बागलुङको जैमिनीको प्रमुखमा राजमोका थापा र उपप्रमुखमा शर्मा निर्वाचित- स्थानीय तह निर्वाचन २०७९ - कान्तिपुर समाचार

बागलुङको जैमिनीको प्रमुखमा राजमोका थापा र उपप्रमुखमा शर्मा निर्वाचित

प्रकाश बराल

बागलुङ — स्थानीय तहको निर्वाचनमा बागलुङको जैमिनी नगर प्रमुखमा राष्ट्रिय जनमोर्चाका नरबहादुर थापा निर्वाचित भएका छन् । उनले नेकपा एमालेका लीलाबहादुर रानालाई फराकिलो मतान्तरमा पराजित गरे । पुनले ८ हजार ७ सय ५५ मत ल्याउँदा रानाले २ हजार ८ सय ७३ मात्रै मत पाए । 

उपप्रमुखमा कांग्रेसका हरिहर शर्मा विजयी भए । शर्माले ९ हजार १ सय ७३ मत ल्याए । एमालेकी उशा पौडेलले २ हजार ६ सय ३६ मात्रै मत पाइन् ।

थापा यसअघिको निर्वाचनमा कांग्रेसबाटै पराजित उमेदवार हुन् । यो पटक गठबन्धनमा उमेदवार बन्दा कांग्रेस र माओवादी समेतको साथ थियो । शर्मा विद्यार्थी राजनीतिबाट आएका हुन् । नेविसंघको जिल्ला अध्यक्ष, केन्द्रीय सहमहामन्त्रीसम्म भएका शर्मा जिल्लाको लोकप्रिय युवा नेतामा गनिन्छन् ।

जैमिनी नगरपालिकाको १० वटा वडामध्ये वडा नं. १, २, ५, ७ र ८ गरी पाँचवटा वडा कांग्रेसले जितेको छ । वडा नं ४ नेकपा (एस), वडा नं ६ माओवादी, वडा नं ९ एमाले र वडा नं ३ र १० गरी दुइटा वडा राजमोले जितेको छ ।

प्रकाशित : जेष्ठ ३, २०७९ २२:५५
प्रतिक्रिया
पठाउनुहोस्

ढोरपाटनको मेयरमा एमालेका नेपाली विजयी

प्रकाश बराल

बागलुङ — बागलुङको ढोरपाटन नगरपालिकाको मेयर पदमा नेकपा एमालेका उम्मेदवार देवकुमार नेपाली विजयी भएका छन् ।


उनले गठबन्धनको तर्फबाट उम्मेदवार बनेका माओवादीका चन्द्र अर्याललाई पराजित गरे । नेपाली ५ हजार ७ सय ३५ मत ल्याएर विजयी बनेका हुन् । निकटतम प्रतिस्पर्धी अर्यालले ५ हजार १ सय ३५मत ल्याएका थिए ।

उपप्रमुखमा कांग्रेसका धनबहादुर कायत विजयी भए । कायतले राजमोकी ताराकुमारी पुनलाई पराजित गरे । कायतले ५ हजार ६ सय ५०मत ल्याएका थिए भने उनका निकटतम प्रतिस्पर्धी पुनले ४ हजार ८ सय ८४ मत प्राप्त गरेकी छन् ।

यहाँ सत्ता गठबन्धन विरुद्ध एमाले र राजमोको विद्रोही समूह चुनावी मैदानमा थिए । नेपालीले यस नगरमा दोश्रो पटक प्रमुख जितेका हुन् । ढोरपाटन दलित समुदायको बाहुल्यता रहेको स्थान हो ।

यहाँका अधिकांश वडा पनि एमालेले जितेको छ । जिल्लाको गलकोट नगर, निसी खोला र तमानखोला गाउँपालिकामा कांग्रेसका उम्मेदवार प्रमुखमा विजयी भएका छन् । ताराखोलामा माओवादी र बरेङमा राजमोका उमेदवार विजयी भइसकेका छन् । काठेखोला गाउँपालिकामा एमालेका उम्मेदवार विजयी भएका छन् । सदरमुकाम रहेको बागलुङ नगरपालिका, जैमिनी नगरपालिका र बडिगाड गाउँपालिकामा भने मत गणना जारी छ ।

प्रकाशित : जेष्ठ ३, २०७९ ०८:३५
पूरा पढ्नुहोस्
प्रतिक्रिया
पठाउनुहोस्
×