जनमुक्ति पार्टीको घोषणापत्र : आवासविहीनका लागि आवासदेखि निःशुल्क एम्बुलेन्स सेवासम्म

आउँदो स्थानीय तहको निर्वाचनमा सिद्धार्थनगर नगरपालिकामा हुने निर्वाचनका लागि उक्त पार्टीले घोषणापत्र जारी गरेको हो । नगरपालिकाको प्रमुख, उपप्रमुखसहित आठवटा वडाध्यक्ष पदमा राष्ट्रिय जनमुक्ति पार्टीले उम्मेदवारी दिएको छ ।

घोषणपत्र सार्वजनिक गर्दै पार्टीका संघीय परिषद् सचिव मोजिव अलीले आफ्नो पार्टीबाट उम्मेदवारी दिएका कुनै पनि उम्मेदवार निर्वाचनमा निर्वाचित भएमा तलब/भत्ता नलिने र गरिब बालबालिकाको शिक्षामा लगानी गर्ने बताए । ‘राज्यको तर्फबाट जनप्रतिनिधिलाई उपलब्ध हुने अन्य सुविधाको हकमा पनि निर्वाचनपछि बस्ने पार्टीको पहिलो बैठकले टुंगो लगाउने छ‚’ अल‍ीले भने ।

पार्टीको ४० बुँदे घोषणापत्रमा आवासविहीन गरिबका लागि निःशुल्क मेयर आवास योजना, आत्मनिर्भर पर्यटन युवा स्वरोजगार, निःशुल्क शौचालय सफाइ, गरिबका लागि कपडा र फुड बैंक स्थापना, वृक्षारोपण हरियाली, शिक्षा, स्वास्थ्य, कृषि, पार्किङ, विभिन्न करमा छुटको व्यवस्था, खानेपानी, निःशुल्क एम्बुलेन्स सेवालगायत विषयलाई समेटिएको छ ।