दलित एकजुट भएर वडामा जित- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

दलित एकजुट भएर वडामा जित

डीबी बुढा

जुम्ला — कनकासुन्दरी–८ को दलित बस्तीमा आइतबार बेग्लै उत्साह थियो । नहोस् पनि किन, दलहरूले टिकट वितरणमा भेदभाव गरेको भन्दै यहाँका दलितहरूले वडाध्यक्ष र तीन सदस्य पदमा प्यानल बनाएर स्वतन्त्र उम्मेदवारी दिएका थिए । मुख्य दलको दबदबा चिर्दै प्यानल नै विजय भएपछि बस्तीमा खुसी छायो । 

स्वतन्त्र उम्मेदवार धनबहादुर कामीले २ सय ८८ मत ल्याएर वडाध्यक्ष पद जिते । उनका प्रतिद्वन्द्वी कांग्रेसका मातृकाप्रसाद उपाध्यायले भने २ सय २० मत ल्याए । वडा सदस्यमा गोल दमाई र कर्णजित सार्कीले जिते । दलित महिला सदस्यमा स्वतन्त्र उम्मेदवार चनाखी कुलाल विजय भइन् । एक मात्र महिला सदस्य पद भने कांग्रेसकी रामुदेवी काफ्लेले जितिन् । ०७४ को स्थानीय तहको निर्वाचनमा यहाँ एमालेले जितेको थियो ।

यसपाला वडाध्यक्ष जितेका धनबहादुर पहिले एमालेकै सक्रिय कार्यकर्ता थिए । एमाले फुटेर एकीकृत समाजवादी बनेपछि उनी त्यतै लागे । तर पार्टीले टिकट दिएन । उनलाई लाग्यो, ‘ठूला दलमा हाम्रो कुनै भाउ छैन । बस्तीको हकहितका निम्ति सबैलाई मनाएर स्वतन्त्रमै भए पनि उठ्छु ।’ उम्मेदवारी दर्ताको केही दिनअघि धनबहादुरले गाउँ भेला डाके । अनि प्यानल नै बनाएर स्वतन्त्र उठ्ने निर्णय गरे । उनले भने, ‘चुनावमा दलित मतदाता किन्न पाइन्छ भन्दै हेपाहा नजरले हेर्थे । दलित बस्तीमा विकास नदिने र दलित हकअधिकारका बारेमा बोलिदिने नगरेकोले सिंगो बस्ती एकजुट हुनुपरेको हो ।’

कनकासुन्दरी–८ मा ६ गाउँ छन्– सञ्जेलबाडा, सुमलगाउँ, कुलालबाडा, रोकायाबाडा, भट्ट भण्डारीबाडा र पाउसेरा गाउँ । यीमध्ये सञ्जेलबाडा, सुमलगाउँ, कुलालबाडा दलित बाहुल्य गाउँ हुन्, जहाँ २ सय २५ घरका ६ सय दलित मतदाता छन् । यस वडामा १३ सय मतदाता थिए । एक हजार ४२ मत खसेको थियो ।

यहाँ जातकै आधारमा हुने छोइछिटो उस्तै छ । दलितहरूले धारा पँधेरामा सहजै पानी भर्न पाउँदैनन् । दलितबस्तीको चिहान घाटसमेत गैरदलितले नापी नक्सा गरेका छन् । अहिले पनि दलित र गैरदलित बीचको आर्यघाट फरक छ । बिहेबारीमा एकै भोजभतेर चल्दैन । स्थानीय चुना कामीले भनिन्, ‘दलितले कहिल्यै सुख मनले बस्न पाएनौं । सधैं अरूको पिसानीमा पर्‍यौं । चुनावमा भोट बैंक बन्यौं । अघिपछि केही पाएनौं ।’ वडाध्यक्षमा जितेका धनबहादुरले जनभावनाअनुसार काम गर्ने बताए । ‘यो पटक एकता नै बल हो भन्ने प्रमाणित गरेका छौं । गैरदलितको पनि गुनासा सम्बोधन गर्छौं,’ उनले भने ।

प्रकाशित : जेष्ठ ३, २०७९ ०६:३२
प्रतिक्रिया
पठाउनुहोस्

बागलुङको निसीखोला गाउँपालिकामा कांग्रेस र बरेङमा राजमोका उम्मेदवार विजयी

प्रकाश बराल

बागलुङ — स्थानीय तह निर्वाचन मतगणनामा बागलुङका दुई पालिकाको मत परिणाम सार्वजनिक भएको छ । निसीखोला र बरेङ गाउँपालिकाको परिणाम सार्वजनिक हुँदा गठबनन्धनका उम्मेदवार विजयी भएका छन् । निसीखोला गाउँपालिकामा कांग्रेसका सूर्यबहादुर घर्ती अध्यक्षमा निर्वाचित भए । उनले ५ हजार ५ सय ११ मत पाएका छन् । उनका निकटतम प्रतिद्वन्द्वी एमालेका भूमिराज घर्तीले २ हजार ६ सय ३९ मत पाए ।


उपाध्यक्षमा माओवादीका प्रेम घर्ती ५ हजार मत पाएर विजयी भएका छन् । उनका निकटतम प्रतिद्वन्द्वी एमालेका भोटु चन्दले २ हजार ९ सय ८ मत पाएका छन् । यहाँ यस अघिको निर्वाचनमा कांग्रेसको एकल प्यानल निर्वाचित भएको थियो । वडा नम्बर १, ४, ५ र ६ वडा कांग्रेसले २ र ३ माओवादी तथा वडा नम्बर ७ मा एमालेका उम्मेदवार विजयी भए ।

यसैगरी जिल्लाको बरेङ गाउँपालिकामा राष्ट्रिय जनमोर्चाका कृष्णप्रसाद पौडेल विजयी भएका छन् । पौडेलले ३ हजार ६ सय १ मत पाएर विजयी भएका हुन् । उनका निकटतम प्रतिद्वन्द्वी एमालेका प्रदिप थापाले २ हजार २ सय ३२ मत पाए । उपाध्यक्षमा कांग्रेसका दिलिप पुनले ३ हजार ६ सय ८२ मत ल्याएर विजयी भए । उनका निकटतम प्रतिद्वन्द्वी एमालेका दुर्गा कार्की क्षेत्रीले १ हजार ९ सय ५० मत पाइन् । बरेङको वडा नम्बर १, २ राजमो तथा वडा नम्बर ४ र ५ मा कांग्रेसका उम्मेदवार विजयी भएका छन् । वडा नम्बर ३ मा एमालेका उम्मेदवार विजयी भए ।


प्रकाशित : जेष्ठ ३, २०७९ ०६:३१
पूरा पढ्नुहोस्
प्रतिक्रिया
पठाउनुहोस्
×