कालीकोटका २ पालिका प्रमुखमा स्वतन्त्र उम्मेदवार विजयी- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

कालीकोटका २ पालिका प्रमुखमा स्वतन्त्र उम्मेदवार विजयी

तुलाराम पाण्डे

कालीकोट — कालिकोटको सदरमुकामको खाडाचक्र नगरपालिकामा स्वतन्त्रबाट उम्मेदवारी दर्ता गराएका एकीकृत समाजवादीका नेता कमलबहादुर शाही विजयी भएका छन् । ५ दलीय गठबन्धनले नेपाली कांग्रेसलाई नगर प्रमुखमा भाग दिएपछि दलीय ह्वीप नमान्ने अडानसहित उनले नगर प्रमुखमा उम्मेदवारी दिएका थिए ।

माओवादी केन्द्रसहित साविको दाहा र पाखाका सबैजसो वडामा कांग्रेस, राप्रपा, राष्ट्रिय जनमोर्चासँग साझा उम्मेदवारको रुपमा चर्चामा रहेका शाहीले एमालेका जिल्ला अध्यक्ष तथा खाडाचक्रका निवर्तमान नगर प्रमुख जसीप्रसाद पाण्डेलाई ३ सय १० मतले पछि पार्दै विजयी भएका हुन् । शाहीले एकीकृत समाजवादीले टिकट दिन आनाकानी गरेपछि स्वतन्त्रमा उम्मेदवारी दर्ता गरेका थिए । २ हजार ९ सय १९ मत ल्याई उनी नगर प्रमुखमा विजयी भए ।

‘चुनाव नसोचेकै हुँदो रहेछ‚’ नगर प्रमुखमा विजयी शाहीले भने‚ ‘२० वर्षदेखि जनताको सेवामा लागेको फल बल्ल पाइयो ।’ खाडाचक्रको शिक्षा, पूर्वाधार विकास, गरिबी र भोकमरी अन्त्य । युवा स्वरोजगारी उनको प्राथमिकता छन् ।

एमालेको राम्रो जनाधार मानिने खाडाचक्रमा २ वटा वडा कांग्रेस, २ वटा एकीकृत समाजवादी र ६ वटा वडा माओवादीको पोल्टोमा परेको छ ।

यसैगरी यहाँको शान्नित्रिवेणी गाउँपालिकाको अध्यक्षमा माओवादी केन्द्रले शिक्षकको जागिर छाडेर जनयुद्धमा होमिएका मुम्राका मोहनबहादुर केसीलाई टिकट नदिएपछि पुतली चुनाव चिह्न लिएर उम्मेदवारी दर्ता गराएका उनी विजयी भएका छन् । ५ दलीय गठबन्धनले माओवादी केन्द्रलाई पालिका अध्यक्ष र एकीकृत समाजवादीलाई उपाध्यक्षको भाग दिएपनि उनले स्वतन्त्रमा उम्मेदवारी दर्ता गराएका थिए ।

यहाँको शुभकालिका गाउँपालिका एकीकृत समाजवादीको भागमा परेपछि माओवादी केन्द्रका गोविन्दप्रसाद आचार्यले नेपाली कांग्रेसका धर्मा शाहीलाई उपाध्यक्ष दिएर गठबन्धन गरे । एमाले र समाजवादी छुट्टाछुटै प्रतिस्पर्धामा उत्रिए । पार्टी विभाजन नहुँदासम्म एमालेको किल्ला मानिने शुभाकालिका समाजवादी र एमालेका दुई अध्यक्ष लड्दा पराजित भए । आचार्यले काग्रेससँग गठबन्धन गरेर २ हजार ४ सय ९ मत ल्याए भने एकीकृत समाजवादीका पुष्पराज आचार्यले १ हजार ५ सय ९५ र एमालेका भरतराज धितालले १ हजार ५ सय मत ल्याएर पराजय भोगे । उपाध्यक्षमा पनि गठबन्धनको तर्फबाट कांग्रेसकी धर्मा शाहीले २ हजार ३४ मत पाएर विजयी भइन् ।

कालीकोटकै पलाता गाउँपालिकाको अध्यक्ष र उपाध्यक्षसहित अधिकांश वडामा माओवादी केन्द्र विजयी भएको छ ।

त्यस्तै, सत्ता गठबन्धनले यहाँको तिलागुफा नगरपालिका माओवादी केन्द्रका भागमा परेपछि कांग्रेसका शंकर उपाध्यायले एमालेका महेन्द्रबहादुर शाहीलाई उपमेयर दिएर छुट्टै गठबन्धन गरे । उपाध्यायले माओवादी केन्द्रका दिनेश चदरालाई ३ सय ८६ मतले हराउँदै विजयी भए भने उपप्रमुखमा एमालेका महेन्द्रबहादुर शाहीले बाजी मारे । नगर प्रमुखमा उपाध्यायले २ हजार ९ सय १६ मत पाए भने उपप्रमुखमा एमालेका शाही २ हजार ७ सय ५० मत पाएर विजयी भए ।

प्रकाशित : जेष्ठ २, २०७९ २०:४२
प्रतिक्रिया
पठाउनुहोस्

कालीकोटमा दुई मतदान केन्द्रको चुनाव स्थगित

तुलाराम पाण्डे

कालीकोट — कालीकोटको रास्कोट–४, स्थित रमालमस्टो आधारभूत विद्यालय र पचालझरना–३ जनता मावि खार्दु मतदान केन्द्रको चुनाव स्थगित भएको छ ।

रास्कोटमा माओवादी केन्द्र र अन्य दलका कार्यकर्ताबीच विवाद हुँदा झडप भएकोले चुनाव स्थगित गरिएको हो भने खार्दुमा कांग्रेस, माओवादी केन्द्र र चन्द समूहबीच त्रिपक्षीय झडपका कारण मतदान स्थगित गरिएको प्रमुख जिल्ला अधिकारी रामहरि शर्माले बताए ।

शर्माका अनुसार दुवै मतदान केन्द्रको चुनाव जेठ १ गते हुनेछ । खार्दु मतदान केन्द्र सदरमुकामबाट निकै टाढा भएकाले थप सुरक्षाकर्मी पनि पठाउन सम्भव नभएको उल्लेख गर्दै प्रजिअ शर्माले कर्मचारीमाथि ढुंगामुढा भए पनि गम्भीर चोट कसैलाई नलागेको जानकारी दिए ।

डीएसपी सिद्धराज न्यौपानेका अनुसार जिल्लाभरका अन्य स्थानीय तहान मतदान शान्तिपूर्ण रूपमा सम्पन्न भएको छ । शुक्रबार रातिसम्म सबै पालिका केन्द्रमा मतपेटिका संकलन गरी मतगणना सुरु गर्ने तयारी छ । कालीकोटमा ६० देखि ७० प्रतिशत मत खसेको निर्वाचन कार्यालयको प्रारम्भिक अनुमान छ ।

प्रकाशित : वैशाख ३०, २०७९ १९:५९
पूरा पढ्नुहोस्
प्रतिक्रिया
पठाउनुहोस्
x
×