तीनवटा मत हराएको भन्दै पाँचपोखरी थाङपालमा विवाद- स्थानीय तह निर्वाचन २०७९ - कान्तिपुर समाचार

तीनवटा मत हराएको भन्दै पाँचपोखरी थाङपालमा विवाद

चार वटा मतको अर्धकट्टी नभएपछि पुनः मतगणना गर्न कांग्रेसको माग‍
अनिश तिवारी

सिन्धुपाल्चोक — पाँचपोखरी थाङपाल गाउँपालिका ५ गुन्सामा चारवटा मतपत्र हराएपछि पुनः मतगणना गर्नुपर्ने माग राख्दै कांग्रेससहित अन्य दलका कायकर्ताले मतगणनालाई रोकेका छन् । बिहीबार बेलुकीदेखि बीचैमा अवरुद्ध मतगणना सुरु गर्नका लागि धेरैपटक छलफल गर्दा पनि सहमति नजुट्दा अहिलेसम्म मतगणना नथालिएको हो ।

जिल्ला निर्वाचन कार्यालयका निर्वाचन अधिकृत विकास रिजालका अनुसार अहिले मतपत्र हराएको विवाद मिलाउन आवश्यक छलफल र बहस चलिरहेको छ ।

स्थानीय कांग्रेसका क्षेत्र नं. २ का महाधिवेशन प्रतिनिधि कालिका गोलेले मतगणनाको क्रममा तीन मत हराएको र चारवटा मतपत्रको अर्धकट्टी नै नभएको पाइएको बताए ।

‘अहिले चारवटा मतको फरकमा वडाको चुनावको रोकिएको छ । मतदान अधिकृत र अन्यले जबर्जस्ती परिणाम सुनाउँछौ भनेर पेलिरहेका छन् । तीन मत नै हराएको छ, रिकाउन्ट हुनुपर्छ भन्दा अधिकृत र प्रतिद्वन्द्वीले दलका उम्मेद्वारले मानेका छैनन्,’गोलेले भने । उनका अनुरुप पाँचपोखरी थाङपाल गाउँपालिका ५, गुन्सामा १ हजार २ सय ३ मत खसेकोमा आहिलेसम्म एमालेका उम्मेदवार काले गोले ४ सय ६० र कांग्रेस रवि थिङ ४५६ मत ल्याएका छन् ।

दुवैबीच चार मतको मात्रै अन्तर देखिएको छ । यसअघि एमालेका कार्यकर्ताले पुनः मतगणना हुनुर्ने माग राख्दै मंगलबार गाउँपालिकामा निवेदन लेखेर कांग्रेसले बुथ क्याप्चर गरेको आरोप लगाएको उनले उल्लेख गरे । गुन्साका निर्वाचन अधिकृत कृष्ण सुवेदीले एमालेको पक्ष लिएर ‘बदर मतलाई पनि मैले भनेको सदर हुन्छ’ भनेको गोलेले आरोप लगाए ।

‘उनले त्यसो भनेर पेलेको देखियो, उनमा निष्पक्षता देखिएन । डाम मात्रै देख्ने तर इन्क छाप नदेख्ने मतपत्र कसरी सदर हुन्छ ?,’ उनले प्रश्न गरे । यसअघि पाँचपोखरी थाङपाल गाउँपालिकामा एमाले, राप्रपाजस्ता मुख्य दलले कसैलाई छिर्न नदिई बुथ कब्जा गर्दै मतदान गरेकाले विश्वसनीय नभएको भन्दै स्थानीय र कार्यकर्ता आक्रोशित भएका थिए ।

अहिले गुन्साको विवादबीच झडप हुने अवस्था बनेपछि सुरक्षाकर्मीले सम्हाल्न चारैतिर गस्ती बढाएको जिल्ला प्रहरी नायव उपरीक्षक दक्षकुमार बस्नेतले बताए । ‘मतपत्र हराएको विवाद छ; त्यो अवस्थालाई हेर्न सुरक्षाकर्मी अलर्ट भएर खटिएका छन्,’ उनले भने ।

प्रकाशित : जेष्ठ ४, २०७९ १०:२४
प्रतिक्रिया
पठाउनुहोस्

सिन्धुपाल्चोकको जुगल गाउँपालिकामा माओवादी केन्द्रका स्याङ्बो विजयी 

अनिश तिवारी

सिन्धुपाल्चोक — जुगल गाउँपालिकाको अध्यक्षमा माओवादी केन्द्रका रेशम स्याङ्बो ५ हजार ५७२ मत ल्याएर विजयी भएका छन् । त्यस्तै उपाध्यक्षमा कांग्रेसका हिमाल श्रेष्ठले ४ हजार ७६८ मत ल्याएर विजयी भए ।


सत्ता गठबन्धन कांग्रेस–माओवादी केन्द्र–एकीकृत समाजवादीका साझा उम्मेदवार स्याङ्बो र कांग्रेस नेता श्रेष्ठ भारी मतले निर्वाचित भएका हुन् । अध्यक्षका प्रतिद्वन्द्वी एमालेका उम्मेदवार जयबहादुर लामाले ४ हजार ४१५ र उपाध्यक्ष प्रतिद्वन्द्वी सुनिता थापा तामाङले ३ हजार ७०७ मत ल्याइन् ।

टिकट नपाएको झोंकमा जयबहादुरले कांग्रेस त्यागेर एमालेबाट उम्मेदवार बनेका थिए । लामा एमालेबाट उभिएपछि कांग्रेस–माओवादी–एकीकृत समाजवादीको गठबन्धन सशक्त बनेको थियो । अघिल्लो स्थानीय तह ०७४ निर्वाचनमा एमालेका होमनारायण श्रेष्ठसँग स्याङ्बो पराजित भएका थिए ।


प्रकाशित : जेष्ठ ४, २०७९ ०८:४५
पूरा पढ्नुहोस्
प्रतिक्रिया
पठाउनुहोस्
×