बाजुरामा आइतबार आयोगको टोली जाँदै- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

बाजुरामा आइतबार आयोगको टोली जाँदै

कान्तिपुर संवाददाता

काठमाडौँ — बाजुराको बुढीगंगा नगरपालिकामा शनिबार निर्वाचन हुन नसकेपछि निर्वाचन आयोगले आयुक्तको नेतृत्वमा एउटा टोली अनुगमनको लागि पठाउने भएको छ ।

आयोगले निर्वाचन हुन नसक्नुको वास्तविकता बुझ्न आयुक्त सगुन शम्शेर जबराको नेतृत्वमा आइतबार टोली पठाउन लागेको हो ।

बुढीगंगामा निर्वाचन गराउन २१ वटा मतदान केन्द्र तय गरिएको थियो । निर्वाचन गराउन सम्पूर्ण तयारी भएपनि सुरक्षाकर्मी समेत नराखी निर्वाचन अधिकृतले निर्वाचन स्थिगित गराउन नसक्ने गरी एकपक्षिय मतदान भएको जानकारी आयोगमा आएको थियो ।

‘सिंगो नगरपालिकामा नै निर्वाचन हुन सकेन । त्यसैले वास्तविकता बुझन आयोगको टोली जान लागेको हो, ’ प्रमुख निर्वाचन आयुक्त दिनेश थपलियाले भने ।

बाजुरामा पुन: मतदान गर्न मतपत्र र अन्य निर्वाचन सामाग्री पठाउनु पर्ने भएकाले १० गतेभित्र निर्वाचन गर्ने योजना रहेको उनले बताए । आयोगले बुढीगंगा नगरपालिकाको मतपत्र पुनः डिजाइन गरेर छाप्नु पर्ने हुन्छ । यसअघि पुरै जिल्लाको एउटै मतपत्र थियो । अब नगरपालिकाको मात्रै छुट्टै मतपत्र छापिनेछ ।

प्रकाशित : वैशाख ३१, २०७९ २१:४४
प्रतिक्रिया
पठाउनुहोस्

झापाको बिर्तामोडमा रोकियो मतगणना

अर्जुन राजवंशी

बिर्तामोड — झापाको बिर्तामोड नगरपालिकामा मतगणना कार्य रोकिएको छ । मतगणनामा खटाइएका करार कर्मचारीलाई हटाउनुपर्ने आवाज उठेपछि साँझ ८ बजेपछिबाट गणना रोकिएको हो ।

बिर्तामोडमा शनिबार दिउँसोबाट मतगणना कार्यमा तनावको अवस्था सिर्जना भइरहेको छ । बिर्तामोडमा कांग्रेस-माओवादी केन्द्रको गठबन्धन र एमालेबीच कडा प्रतिस्पर्धा छ । तर, मेयर-उपमेयर पदमा भने एमालेका उम्मेदवारले अग्रता बनाएका छन् । गठबन्धनले करार कर्मचारी नहटाए गणना कार्य अघि बढ्न नदिने अडान राखेको छ ।

‘थोरै समस्या देखिएको छ । हामी छलफल गरेर समाधान गर्ने प्रयास गरिरहेका छौं । रोकिएको गणना कार्य छिट्टै सुचारु गर्ने प्रयास भइरहेको छ‚’ नगरपालिकाका निर्वाचन अधिकृत डम्बर काफ्लेले बताए । यसअघि बेलुका साढे ५ बजेतिर निर्वाचन कार्यालयको गाडीमा मतपत्र भेटिएको भन्दै गठबन्धनका कार्यकर्ताले विरोध जनाएका थिए । विरोधका कारण नगरपालिका अगाडिको अवस्था तनावपूर्ण बनेको थियो ।

प्रकाशित : वैशाख ३१, २०७९ २१:४१
पूरा पढ्नुहोस्
प्रतिक्रिया
पठाउनुहोस्
×