निवर्तमान पालिका अध्यक्ष वडा सदस्यमै पराजित- स्थानीय तह निर्वाचन २०७९ - कान्तिपुर समाचार

निवर्तमान पालिका अध्यक्ष वडा सदस्यमै पराजित

तेह्रथुम

काठमाडौँ — आठराई गाउँपालिकाका निवर्तमान अध्यक्ष मानबहादुर लिम्बू वडा सदस्यमा पराजित भएका छन् । २०७४ मा ३ हजार ८ सय ७४ मत ल्याएर नेकपा एमालेबाट गाउँपालिका अध्यक्षमा निर्वाचित भएका लिम्बू यसपटक भने वडा सदस्यमा पराजित भएका हुन् । 

गाउँपालिका अध्यक्षबाट राजीनामा दिएर आठराई–७ मा गठबन्धनको कलम चिह्नबाट खुला वडा सदस्यमा उम्मेदवारी दिएका लिम्बूले ३ सय ३९ मत मात्र प्राप्त गरे । अर्को खुला सदस्य पदमा गठबन्धनबाट नेपाली कांग्रेसका जितबहादुर कन्दङ्वा पनि पराजित भए । लिम्बू र कन्दङ्वालाई एमालेका हरिप्रसाद पराजुली र कुमारप्रसाद कन्दङ्वाले हराएका हुन् । पराजुलीले ५ सय ८३ र कुमारले ५ सय ७१ मतसहित विजयी भएका हुन् ।

एमालेका पूर्वजिल्ला सचिवसमेत रहेका लिम्बू ५ वर्षअघि सम्पन्न एमालेको १० औं जिल्ला अधिवेशनमा अध्यक्षमा प्रतिस्पर्धा गरेका थिए । गत स्थानीय तह निर्वाचनमा एमालेले लिम्बूलाई आठराई गाउँपालिकाको अध्यक्ष पदको टिकट दिएर विजयी गराएको थियो । माधवकुमार नेपालनिकट भएर खुलेका लिम्बू एमाले विभाजनपछि नेकपा एकीकृत समाजवादी प्रवेश गरेका थिए ।

जिल्ला समन्वय समितिमा जान गठबन्धन दलको सहमतिमै वडा सदस्य पदमा उम्मेदवारी दिएको लिम्बूले बताए । पराजयसँगै जिल्ला समन्वय समितिमा जाने उनको सपना अधुरै रह्यो । एक कार्यकाल गाउँपालिका अध्यक्ष भएर अनुभव बटुलिसकेका लिम्बू यसपटक पनि गठबन्धनबाट अध्यक्षका आकांक्षी थिए ।

प्रकाशित : जेष्ठ ३, २०७९ १२:३९
प्रतिक्रिया
पठाउनुहोस्

२२ वर्षीय बने गाउँपालिका अध्यक्ष

बुबाको विरासत सम्हाल्दै राजाबाबु
ओमप्रकाश ठाकुर

सर्लाही — सर्लाहीको रामनगर गाउँपालिकाको अध्यक्षमा माओवादी केन्द्रबाट २२ वर्षीय राजाबाबु यादव विजयी भएका छन् । उनी सर्लाहीमा सबैभन्दा कम उमेरमा पालिका प्रमुख बन्न सफल भएका हुन् । आफ्नै काकालाई फराकिलो मतान्तरले जितेका यादव संविधानसभा सदस्य शिवपुजन राय यादवका छोरा हुन् ।

उनी बुबाको विरासत सम्हाल्न राजनीतिमा होमिएका हुन् । काठमाडौंमा बीबीएस पढिरहेका उनलाई बुबाले गाउँपालिकामा अध्यक्षको उम्मेदवारी दिन लगाएका थिए ।

जोसजाँगरका साथ प्रचारमा जुटेका २२ वर्षीय यादव रामनगर गाउँपालिकाको अध्यक्षमा ४ हजार ८१ मत ल्याएर विजयी भए । उनले नेपाली कांग्रेसका हरिनन्दनप्रसाद यादवलाई १ हजार ६ सय ८९ को फराकिलो मतान्तरले पराजित गरेका हुन् । हरिनन्दनले भने २ हजार ३ सय ९२ मत ल्याए । यस्तै उपाध्यक्षमा माओवादी केन्द्रकै गीता देवीले ३ हजार ५ सय २३ मतसहित विजयी हुँदा निकटतम प्रतिद्वन्द्वी कांग्रेसकी कोशिला साहले २ हजार ६ सय ३७ मत प्राप्त गरिन् ।

राजाबाबुको जितमा बुबा शिवपुजनको ठूलो योगदान छ । उनी राजनीतिमा स्वस्फूर्त होमिएका हैनन् । बुबाकै निर्देशनमा आफूले उम्मेदवारी दिएको राजाबाबुले बताए । ‘म काठमाडौंमा पढिरहेको एक विद्यार्थी हो, बुबाले भनेपछि उम्मेदवारी दिएँ,’ उनले भने, ‘मतदाताको मन जितेर निर्वाचित भएको हुँ, विकास हुन नसकेको मेरो पालिका बनाउने जिम्मा लिन्छु ।’ उनले बुबा शिवपुजनको साथ सहयोगमै पालिकामा अगाडि बढ्ने बताए । यसअघिका गाउँपालिका अध्यक्ष कांग्रेसका कृष्णप्रसाद वर्माको गत असार २० मा निधन भएको थियो ।

प्रकाशित : जेष्ठ ३, २०७९ १२:३७
पूरा पढ्नुहोस्
प्रतिक्रिया
पठाउनुहोस्
x
×