बाजुराको बडिमालिका नगरपालिकामा एमाले विजयी- स्थानीय तह निर्वाचन २०७९ - कान्तिपुर समाचार

बाजुराको बडिमालिका नगरपालिकामा एमाले विजयी

अर्जुन शाह

बाजुरा — बाजुराको बडिमालिका नगरपालिकाको मेयरमा एमालेका उम्मेदवार अमरबहादुर खड्का र उपमेयरमा नन्दाकुमारी थापा विजयी भएका छन् । 

एमाले उम्मेदवार खड्काले कांग्रेस उम्मेदवार धनराज पण्डितभन्दा ४६७ मत बढी ल्याएर जितेका छन् । खड्काले ४ हजार १९ मत पाएका छन् भने पण्डितले ३ हजार ५ सय ५२ मत पाए । यस्तै उपमेयरमा एमाले उम्मेदवार थापाले कांग्रेस उम्मेदवार राधिका कुमारी शाही (सिंह) भन्दा ८८२ मत बढी ल्याएर विजयी भएकी हुन् ।

थापाले ४ हजार २३३ मत प्राप्त गरिन् भने शाहीले ३ हजार ३५१ मत पाइन् । उप प्रमुखमा विजयी थापा नेपाल पत्रकार महासंघ बाजुरा शाखाको सचिव र प्रेस चौतारी जिल्ला शाखा अध्यक्षको पदबाट राजीनामा दिएर एमालेबाट उपमेयरमा उम्मेदवार बनेकी थिइन् ।

९ वटा वडा रहेको बाजुरा सदरमुकामस्थित बडिमालिका नगरपालिकामा एमालेले ७ वटा वडामा जित हात पारेको छ भने २ वटा वडामा कांग्रेसले जितेको छ । २, ३, ५, ६, ७,८, ९ नम्बर वडा एमालले जितेको छ भने कांग्रेसले वडा नम्बर १ र ४ जितेको छ ।

प्रकाशित : जेष्ठ ३, २०७९ १६:३३
प्रतिक्रिया
पठाउनुहोस्

बाजुरा सदरमुकाममा उच्च सुरक्षा सतर्कता

अर्जुन शाह

बाजुरा — बाजुराको बडिमालिका नगरपालिकाकाको मतगणना सकिनै लाग्दा सदरमुकाम मार्तडीको सुरक्षा व्यवस्था कडा पारिएको छ । मंगलबार बिहानैदेखि मार्तडीका मुख्य चोक र गौडाहरूमा बाक्लो संख्यामा नेपाल प्रहरी र सशस्त्र प्रहरी परिचालन गरेर उच्च सुरक्षा सतर्कता अपनाइएको जिल्लास्थित सुरक्षा अधिकृतहरूले जनाएका छन् । पालिकाको अन्तिम नतिजापछि हिंसात्मक घटनाहरू हुनसक्ने आकलन गर्दै सुरक्षा व्यवस्था कडा पारिएको हो ।

बाजुरा सदरमुकाम मार्तडीमा मतदानकै दिनदेखि राति-राति दोहोरो झडप र ढुंगामुढा प्रहारका घटनाहरू भइरहेका छन् । पालिकाको अन्तिम मत परिणामपछि हिंसाका थप घटना हुन सक्ने जोखिम रहेको भन्दै सुरक्षा व्यवस्था चुस्त बनाइएको हो ।

यसका साथै अहिलेसम्म मतगणना गर्ने अथवा पुनः निर्वाचनमा जाने भन्ने टुंगो नलागिसकेको बुढीगंगा नगरपालिकाका लागि आउन सक्ने जुनसुकै निर्णयको असर पनि सदरमुकाममा पर्न सक्ने सुरक्षा निकायको अनुमान छ । एमालेले मतगणना हुनुपर्ने अडान राखिरहेको छ भने केही मतदान केन्द्रहरूमा पुनः मतदान हुनुपर्ने कांग्रेसको अडान छ ।

निर्वाचन आयुक्त सगुन सम्शेर जबराको टोलीले आइतबार बाजुरा पुगेर बुढीगंगा घटनाको अध्ययन गरी सोमबार फर्किएको छ । सोमबार नै आयोगले बुढीगंगाको निर्णय दिने बुझाइ छ ।

बाजुरा सदरमुकाम मार्तडी

प्रकाशित : जेष्ठ ३, २०७९ ०८:३३
पूरा पढ्नुहोस्
प्रतिक्रिया
पठाउनुहोस्
×