ढोरपाटनको मेयरमा एमालेका नेपाली विजयी- स्थानीय तह निर्वाचन २०७९ - कान्तिपुर समाचार

ढोरपाटनको मेयरमा एमालेका नेपाली विजयी

प्रकाश बराल

बागलुङ — बागलुङको ढोरपाटन नगरपालिकाको मेयर पदमा नेकपा एमालेका उम्मेदवार देवकुमार नेपाली विजयी भएका छन् ।


उनले गठबन्धनको तर्फबाट उम्मेदवार बनेका माओवादीका चन्द्र अर्याललाई पराजित गरे । नेपाली ५ हजार ७ सय ३५ मत ल्याएर विजयी बनेका हुन् । निकटतम प्रतिस्पर्धी अर्यालले ५ हजार १ सय ३५मत ल्याएका थिए ।

उपप्रमुखमा कांग्रेसका धनबहादुर कायत विजयी भए । कायतले राजमोकी ताराकुमारी पुनलाई पराजित गरे । कायतले ५ हजार ६ सय ५०मत ल्याएका थिए भने उनका निकटतम प्रतिस्पर्धी पुनले ४ हजार ८ सय ८४ मत प्राप्त गरेकी छन् ।

यहाँ सत्ता गठबन्धन विरुद्ध एमाले र राजमोको विद्रोही समूह चुनावी मैदानमा थिए । नेपालीले यस नगरमा दोश्रो पटक प्रमुख जितेका हुन् । ढोरपाटन दलित समुदायको बाहुल्यता रहेको स्थान हो ।

यहाँका अधिकांश वडा पनि एमालेले जितेको छ । जिल्लाको गलकोट नगर, निसी खोला र तमानखोला गाउँपालिकामा कांग्रेसका उम्मेदवार प्रमुखमा विजयी भएका छन् । ताराखोलामा माओवादी र बरेङमा राजमोका उमेदवार विजयी भइसकेका छन् । काठेखोला गाउँपालिकामा एमालेका उम्मेदवार विजयी भएका छन् । सदरमुकाम रहेको बागलुङ नगरपालिका, जैमिनी नगरपालिका र बडिगाड गाउँपालिकामा भने मत गणना जारी छ ।

प्रकाशित : जेष्ठ ३, २०७९ ०८:३५
प्रतिक्रिया
पठाउनुहोस्

बागलुङको निसीखोला गाउँपालिकामा कांग्रेस र बरेङमा राजमोका उम्मेदवार विजयी

प्रकाश बराल

बागलुङ — स्थानीय तह निर्वाचन मतगणनामा बागलुङका दुई पालिकाको मत परिणाम सार्वजनिक भएको छ । निसीखोला र बरेङ गाउँपालिकाको परिणाम सार्वजनिक हुँदा गठबनन्धनका उम्मेदवार विजयी भएका छन् । निसीखोला गाउँपालिकामा कांग्रेसका सूर्यबहादुर घर्ती अध्यक्षमा निर्वाचित भए । उनले ५ हजार ५ सय ११ मत पाएका छन् । उनका निकटतम प्रतिद्वन्द्वी एमालेका भूमिराज घर्तीले २ हजार ६ सय ३९ मत पाए ।


उपाध्यक्षमा माओवादीका प्रेम घर्ती ५ हजार मत पाएर विजयी भएका छन् । उनका निकटतम प्रतिद्वन्द्वी एमालेका भोटु चन्दले २ हजार ९ सय ८ मत पाएका छन् । यहाँ यस अघिको निर्वाचनमा कांग्रेसको एकल प्यानल निर्वाचित भएको थियो । वडा नम्बर १, ४, ५ र ६ वडा कांग्रेसले २ र ३ माओवादी तथा वडा नम्बर ७ मा एमालेका उम्मेदवार विजयी भए ।

यसैगरी जिल्लाको बरेङ गाउँपालिकामा राष्ट्रिय जनमोर्चाका कृष्णप्रसाद पौडेल विजयी भएका छन् । पौडेलले ३ हजार ६ सय १ मत पाएर विजयी भएका हुन् । उनका निकटतम प्रतिद्वन्द्वी एमालेका प्रदिप थापाले २ हजार २ सय ३२ मत पाए । उपाध्यक्षमा कांग्रेसका दिलिप पुनले ३ हजार ६ सय ८२ मत ल्याएर विजयी भए । उनका निकटतम प्रतिद्वन्द्वी एमालेका दुर्गा कार्की क्षेत्रीले १ हजार ९ सय ५० मत पाइन् । बरेङको वडा नम्बर १, २ राजमो तथा वडा नम्बर ४ र ५ मा कांग्रेसका उम्मेदवार विजयी भएका छन् । वडा नम्बर ३ मा एमालेका उम्मेदवार विजयी भए ।


प्रकाशित : जेष्ठ ३, २०७९ ०६:३१
पूरा पढ्नुहोस्
प्रतिक्रिया
पठाउनुहोस्
x
×