रसुवामा धमाधम मतदानस्थल निर्माण- स्थानीय तह निर्वाचन २०७९ - कान्तिपुर समाचार

रसुवामा धमाधम मतदानस्थल निर्माण

बलराम घिमिरे

रसुवा — पर्सि शुक्रबार हुने स्थानीय तहको निर्वाचनका लागि रसुवामा धमाधम मतदानस्थल निर्माण भइरहेको छ । 'मतदाताहरुको सजिलोका लागि महिला पुरुष छुट्टाछुट्टै रहने लाइन निर्माण, जेष्ठ नागरिक, अशक्त तथा अपाङ्गता भएका व्यक्तिहरु छिटो मतदान गर्ने व्यवस्था मिलाइएका छौं,' उत्तरगया गाउँपालिका–५ वडा कार्यालय माझगाउँ 'ग' मतदान केन्द्रका मतदान अधिकृत रवीन्द्र ठकुरीले भने । 

जल तथा मौसम विज्ञान विभागले निर्वाचनको दिन वर्ष हुने पूर्वानुमान गरेकोले मतदान केन्द्र सुरक्षाको लागि पाल टांग्ने काम पनि भइरहेको छ । मतदान केन्द्रमा चार किल्ला तोक्ने, मदिरा निषेधित क्षेत्र, प्रचारप्रसार बन्द, हातहतियार निषेधित क्षेत्रको सूचना टाँस गर्ने काम पनि सम्पन्न भएको अधिकृत ठकुरीले बताए । निर्वाचनमा २ सय ९४ जना नेपाल प्रहरी, २१९ सशस्त्र प्रहरी र २८८ म्यादी गरी ८ सय १ जना सुरक्षाकर्मी परिचालन हुने प्रमुख जिल्ला अधिकारी नवराज जैसीले बताए । ३४ वटा मतदानस्थल र ५१ वटा मतदान केन्द्र रहेका छन् । जिल्लामा ३८ हजार ५ सय ४५ मतदाता रहेका छन् । जिल्लामा २ सय ५५ निर्वाचन कर्मचारी खटिएका छन् ।

नयाँ मतदाताहरुलाई परिचयपत्र वितरण गर्ने काम पनि भइरहेको मतदान अधिकृत ठकुरीले बताए । उनका अनुसार बुधबार मतदान केन्द्र पुगेपछि मतदान अधिकृतहरुसहित सर्वदलीय बैठकसमेत बसेको छ । बैठकमा मौन अवधिमा पालना गर्नुपर्ने नियम, आचारसंहिता, उम्मेदवारका प्रतिनिधि, अशक्त तथा अपाङ्गता भएका व्यक्तिले मतदान गर्न सहज बनाउनेलगायत विभिन्न विषयमा छलफल भएको मतदान अधिकृत ठकुरीले बताए ।



प्रकाशित : वैशाख २८, २०७९ १९:१४
प्रतिक्रिया
पठाउनुहोस्

यसरी बाँडिँदै छ मतदाता परिचयपत्र [फोटोफिचर]

तस्बिर : इलिट जोशी

काठमाडौँ — पर्सि शुक्रबार देशभरका ७५३ वटा स्थानीय तहमा नयाँ जनप्रतिनिधि चयनका लागि मतदान हुँदैछ । यसका लागि निर्वाचन आयोगले मतदाता परिचयपत्र वितरण सुरु गरेको छ । विभिन्न जिल्लामा रहेका मतदान केन्द्रबाट बुधबार मतदाता परिचयपत्र वितरणको काम भइरहेको छ । कर्मचारीहरूले बिहीबारसम्म परिचयपत्र वितरणको काम सम्पन्न गर्ने आयोगले जनाएको छ ।

३० वर्षपछि पहिलोपटक एकै चरणमा स्थानीय तहको निर्वाचन हुन लागेको हो । निर्वाचनका लागि निर्वाचन आयोगले देशभर १ लाख ९ हजार ८८ कर्मचारी र ६५ हजार ८ सय ६५ स्वयंसेवक परिचालन गरेको छ । आयोगका अनुसार १० हजार ७ सय ५६ मतदानस्थलमा २१ हजार ९ सय ५५ मतदान केन्द्र तोकिएका छन्।

१ करोड ७७ लाख ३३ हजार ७ सय २३ जनासँग मताधिकार रहेको छ। प्रमुख निर्वाचन आयुक्त दिनेश थपलियाका अनुसार नागरिकता लिएका र मतदाता नामावलीमा नाम भएका सबैलाई मतदान गर्ने व्यवस्था मिलाइने छ ।


प्रकाशित : वैशाख २८, २०७९ १९:१३
पूरा पढ्नुहोस्
प्रतिक्रिया
पठाउनुहोस्
x
×