पर्वतमा ६५ प्रतिशतभन्दा बढी मत खस्यो, शनिबार बिहानदेखि मतगणनाको तयारी - स्थानीय तह निर्वाचन २०७९ - कान्तिपुर समाचार

पर्वतमा ६५ प्रतिशतभन्दा बढी मत खस्यो, शनिबार बिहानदेखि मतगणनाको तयारी 

अगन्धर तिवारी

पर्वत — स्थानीय तहको निर्वाचनअन्तर्गत पर्वतमा शुक्रबार ६५ प्रतिशतभन्दा धेरै मत खसेको निर्वाचन आयोगले जनाएको छ । आयोगको जिल्लास्थित कार्यालयका अनुसार कुल एक लाख २२ हजार ५० मध्ये ७९ हजार सात सय ९६ मत खसेको हो ।

जिल्ला निर्वाचन अधिकारी लक्षु शर्माका अनुसार सबैभन्दा धेरै जलजला गाउँपालिकामा ६८ दशमलव ६४ प्रतिशत मत खसेको छ । त्यस्तै पैयुं गाउँपालिकामा ६७ दशमलव ५७ प्रतिशत मत खसेको छ । कुश्मा नगरपालिकामा ६५ दशमलव ९१, फलेबास नगरपालिकामा ६३ दशमलव ६१, महाशिला गाउँपालिकामा ६४ दशमलव ५८, मोदी गाउँपालिकामा ६४ दशमलव ११ र बिहादी गाउँपालिकामा ६३ दशमलव ३८ प्रतिशत मत खसेको छ ।

जिल्लाका सबैजसो पालिकामा मतदान शान्तिपूर्णरुपमा सम्पन्न भएको मुख्य निर्वाचन अधिकृतको कार्यालयले जनाएको छ । फलेवास नगरपालिका–३ स्थित महादेव आधारभूत विद्यालयमा मतदान अधिकृतले हस्ताक्षर नगरेको मतपत्र फेला परेपछि केहीबेर मतदान रोकिएको थियो । मतदान अधिकृत शिवप्रसाद पौडेलले हस्ताक्षर नगरी थुप्रै मतपत्र वितरण गरेको भन्दै मतदाताहरुले विरोध जनाएपछि त्यस्तो पाइएमा गणना गरिने भन्दै मुचुल्का गराएपछि मतदान प्रक्रियाअघि बढाइएको नगर प्रमुखमा स्वतन्त्र उम्मेदवारी दिएका कृष्णप्रसाद शर्माले बताए । अन्य सबैजसो केन्द्रहरुमा मतदान शान्तिपूर्ण रुपमा सम्पन्न भएको निर्वाचन अधिकारी शर्माले बताए ।

निर्वाचन कार्यालयका अनुसार जिल्लाका सबैजसो मतदानस्थलबाट सबै पालिकाका केन्द्रहरुसम्म मतपेटिका संकलन अन्तिम चरणमा पुगिसकेको छ । मतदान सकिने समयमा वर्षा भएपछि केही मतदान केन्द्रहरुबाट मतपेटिका सुरक्षित साथ केन्द्रमा पुर्‍याउन समस्या भएको थियो । जिल्लाका पैंयु गाउँपालिकाबाहेक सबैजसो पालिकामा मतगणना शनिबार बिहानदेखि सुरु गर्ने तयारी भएको निर्वाचन अधिकारी शर्माले जानकारी दिए । पैंयुमा आजै राति ११ बजेदेखि मतगणना सुरु गर्ने तयारी गरिएको पैंयुका निर्वाचन अधिकृत भूमिप्रसाद शर्माले बताए ।

प्रकाशित : वैशाख ३०, २०७९ २२:५०
प्रतिक्रिया
पठाउनुहोस्

एक घर एक धारा भन्दै सधैं भोट माग्दै

अगन्धर तिवारी

पर्वत — ११ वर्षको उमेरमा विवाह गरी फलेबास–३ पुर्कोट आएकी ७१ वर्षिया सुकमायाँ दर्जी लाई पानी बोक्ने दुःखले कहिल्यै छोडेन । पल्लो गाउँकी ८० वर्षीया भीमकुमारीको पानी दुःख पनि उस्तै छ । पानी बोक्दा वर्षमा दुईवटा डोका फाट्छन् । हरेक बिहान ४ बजेदेखि नै राहालेपानी र गुँहेलीको पँधेरोमा पानी लिनेहरूको लस्कर हुन्छ । तर, यो लस्कर मत्थर पार्न र पानीको समस्या समाधान गर्ने कुरा सुन्न उनीहरूलाई निर्वाचन नै कुर्नुपर्छ । अरुबेला खानेपानीको चर्चा नै हुँदैन । भइहाले पनि यत्तिकै सेलाउँछ ।

गत स्थानीय निर्वाचनमा नेकपा एमाले र नेपाली कांग्रेसका उम्मेदवारले पानीकै नारा बनाएर शंकरपोखरीबासीसँग मत मागे । कांग्रेसले हार्‍यो । एमालेका उम्मेदवारले जिते ।

‘एकवर्षमै एक घर एक धारा ल्याइदिन्छु भनेर चुनाव जिताइयो,’ स्थानीय चित्रा थापाले भनिन्, ‘अहिले पनि त्यहि भन्दै भोट माग्दैछन् ।’ पानीको चरम अभाव भोगेका करिव छ सय परिवारले अब पनि उक्त नारा लिएर आउनेसँग लिखित सम्झौता खोजिरहेका छन् । पानीका लागि शंकरपोखरीमा पहल र प्रयास नभएको भने होइन । बृहत शंकरपोखरी खानेपानी आयोजनाका लागि तत्कालीन खानेपानी तथा सरसफाइ डिभिजन कार्यालयले ५ वर्षअघि आयोजनाको लागत अनुमान गरेको थियो । तर स्थानीय राजनीतिक दलकै द्वन्द्वका कारण आयोजना अघि बढ्न सकेन ।

तीन वर्षअघि प्रदेश सरकारको ऊर्जा, जलस्रोत तथा खानेपानी मन्त्रालयले २०७५ फागुनमा लमायखोला लिफ्ट खानेपानी आयोजना सुरु गरेको थियो । बजेट अभावका कारण उक्त आयोजनाको पानी पनि बस्तीसम्म अझै आइपुगेको छैन । फलेबास नगरपालिकाले गत वर्ष पोखराचौरमा डिप बोरिङमार्फत खानेपानी वितरण गर्ने प्रयास गरेको भए पनि उक्त प्रयास सफल नभएको स्थानीयले बताएका छन् ।

आगामी शुक्रबार हुने निर्वाचनका लागि मत माग्दै घरदैलो गरेका उम्मेदवारले पनि शंकरपोखरीमा एक घर एक धारा खानेपानीको नारालाई प्रमुख बनाएका छन् । निवर्तमान नगरप्रमुख पदमपाणि शर्माले अघिल्लो कार्यकालमा पनि सोही नारा लगाएका थिए । काम पूरा गर्न नसकेकोमा क्षमा माग्दै अब पूरा गर्ने बाचासहित मत मागिरहेका छन् । शर्मासँगै अघिल्लोपल्ट पराजित गंगाधर तिवारीले शंकरपोखरीबासीलाई झूटा आश्वासन बाँडेको भन्दै अब त्यस्ता झूटको खेती गर्नेको पछि नलाग्न आग्रह गर्दै मत मागिरहेका छन् । आफू जन्मिएकै गाउँ भएकाले शंकरपोखरीको पानी दुःख आफूले राम्रोसँग भोगेकोले निर्वाचित भएको एक वर्षभित्रै हरेक घरमा पानीको धारा पुर्‍याउने बाचा गरेका छन् ।

चुनावका बेला मात्रै खानेपानीको चर्को बहस सुनेका सर्वसाधारण भने अब पनि उक्त एजेन्डा लिएर आउने उम्मेदवारसँग प्रश्न गर्न थालेका छन् । ‘म आएको ६० वर्ष भइसक्यो,’ भीमकुमारीले भनिन्, ‘पानी खोज्दै कुवामै जिन्दगी गयो । कति नेता आए, नारा बनाए, जिते, गए । पानीको कुरा पनि सँगै गयो ।’

हरेकपल्ट निर्वाचनमा मत माग्दै दैलोमा आउने नेताहरूलाई पानीको समस्या सुनाउने र पानी सहज बनाइदिन अनुरोध गर्दा वाक्क परेका शंकरपोखरीवासी अब पनि यही नियति भोग्नुपरे आगामी निर्वाचनमा ‘नो भोट’ को अभियान चलाइने चेतावनी दिएका छन् ।

प्रकाशित : वैशाख २७, २०७९ ०९:०५
पूरा पढ्नुहोस्
प्रतिक्रिया
पठाउनुहोस्
×