मोरङको कटहरी गाउँपालिका अध्यक्षमा कांग्रेसका चौधरी निर्वाचित- स्थानीय तह निर्वाचन २०७९ - कान्तिपुर समाचार

मोरङको कटहरी गाउँपालिका अध्यक्षमा कांग्रेसका चौधरी निर्वाचित

देवनारायण साह

मोरङ — मोरङको कटहरी गाउँपालिका अध्यक्षमा कांग्रेसका देवराज चौधरी र उपाध्यक्षमा एमालेकी सितादेवी राजवंशी निर्वाचित भएका छन् । गाउँपालिका अध्यक्षमा कांग्रेसले निरन्तरता पाएको हो ।  एमालेका उम्मेदवार शुभाषकुमार सरदारलाई ९ सय ८३ मतान्तरले पछि पार्दै चाैधरी अध्यक्षमा निर्वाचित भएका हुन् ।

कटहरी गाउँपालिकाका निर्वाचन अधिकृत होमनाथ भट्टराईका अनुसार अध्यक्षमा चौधरीले ६ हजार ५ सय ६५ मत र राजवंशीले उपाध्यक्षमा ५ हजार ८ सय ४८ मत ल्याएर निर्वाचित भएका हुन् । गाउँपालिका अध्यक्षमा एमालेका उम्मेदवार सरदारले ५ हजार ६ सय ८२ मत प्राप्त गरेका छन् । उपाध्यक्षमा निवर्तमान उपाध्यक्ष मन्जिताकुमारी सरदार पराजित भएकी हुन् । उनलाई एमालेकी राजवंशीले १ सय ४३ मतान्तरले पराजित गरेकी हुन् । मन्जिताले ५ हजार ७ सय ५ मत प्राप्त गरेको निर्वाचन अधिकृत भट्टराईले बताए।

उक्त गाउँपालिकामा २०७४ को स्थानीय तह निर्वाचनमा कांग्रेसका रामकुमार कामतले अध्यक्षमा ४ हजार ५ सय ६ र उपाध्यक्षमा मन्जिताले ४ हजार ४ सय ९४ मत ल्याएर जितेका थिए । ७ वडा रहेको कटहरीमा कांग्रेसले वडा नम्बर ३ र जनता समाजवादी पार्टीले वडा नम्बर ४ जितेका छन् । एमालेले १, २, ५, ६ र ७ गरी ५ वडा जितेको छ ।

प्रकाशित : जेष्ठ ४, २०७९ ०६:५१
प्रतिक्रिया
पठाउनुहोस्

बलात्कार मुद्दामा 'सिद्धबाबा'लाई सफाइ दिने सुनसरी अदालतको फैसला बदर

देवनारायण साह

मोरङ — सिद्धबाबा भनिने कृष्णबहादुर गिरीविरुद्धको बलात्कार मुद्दामा जिल्ला अदालत सुनसरीले गरेको फैसला उच्च अदालत विराटनगरले बदर गरेको छ । उच्च अदालत विराटनगरका कायममुकायम मुख्यन्यायाधीश सत्यमोहन जोशी थारु र न्यायाधीश किरणकुमारी गुप्ताको संयुक्त इजलासले सुनसरी जिल्ला अदालतको फैसला बदर गरेको हो ।  

उच्च अदालत विराटनगरका सूचना अधिकारी ओम सुवेदीले जिल्ला अदालत सुनसरीको फैसला बदर र सबुद प्रमाण बुझेर इन्साफ गर्न सुरु जिल्ला अदालतमा नै मुद्दा फिर्ता पठाउने फैसला भएको बताए ।

उनले पीडित र पीडक पक्षबीच भएको मोबाइलको भ्वाइस कलको परीक्षण, पीडित महिलाको स्वास्थ्य परीक्षण गर्ने चिकित्सकको बकपत्र र पीडित र पीडक पक्षका साक्षीको बकपत्र गर्नुका साथै अन्य प्रमाण बुझेर पुन: इन्साफ गर्नका लागि मुद्दाको फाइल पठाउने निर्णय गरिएको बताए ।

महिला अनुयायीमाथि जबरजस्ती करणीको मुद्दामा सहमतिमा नै शारीरिक सम्बन्ध भएको ठहर गर्दै गिरीलाई २०७७ मंसिर २२ गते जिल्ला अदालत सुनसरीका तत्कालीन न्यायाधीश अर्जुनप्रसाद कोइरालाको इजलासले सफाइ दिएको थियो ।

गिरीले बलात्कार मुद्दामा जिल्ला अदालत सुनसरीबाट सफाइ पाएको फैसलाविरुद्ध उच्च अदालत विराटनगरमा पुनरावेदन दर्ता गराएका थिएन् । जिल्ला अदालत सुनसरीको फैसलाले सहमतिमै शारीरिक सम्बन्ध भएको स्थापित भएकाले अन्यायमा परेको भन्दै उनले उच्च अदालतमा पुनरावेदन दर्ता गराएका थिए ।

उच्च अदालत विराटनगरका सूचना अधिकारी सुवेदीका अनुसार लोभ, मोह, काम क्रोध त्याग गरेर सन्यासी भएर हिँडेको अवस्थामा सहमतिमै शारीरिक सम्बन्ध भएको फैसलाले आफू अन्यायमा परेको भन्दै गिरीले पुनरावेदन दर्ता गराएका थिए । सरकारी वकिलको कार्यालय सुनसरीले पनि गिरीलाई जिल्ला अदालत सुनसरीले सफाइ दिएकोविरुद्ध उच्च अदालतमा पुनरावेदन दर्ता गराएको मुद्दा फैसला भएको सूचना अधिकारी सुवेदीले बताए ।

२०७७ मंसिर २२ गते जिल्ला अदालत सुनसरीका न्यायाधीश कोइरालाको इजलासले उमेर पुगेका महिला र पुरुषबीचको शारीरिक सम्बन्धलाई जबरजस्ती करणी भन्न नमिल्ने भन्दै गिरीलाई सफाइ दिएको थियो । तर अदालतको फैसलाले महिलासँग शारीरिक सम्बन्ध कायम भएको स्थापित भएकाले अन्यायमा परेको हुँदा पूर्ण रूपमा सफाइको माग गर्दै गिरीले पुनरावेदन गरेका थिए ।

२०७६ कात्तिक ४ गते राति गिरीले करणी गरेको भनी २०७६ मंसिर ११ गते प्रहरीमा जाहेरी दर्ता भएको थियो । अदालतले सफाइ दिएपछि गिरी चतरास्थित आश्रममा बस्दै आएका छन् ।

प्रकाशित : जेष्ठ ३, २०७९ २१:३६
पूरा पढ्नुहोस्
प्रतिक्रिया
पठाउनुहोस्
×