भरतपुर महानगरपालिकाको मतगणना सुरू- स्थानीय तह निर्वाचन २०७९ - कान्तिपुर समाचार

भरतपुर महानगरपालिकाको मतगणना सुरू

कान्तिपुर संवाददाता

चितवन — चितवनस्थित भरतपुर महानगरपालिकाको मतगणना सुरू भएको छ । शनिबार बिहान झण्डै १२ बजे महानगरको वडा नम्बर १ बाट गणना सुरू गरिएको हो।

एक लाख ८५ हजार मतदाता रहेको भरतपुर महानगरमा शुक्रबार भएको मतदानमा १ लाख २७ हजारले मत दान गरेका थिए । यहाँ माओवादी केन्द्रको तर्फबाट रेणु दाहाल मेयरको उम्मेदवार छिन् भने एमालेको तर्फबाट विजय सुवेदी उम्मेदवार छन् ।

नेपाली कांग्रेसले भने यहाँ मेयरको रुपमा माओवादी केन्द्रलाई समर्थन गरेको छ । यद्यपि कांग्रेसबाट असन्तुष्ट बनेका जगन्नाथ पौडेलले पनि मेयरमा स्वतन्त्र उम्मेदवारी दिएका छन् ।

भरतपुर महानगरपालिकामा कूल जनसंख्या ३,६९,३७७ रहेको छ भने कुल मतदाता संख्या १,८५,७५२ रहेको छ । जसमा ८८,८८४ पुरुष र ९६,८६७ महिला रहेका छन् । यस महानगरपालिकामा २९ वडा छन् ।

प्रकाशित : वैशाख ३१, २०७९ १२:०५
प्रतिक्रिया
पठाउनुहोस्

रसुवाका तीन गाउँपालिमा कांग्रेसको अग्रता

बलराम घिमिरे

रसुवा — रसुवामा जारी मतगणनामध्ये तीन वटा गाउँपालिकाको अध्यक्षमा नेपाली कांग्रेसले अग्रता लिएको छ । उत्तरगया, नौकुण्ड र आमाछोदिङ्मो गाउँपालिकाको मतगणनामा नेपाली कांग्रेसले अग्रता लिएको हो । कालिका गाउँपालिकाको अध्यक्षमा भने नेकपा माओवादी केन्द्रले अग्रता लिएको छ । 

जिल्लाको चार वटा गाउँपालिकामा मध्यरातिदेखि मतगणना जारी छ । उपाध्यक्षमा पनि दुई वटा गाउँपालिकामा कांग्रेसको अग्रता छ । उत्तरगया र कालिका गाउँपालिकाको उपाध्यक्ष पदमा कांग्रेसले अग्रता लिएको हो । त्यस्तै आमाछोदिङ्मो गाउँपालिकामा माओवादी केन्द्रको उपाध्यक्ष पदमा अग्रता छ । नौकुण्डमा उपाध्यक्ष पदमा जसपाको अग्रता छ ।

लाङटाङ मतदान केन्द्रको मतपेटिका सदरमुकाम नआइपुगेकोले गोसाइकुण्ड गाउँपालिकको मतगणना अझै हुन सकेको छैन । मतपेटिका दिउँसो दुई बजेसम्ममा सदरमुकाम आइपुग्ने मुख्य निर्वाचन अधिकृत राजेन्द्र नेपालले बताए । 'दुई बजे सर्वदलीय बैठक राखिएको छ,'उनले भने,' त्यसपछि मतगणना हुनेछ ।' हेलिकप्टरमा ल्याउने भनिएको मतपेटिका पैदल हुँदै ल्याइएको हो ।

प्रकाशित : वैशाख ३१, २०७९ १२:०३
पूरा पढ्नुहोस्
प्रतिक्रिया
पठाउनुहोस्
×