए । उनले जसपाका उम्मेदवार निरसल साहलाई ४ हजार ४ सय ३९ मतको फराकिलो अन्तरले पराजित गरेका हुन् । यादवका निकटतम प्रतिद्वन्द्वी साहले ४ हजार ६ सय ३९ मत प्राप्त गरे । यसअघिको निर्वाचनमा कांग्रेसबाट जितेका निवर्तमान मेयर साह कांग्रेसबाट टिकट नपाएपछि जसपाबाट उम्मेदवारी दिएका थिए ।

यस्तै उपमेयरमा पनि कांग्रेसकै शकुन्तलादेवी साह ४ मतले निर्वाचित भएकी छन् । उनले ५ हजार १ सय ४३ मत प्राप्त गरिन् । उनका निकटतम प्रतिद्वन्द्वी जसपाकै पानोदेवीले ५ हजार १ सय ३९ मत ल्याइन् ।

२० स्थानीय तह रहेको सर्लाहीमा १० स्थानीय तहको मत परिणाम सार्वजनिक भइसकेको छ । जसमा कांग्रेसले ८ स्थानीय तहमा र माओवादी केन्द्रले २ स्थानीय तहमा विजयी हात पारेको छ । यस्तै पछिल्लो मत परिणामअनुसार बाँकी १० पालिकामा कांग्रेसले ४ स्थानीय तहमा अग्रस्थानमा छ भने एमाले २, जसपा २, लोसपा १ र माओवादी केन्द्र १ स्थानीय तहमा अग्रस्थानमा रहेको छ ।

प्रकाशित : जेष्ठ ४, २०७९ ११:४७
पूरा पढ्नुहोस्
प्रतिक्रिया
पठाउनुहोस्
×