वीरगन्जमा महिलाले चलाए ‘विशेष मतदान केन्द्र’- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

वीरगन्जमा महिलाले चलाए ‘विशेष मतदान केन्द्र’

शंकर आचार्य

पर्सा — वीरगन्ज महानगरपालिका ४ स्थित चिकित्साशास्त्र अध्ययन संस्थान मतदान केन्द्र ‘क’ र ‘ख’ महिलाले मात्रै सञ्चालन गर्ने भएका छन् । ‘विशेष मतदान केन्द्र’ नाम दिइएको यो मतदान केन्द्रमा ‘क’ र ‘ख’ गरी २ वटा मतदानस्थल रहेका छन् । 

मतदान अधिकृत, सहायक कर्मचारी, सुरक्षाकर्मीसमेत अधिकांश महिला नै छन् । मतदान स्थल ‘क’ की प्रमुख वीरगन्ज महानगरपालिकाकी अधिकृत प्रतिज्ञा वैद्य हुन् भने ‘ख’ की प्रमुख नेपाल बैंक आदर्शनगर शाखाकी उपप्रबन्धक प्रतीक्षा सिंह हुन् । दुवै मतदानस्थलमा गरी कुल १ हजार ६ सय ९ मतदाता छन् । ‘क’ मा ७ सय ८४ र ‘ख’ मा ८ सय २५ मतदाता छन् । सुरक्षा प्रमुख पनि महिला नै छिन् । प्रहरी सहायक निरीक्षक भुवनकला ढुंगानाको नेतृत्वमा कुल एक दर्जन सुरक्षाकर्मी परिचालित भएकोमा तीमध्ये ३ महिला छन् ।

कर्मचारीतर्फ कुल १० महिला खटिएकोमा ९ महिला र १ मात्र पुरुष छन् । मतदान स्थल ‘क’ की प्रमुख वैद्यले मतदान केन्द्रको सम्पूर्ण तयारी पूरा भइसकेको बताइन् । आफूहरू मतदान केन्द्र सञ्चालन गर्न सक्षम भएकाले कुनै समस्या नरहेको उनले बताइन् । ‘सबै तयारी पूरा भइसकेको छ, हामीलाई मतदान केन्द्र सञ्चालन गर्न कुनै समस्या छैन,’ उनले भनिन्, ‘गत स्थानीय निर्वाचनमा पनि मैले आदर्शनगरस्थित बालमन्दिर मतदान केन्द्रको प्रमुख भएर निर्वाचन सम्पन्न गरेकी थिएँ ।’

मतदानस्थल ‘ख’ की प्रमुख सिंहले यसअघि २ वटा निर्वाचनमा आफू खटिसकिएकाले अनुभवको कमी नरहेको बताइन् । ‘योसहित मेरो तेस्रो अनुभव हो,’ उनले भनिन्, ‘हामी २ महिला अधिकृतको तालमेल राम्रो छ, सफल रुपमा निर्वाचन सम्पन्न गर्ने छौं ।’

तयारी पूरा
पर्साका सम्पूर्ण मतदान केन्द्रमा कर्मचारी र निर्वाचन सामग्री पुगेका छन् । प्रमुख जिल्ला अधिकारी उमेशकुमार ढकालका अनुसार सबै मतदान केन्द्रमा निर्वाचन सामग्रीसहित कर्मचारी पुगेका छन् । १४ वटा स्थानीय तह रहेका पर्सामा वीरगन्ज महानगरपालिका र अन्य १३ स्थानीय तह रहेका छन् ।

तीनमा १ सय ६७ मतदानस्थल र ४ सय ४ वटा मतदान केन्द्र रहेका छन् । वीरगन्ज महानगरमा ५५ वटा मतदानस्थल र १ सय ४३ वटा मतदान केन्द्र रहेका छन् । पकाहामैनपुर गाउँपालिकामा मतदानस्थल छन् । त्यहाँ ६ मतदानस्थल र १५ वटा मतदान केन्द्र छन् ।

प्रहरी उपरीक्षक रमेशकुमार बस्नेतले निर्वाचनलाई लक्षित गरी जिल्लामा म्यादीसमेत गरी २ हजार ८ सय नेपाल प्रहरीको जनशक्ति परिचालन गरिएको बताए । त्यसबाहेक प्रहरी प्रधान कार्यालयबाट प्रहरी नायब उपरीक्षक र प्रहरी निरिक्षकसमेत गरी थप ३५ जना जुनियर/सिनियर अधिकृत जिल्लामा पठाइएकाले जनशक्ति अभाव नभएको उनले बताए ।

नेपाल प्रहरीबाहेक जिल्लामा सशस्त्र प्रहरीको ५ सय, नेपाली सेनाको ७ सय र राष्ट्रिय अनुसन्धानको २ दर्जन जनशक्ति पनि परिचालन गरिएको छ । निर्वाचनको सुरक्षालाई दृष्टिगत गरी प्रमुख जिल्ला अधिकारी, नेपाल र सशस्त्र प्रहरी उपरीक्षकसमेतको टोलीले रात्री गस्तीसमेत बढाएको प्रहरी उपरीक्षक बस्नेत बताउँछन् ।

प्रकाशित : वैशाख २९, २०७९ १७:१६
प्रतिक्रिया
पठाउनुहोस्

सीमामा फेरि कोरोना जाँच सुरु

शंकर आचार्य

पर्सा — निगरानी बढाएको करीब एक महिनामा वीरगन्ज नाकास्थित नेपाल–भारत सीमास्थित हेल्थ डेस्कमा एउटा पनि कोरोना संक्रमित फेला परेनन् । डेस्ककी प्रमुख डा. अनिशा महतोका अनुसार यस अवधिमा भारतका ठूला सहरबाट आउनेको बिशेष निगरानी राखिए पनि तीमध्ये एक जनामा पनि कोरोना संक्रमण पुष्टि नभएको हो ।

‘भारतको राजधानी नयाँदिल्लीमा कोरोनाको चौथो लहरको संकेत देखिएसँगै हामीले डेस्कमा विशेष सर्तकता अपनाउन सुरु गर्‍यौं,’ उनी भन्छिन्, ‘विशेषगरी दिल्लीबाट रेल चढेर रक्सौलसम्म आउने र त्यहाँबाट सोझै नेपाल प्रवेश गर्ने नेपाली तथा भारतीहरूको विशेष निगरानी गरिरहेका छौं, तर यस अवधिमा एक जनामा पनि कोरोना संक्रमण पुष्टि भएन ।’ यसबाट दिल्लीमा देखिएको कोरोनाको लहर मत्थर हुँदै गएको र कोरोना संक्रमण नेपाल भित्रिने जोखिम पनि कम हुँदै गएको संकेत मिलेको उनले बताइन् ।

दिल्लीबाट रक्सौल दैनिक साँझ ५ बजे एउटा रेल आउने गरेको छ । उक्त रेलका ५० देखि ६० यात्रु नेपाल प्रवेश गर्ने गरेका छन् । उनीहरूको अनिवार्य रूपमा एन्टिजेन परीक्षण गर्ने गरिएको उनले बताइन् । यसबाहेक कोलकाता र मुम्बईबाट आउने रेलका यात्रुहरूको पनि अनिवार्य रूपमा एन्टिजेन परीक्षण गर्ने गरिएको उनले बताइन् । ‘भारतका महानगर तथा अन्य ठूला सहरहरूबाट समेत गरी दैनिक ४ सय देखि ४ सय ५० जना यात्रु नेपाल प्रवेश गर्छन्,’ उनले भने, ‘तीमध्ये १ सय ५० देखि १ सय ७५ जनासम्मको एन्टिजेन परीक्षण गरिरहेका छौं ।’

कोलकाताबाट रक्सौलसम्म सातामा एक दिनबाहेक ६ दिन रेल आउने गर्छ । यसबाहेक मुम्बईबाट साताको एक दिन रक्सौलसम्म रेल आउने गरेको छ । स्वास्थ्य मन्त्रालयले दुईपटक खोप लगाएका तथा कोरोनाको लक्षण नदेखिएकाहरूको कोरोना परीक्षण गर्न नपर्ने र लक्षण देखिएकाहरूको मात्र परीक्षण गर्नुपर्ने निर्देशन दिएकाले उक्त निर्देशनको पनि पालना गरिएको उनले बताइन् ।

डेस्कमा फागुनयता हालसम्म भारतबाट नेपाल प्रवेश गर्नेहरूमध्ये एक जनामा पनि कोरोना पोजेटिभ नदेखिएको उनले बताइन् । डेस्कको तथ्यांकअनुसार, आव २०७७/०७८ मा कोरोनाको तेस्रो लहरको समयमा यो नाका हुँदै ५३ हजार ८ सय २३ जना नेपाल प्रवेश गरेका थिए, जसमा ४४ हजार ७ सय ९६ जना पुरुष, ९ हजार २७ जना महिला र ३ सय ४४ जना बालबालिका थिए । उनीहरूमध्ये २७ हजार ९ सय ६८ जनाको एन्टिजेन परीक्षण गरिएकोमा ५ सय ८९ जनामा कोरोना संक्रमण पुष्टि भएको थियो । वीरगन्जका ८५, पर्साका अन्य पालिकाका ७, अन्य जिल्लाका ७६ र ४२१ जना भारतीय नागरिक थिए । उनीहरूलाई भारत नै फर्काइएको थियो ।

प्रकाशित : वैशाख २९, २०७९ १०:१२
पूरा पढ्नुहोस्
प्रतिक्रिया
पठाउनुहोस्
×