कालीकोटका २ पालिका प्रमुखमा स्वतन्त्र उम्मेदवार विजयी- स्थानीय तह निर्वाचन २०७९ - कान्तिपुर समाचार

कालीकोटका २ पालिका प्रमुखमा स्वतन्त्र उम्मेदवार विजयी

तुलाराम पाण्डे

कालीकोट — कालिकोटको सदरमुकामको खाडाचक्र नगरपालिकामा स्वतन्त्रबाट उम्मेदवारी दर्ता गराएका एकीकृत समाजवादीका नेता कमलबहादुर शाही विजयी भएका छन् । ५ दलीय गठबन्धनले नेपाली कांग्रेसलाई नगर प्रमुखमा भाग दिएपछि दलीय ह्वीप नमान्ने अडानसहित उनले नगर प्रमुखमा उम्मेदवारी दिएका थिए ।

माओवादी केन्द्रसहित साविको दाहा र पाखाका सबैजसो वडामा कांग्रेस, राप्रपा, राष्ट्रिय जनमोर्चासँग साझा उम्मेदवारको रुपमा चर्चामा रहेका शाहीले एमालेका जिल्ला अध्यक्ष तथा खाडाचक्रका निवर्तमान नगर प्रमुख जसीप्रसाद पाण्डेलाई ३ सय १० मतले पछि पार्दै विजयी भएका हुन् । शाहीले एकीकृत समाजवादीले टिकट दिन आनाकानी गरेपछि स्वतन्त्रमा उम्मेदवारी दर्ता गरेका थिए । २ हजार ९ सय १९ मत ल्याई उनी नगर प्रमुखमा विजयी भए ।

‘चुनाव नसोचेकै हुँदो रहेछ‚’ नगर प्रमुखमा विजयी शाहीले भने‚ ‘२० वर्षदेखि जनताको सेवामा लागेको फल बल्ल पाइयो ।’ खाडाचक्रको शिक्षा, पूर्वाधार विकास, गरिबी र भोकमरी अन्त्य । युवा स्वरोजगारी उनको प्राथमिकता छन् ।

एमालेको राम्रो जनाधार मानिने खाडाचक्रमा २ वटा वडा कांग्रेस, २ वटा एकीकृत समाजवादी र ६ वटा वडा माओवादीको पोल्टोमा परेको छ ।

यसैगरी यहाँको शान्नित्रिवेणी गाउँपालिकाको अध्यक्षमा माओवादी केन्द्रले शिक्षकको जागिर छाडेर जनयुद्धमा होमिएका मुम्राका मोहनबहादुर केसीलाई टिकट नदिएपछि पुतली चुनाव चिह्न लिएर उम्मेदवारी दर्ता गराएका उनी विजयी भएका छन् । ५ दलीय गठबन्धनले माओवादी केन्द्रलाई पालिका अध्यक्ष र एकीकृत समाजवादीलाई उपाध्यक्षको भाग दिएपनि उनले स्वतन्त्रमा उम्मेदवारी दर्ता गराएका थिए ।

यहाँको शुभकालिका गाउँपालिका एकीकृत समाजवादीको भागमा परेपछि माओवादी केन्द्रका गोविन्दप्रसाद आचार्यले नेपाली कांग्रेसका धर्मा शाहीलाई उपाध्यक्ष दिएर गठबन्धन गरे । एमाले र समाजवादी छुट्टाछुटै प्रतिस्पर्धामा उत्रिए । पार्टी विभाजन नहुँदासम्म एमालेको किल्ला मानिने शुभाकालिका समाजवादी र एमालेका दुई अध्यक्ष लड्दा पराजित भए । आचार्यले काग्रेससँग गठबन्धन गरेर २ हजार ४ सय ९ मत ल्याए भने एकीकृत समाजवादीका पुष्पराज आचार्यले १ हजार ५ सय ९५ र एमालेका भरतराज धितालले १ हजार ५ सय मत ल्याएर पराजय भोगे । उपाध्यक्षमा पनि गठबन्धनको तर्फबाट कांग्रेसकी धर्मा शाहीले २ हजार ३४ मत पाएर विजयी भइन् ।

कालीकोटकै पलाता गाउँपालिकाको अध्यक्ष र उपाध्यक्षसहित अधिकांश वडामा माओवादी केन्द्र विजयी भएको छ ।

त्यस्तै, सत्ता गठबन्धनले यहाँको तिलागुफा नगरपालिका माओवादी केन्द्रका भागमा परेपछि कांग्रेसका शंकर उपाध्यायले एमालेका महेन्द्रबहादुर शाहीलाई उपमेयर दिएर छुट्टै गठबन्धन गरे । उपाध्यायले माओवादी केन्द्रका दिनेश चदरालाई ३ सय ८६ मतले हराउँदै विजयी भए भने उपप्रमुखमा एमालेका महेन्द्रबहादुर शाहीले बाजी मारे । नगर प्रमुखमा उपाध्यायले २ हजार ९ सय १६ मत पाए भने उपप्रमुखमा एमालेका शाही २ हजार ७ सय ५० मत पाएर विजयी भए ।

प्रकाशित : जेष्ठ २, २०७९ २०:४२
प्रतिक्रिया
पठाउनुहोस्

'लालकिल्ला' कीर्तिपुरमा कांग्रेस विजयी

कान्तिपुर संवाददाता

काठमाडौँ — वामपन्थीहरुको लालाकिल्लाका रूपमा रहेको कीर्तिपुर नगरपालिकामा पहिलो पटक एमाले 'क्लिन स्विप' भएको छ । २०५४ सालमा नगरपालिका बनेको कीर्तिपुरमा पहिलो पटक कांग्रेसका राजकुमार नकर्मी मेयरमा निर्वाचित भएका हुन् ।

९ हजार ४३ मत ल्याएका नकर्मीले एमालेका केशरत्न बज्राचार्यलाई ३५ सय ३६ अन्तरले पारित गरेका हुन् । बज्राचार्यले ५५ सय ७ मत ल्याएका छन् । त्यसैगरी उपमेयरमा शुभलक्ष्मी शाक्य उप मेयरमा निर्वाचित भएकी छिन् । ८६ सय ६५ मत प्राप्त गरेकी शाक्यले एमालेकी बिन्दु महर्जनलाई पराजित गरेकी हुन् । महर्जनले ७२ सय ६ मत प्राप्त गरिन् । जनता समाजवादी पार्टीका नेताहरुले शाक्य कांग्रेसको चुनाव चिह्न लिएर प्रतिस्पर्धा गरेकी आफ्नो दलको नेता भएको बताएका छन् । मा‌ओवादी केन्द्रले मेयर उम्मेदवार शिवशंकर महर्जनले ४ हजार ९० र एकीकृत समाजवादीका बटुकृष्ण थापाले १ हजार १ सय ५३ मत प्राप्त गरेका छन् ।

कीर्तिपुरको मेयर तथा उपमेयर मात्रै नभएर १० वटा मध्ये ९ वडाध्यक्ष कांग्रेसका उम्मेदवारहरू विजयी भएका छन् । वडा नम्बर ४ मा स्वतन्त्र उम्मेदवार दिनेशचन्द्र दाहाल निर्वाचित भएका छन् । एमाले २ जना दलीय महिला सदस्यमा निर्वाचत भएका छन् । जसमध्ये वडा नम्बर ८ सरस्वती परियार निर्विरोध निर्वाचित भएकी थिइन् । वडा नम्बर २मा एमालेकी दलित महिला सदस्य सुष्मा विश्वकर्मा विजयी भएकी हुन् । विश्वकर्माले माओवादी केन्द्रका बालकुमार विश्वकर्मालाई पराजित गरेकी हुन् ।

एमाले कीर्तिपुर नगर कमिटीका अध्यक्ष राधाकृष्ण बस्नेतले आन्तरिक समस्याको कारण अहिलेको अवस्था आएको बताए ।

'आन्तरिक समस्याको कारणले त्यस्तो परिणाम आएको हो । समिक्षा बैठकपछि के-के विषयमा समस्या देखिएको हो त्यस विषयलाई सार्वजनिक गर्छु । एन्टीइन्कबेन्सी (सत्ता विरोधी धारणा)ले कारणले पनि हो,' अध्यक्ष बस्नेतले भने, 'अहिले पनि यो गढ हो र गढकै रूपमा रहन्छ । आन्तरिक कारण र असन्तुष्टिहरू छन् । वामपन्थीहरूको वर्चश्व घटेको छैन ।'

प्रकाशित : जेष्ठ २, २०७९ २०:३९
पूरा पढ्नुहोस्
प्रतिक्रिया
पठाउनुहोस्
×