खार्पुनाथ गाउँपालिकामा मत गणनास्थल बाहिर झडप हुँदा ३ जना घाइते, एकको अवस्था गम्भीर

खार्पुनाथ गाउँपालिका-५ सागर शाहीले गठबन्धनका कार्यकर्ताद्वारा नेकपा एमाले कार्यकर्तामाथि आक्रमण गर्दा तीनजना घाइतेको भएको बताए । उनले मतगणनस्थल बाहिर बसिरहेका बेला फलामको छडले टाउकोमा हानेको बताए ।

छडको प्रहारबाट घाइते हुनेमा सोही वडा निवासी छत्तबहादुर शाही, मन्दिर सिंह ऐडी र नविन ऐडी छन् । घाइते तीनै जनालाई हेलिकोप्टरबाट गाउँपालिका केन्द्र याङ्चुबजारबाट ल्याई जिल्ला अस्पतालमा प्राथमिक उपचार भइरहेको छ । घाइते शाही भने बेहोस अवस्थामा छन् । उनको टाउकोमा गम्भीर चोट लागेको छ ।

अस्पतालका चिकित्सक रोशन खनालले घाइतेमध्ये शाहीको अवस्था गम्भीर रहेको र थप उपचारका लागि जिल्ला बाहिर रिफर गरिएको बताए । शाहीलाई हेलिकोप्टरबाट प्रदेश अस्पताल सुर्खेत लग्ने तयारी भइरहेको छ ।