व्यासको रिस्तीमा बुधबार पुनः मतदान हुँदै- स्थानीय तह निर्वाचन २०७९ - कान्तिपुर समाचार

व्यासको रिस्तीमा बुधबार पुनः मतदान हुँदै

सम्झना रसाइली

तनहुँ — जिल्लाको व्यास नगरपालिका ८ रिस्तीको दुईवटा मतदान केन्द्रमा बुधबार बिहान ७ बजेदेखि मतदान सुरु भएको छ । सुरक्षाकर्मीको कडा सुरक्षा व्यस्थापनका बीच मतदान कार्य चलिरहेको छ ।

निर्वाचन आयोगले स्थानीय निर्वाचनअन्तर्गत वैशाख ३० गतेको मतदान कार्य रद्द गरी बुधबार पुनः मतदान गर्नेगरी निर्णय गरेको थियो । उक्त दिन दिउँसो व्यासका मेयर स्वतन्त्र उम्मेदवार दीपकराज जोशीमाथि आक्रमण भएपछि निर्वाचन आयोगले मतदान रद्द गर्ने निर्णय गरेको थियो ।

गाविस भवन फेदीअन्तर्गत (क) मतदान केन्द्रमा ७ सय ५६ र (ख) मतदान केन्द्रमा ८ सय २० मतदाता रहेका छन् । जिल्ला प्रशासन कार्यालय तनहुँले मतदान केन्द्रमा अनधिकृत व्यक्तिलाई प्रवेश निषेध गरेको छ । बिहान ७ बजेदेखि मतदान कार्य सम्पन्न नभएसम्म अनधिकृत व्यक्तिलाई मतदान क्षेत्रमा प्रवेश गर्न दिइएको छैन ।

प्रमुख जिल्ला अधिकारी विश्वप्रकाश अर्यालका अनुसार उक्त केन्द्रभित्र मतदाता, उम्मेदवार र निजको प्रतिनिधि, निर्वाचनमा खटिएका कर्मचारी, अनुमतिप्राप्त व्यक्ति वा संस्थाका प्रतिनिधि र सुरक्षामा खटिएका कर्मचारी बाहेक अन्य व्यक्तिलाई प्रवेश निषेध गरिएको छ ।

प्रकाशित : जेष्ठ ४, २०७९ १२:११
प्रतिक्रिया
पठाउनुहोस्

ऋषिङ गाउँपालिकाको अध्यक्षमा कांग्रेसका श्रेष्ठ विजयी

सम्झना रसाइली

तनहुँ — जिल्लाको ऋषिङ गाउँपालिकाको अध्यक्ष र उपाध्यक्षमा नेपाली कांग्रेसका उम्मेदवार निर्वाचित भएका छन् । गाउँपालिकाको अध्यक्षतमा राजेन्द्रकृष्ण श्रेष्ठ र उपाध्यक्षमा गिनु थापा निर्वाचित भएका हुन् । यसघिको निर्वाचनमा पनि दुवै जना निर्वाचित भएका थिए ।

अध्यक्षका उम्मेद्वार श्रेष्ठले तीन हजार ३३५ मत प्राप्त गरी विजयी भएका छन् भने उनका प्रतिस्पर्धी नेकपा एमालेका उम्मेदवार हरिराज कँडेलले दुई हजार ७९२ र स्वतन्त्र उम्मेदवार श्रीराम थापाले पुतली चिन्हबाट तीन हजार ३३ मत प्राप्त गरेका थिए ।

यस्तै, उपाध्यक्ष पदमा ४ हजार ४२९ मत प्राप्त गरी पुनः गिनु थापा विजयी भएकी छन् । उनकी प्रतिस्पर्धी नेकपा माओवादी केन्द्रका उम्मेदवार मधुप्रसाद थापाले तीन हजार ४८९ मत प्राप्त गरेका छन् ।

१८ हजार २३८ मतदाता रहेकोमा १० हजार ६७७ मत खसेको आठ वटा वडा मध्ये २, ३, ४, ५ र ६ नम्बर वडा नेपाली कांग्रेस, ७ र ८ नम्बर वडा स्वतन्त्र र १ नम्बर वडा नेकपा माओवादी केन्द्रका उम्मेदवार निर्वाचित भएका छन् ।

प्रकाशित : जेष्ठ ३, २०७९ १८:४०
पूरा पढ्नुहोस्
प्रतिक्रिया
पठाउनुहोस्
×