मदाने गाउँपालिका अध्यक्षमा कांग्रेस उम्मेदवार १० मतले विजयी, उपाध्यक्षमा एमाले - स्थानीय तह निर्वाचन २०७९ - कान्तिपुर समाचार

मदाने गाउँपालिका अध्यक्षमा कांग्रेस उम्मेदवार १० मतले विजयी, उपाध्यक्षमा एमाले 

गगनशिला खड्का

गुल्मी — गुल्मीको मदाने गाउँपालिका अध्यक्षमा झिनो मतान्तरले नेपाली कांग्रेसका महेन्द्रबहादुर कुँवर विजयी भएका छन् । सत्तारुढ गठबन्धनबाट कांग्रेसका उम्मेदवार कुँवरले एमालेका प्रेम केसीलाई जम्मा १० मतले पराजित गर्दै अध्यक्ष पदमा निर्वाचित भएका हुन् ।

अध्यक्षमा विजयी कुँवरले ४ हजार ७ सय ७ मत ल्याउँदा गर्दा केसीले ४ हजार ६ सय ९७ मत ल्याए ।

पालिकाको उपाध्यक्ष पदमा भने एमालेबाट सरिता खड्का ३ सय ५६ मत अन्तरले विजयी भएकी छन् । खड्काले ४ हजार ५ सय ६५ मत ल्याउँदा गठबन्धनको तर्फबाट उम्मेदवार बनेका नेकपा (माओवादी) केन्द्रका वेगमबहादुर चन्दले ४ हजार २ सय ११ मत मात्र प्राप्त गरे ।

उपाध्यक्षमा गठबन्धनका धेरै मत बदर हुँदा उपाध्यक्ष पद गुमेको माओवादी केन्द्रले जनाएको छ । गठबन्धनको उम्मेदवारहरुलाई क्रस मत धेरै बदर भएको निर्वाचन अधिकृतको कार्यालयले जनाएको छ। स्थानीय निर्वाचन २०७४ मा एउटा वडाध्यक्षबाहेक सबै जितेको एमालेले अहिले उपाध्यक्ष, २ वडाध्यक्ष र ३ जना वडासदस्य जितेको छ ।

वडाध्यक्षमा नेपाली कांग्रेसका तर्फबाट वडा नं. १ मा सुशील चन्द, ३ मा चेतबहादुर सेन, ४ मा प्रेमबहादुर सेन, ६ मा मनिराम थापा र ७ मा सन्तोष केसीले जितेका छन् ।

त्यस्तै एमालेको तर्फबाट वडा नं. २ मा हिमाल केसी र ५ मा माधव भुसाल विजयी भएका छन् । एमालेका तर्फबाट विजयी वडाध्यक्ष दुवैजना यसअघि पनि वडाध्यक्ष थिए ।

प्रकाशित : जेष्ठ २, २०७९ १५:४३
प्रतिक्रिया
पठाउनुहोस्

सत्यवती गाउँपालिकामा एमालेका पाण्डे विजयी 

गगनशिला खड्का

गुल्मी — गुल्मीको सत्यवती गाउँपालिकामा नेकपा (एमाले)का उम्मेदवार विजयी भएका छन् । गाउँपालिकाको अध्यक्षमा टिकाराम पाण्डे र उपाध्यक्षमा एमालेकै निरमाया तरामु विजयी भएका हुन् । कांग्रेस, माओवादी, राष्ट्रिय जमोर्चा र देशभक्त जनगणतान्त्रिक मोर्चाको गठबन्धनलाई हराउँदै अध्यक्षमा एमालेका पाण्डेय विजयी भएका हुन् । पाण्डे ६ सय ५६ मतान्तर र उपाध्यक्षमा तरामु ६ सय ६३ मतान्तरले विजयी भएका हुन्। 


पाण्डेले ६ हजार २६७ मत ल्याउँदा उनका निकटतम प्रतिद्वन्दी नेपाली काँग्रेसका पारिश्वर ढकालले ५ हजार ६ सय ११ मत ल्याए । त्यस्तै उपाध्यक्ष पदमा तरामु ६ हजार २ सय ३४ मतका साथ विजयी हुँदा गठबन्धनका तर्फबाट नेपाली कांग्रेसका तेज कुमारी थापाले ५ हजार ५ सय ४१ मत ल्याएकी छन् । सत्यवतीमा वडाध्यक्षहरुमा पनि एमालेको बहुमत छ । ५ वडा एमालेले जितेको छ भने गठबन्धनले ३ वडा जितेको छ ।


प्रकाशित : जेष्ठ २, २०७९ १२:०९
पूरा पढ्नुहोस्
प्रतिक्रिया
पठाउनुहोस्
×