बारामा एमाले र जसपाका कार्यकर्ताबीच झडप

सशस्त्र प्रहरीका एक सुरक्षा अधिकारीका अनुसार प्रहरीले झडप रोक्न आधा दर्जन अश्रुग्यास प्रहार गरेको थियो। घटनास्थलमा अहिले मुख्य निर्वाचन अधिकृत खिलानाथ रेग्मीसहित ठूलो संख्यामा सुरक्षाकर्मीहरू घटनास्थल पुगेका छन् ।

उक्त स्थानमा दुवै पक्षका केही घाइते भएको बुझिएको छ । साथै केही मतपत्र पनि च्यातिएको स्थानीयहरूले बताएका छन् ।

यसैबीच बिहानैदेखि देवताल गाउँपालिका ७ पिपरपातीमा पनि कांग्रेस र लोसपाका कार्यकर्ताबीच झडप हुँदा मतदान रोकिएको थियो । तर पिपरपातीमा अहिले मतदान सुरू भइसकेको छ । पिपरपातीमा झन्डै साढे २ घण्टा मतदान रोकिएको थियो ।

सदरमुकाम कलैयाबाट प्रमुख जिल्ला अधिकारीसहित गएको सुरक्षा प्रमुखहरूको टोलीले दुवै समूहबीच सहजीकरण गराएपछि मतदान सुरू भएको हो ।

यस्तै पचरौता गाउँपालिका वडा नं ४ स्थित बेलडारी मतदान केन्द्रमा जसपाका कार्यकर्ताले नक्कली मत खसाउन लागेपछि विवाद उत्पन्न भएको छ । जहाँ अहिले मतदान रोकिएको छ । यससँगै पचरौताका वडा २ का दुई वटा मतदान केन्द्र र वडा ४ को एउटा मतदान केन्द्रमा गरी दुई मतदान केन्द्रमा मतदान रोकिएको छ ।