बागलुङको जैमिनीको प्रमुखमा राजमोका थापा र उपप्रमुखमा शर्मा निर्वाचित
बागलुङ — स्थानीय तहको निर्वाचनमा बागलुङको जैमिनी नगर प्रमुखमा राष्ट्रिय जनमोर्चाका नरबहादुर थापा निर्वाचित भएका छन् । उनले नेकपा एमालेका लीलाबहादुर रानालाई फराकिलो मतान्तरमा पराजित गरे । पुनले ८ हजार ७ सय ५५ मत ल्याउँदा रानाले २ हजार ८ सय ७३ मात्रै मत पाए ।
उपप्रमुखमा कांग्रेसका हरिहर शर्मा विजयी भए । शर्माले ९ हजार १ सय ७३ मत ल्याए । एमालेकी उशा पौडेलले २ हजार ६ सय ३६ मात्रै मत पाइन् ।
थापा यसअघिको निर्वाचनमा कांग्रेसबाटै पराजित उमेदवार हुन् । यो पटक गठबन्धनमा उमेदवार बन्दा कांग्रेस र माओवादी समेतको साथ थियो । शर्मा विद्यार्थी राजनीतिबाट आएका हुन् । नेविसंघको जिल्ला अध्यक्ष, केन्द्रीय सहमहामन्त्रीसम्म भएका शर्मा जिल्लाको लोकप्रिय युवा नेतामा गनिन्छन् ।
जैमिनी नगरपालिकाको १० वटा वडामध्ये वडा नं. १, २, ५, ७ र ८ गरी पाँचवटा वडा कांग्रेसले जितेको छ । वडा नं ४ नेकपा (एस), वडा नं ६ माओवादी, वडा नं ९ एमाले र वडा नं ३ र १० गरी दुइटा वडा राजमोले जितेको छ ।
प्रकाशित : जेष्ठ ३, २०७९ २२:५५