महोत्तरीको सम्सीमा निर्वाचन तालिका परिवर्तन- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

महोत्तरीको सम्सीमा निर्वाचन तालिका परिवर्तन

सन्तोष सिंह

धनुषा — निर्वाचन आयोगले महोत्तरीको सम्सी गाउँपालिकामा निर्वाचन अधिकृत बदलेर नयाँ निर्वाचन कार्यतालिका सार्वजनिक गरेको छ । मुख्यमन्त्री तथा मन्त्रिपरिषद्को कार्यालयबाट सम्सी गाउँपालिकामा खटिएका निर्वाचन अधिकृत उपसचिव दिलीप प्रधानलाई फिर्ता पठाइएको छ ।

प्रधानको ठाउँमा निर्वाचन अधिकृत विनोदकुमार दाहाललाई खटाइएको छ । दाहालले निर्वाचनको नयाँ कार्यतालिका सार्वजनिक गरेका छन् ।

प्रधानले पूरा गरेको प्रक्रिया दाहालले फेरि दोहोर्‍याउन वैशाख १९ गते सोमबार दोस्रो पटक मनोनयन जाँच गर्ने, उजुरीउपर जाँचबुझ गरी निर्णय गर्ने सूचना प्रकाशित गरिएको छ । दाबी विरोधको छानबिन गरी अन्तिम नामावली निकालेर सोमबार नै उम्मेदवारी फिर्ता, उम्मेदवारको अन्तिम नमावली प्रकाशन र चुनाव चिह्न प्रदान गर्ने कार्यतालिका सार्वजनिक गरिएको निर्वाचन अधिकृत दाहालले बताए ।

यस अघिका निर्वाचन अधिकृत प्रधानले माओवादी केन्द्रका दुई वडाध्यक्ष र एक जना वडा सदस्यको उम्मेदवारी रद्दा गरेका थिए । निवर्तमान वडाध्यक्ष र सदस्यले गाउँपालिकाबाट लिएका जिन्सी सामान फिर्ता र बेरुजु रकम दाखिला नगरी फेरी वडाध्यक्षको उम्मेदवार भएको भन्दै निर्वाचन अधिकृतको कार्यालयमा उजुरी परेपछि वडाध्यक्ष र सदस्यको उम्मेदवारी रद्दा गरिएको थियो ।

निर्वाचन अधिकृतको कार्यालय वडा नं. २ मा माओवादी केन्द्रका उम्मेदवार शेष मषसुद आलम र माओवादी केन्द्रकै वडा नं. ६ का अध्यक्षका उम्मेदवार शेष उमैदको उम्मेदवारी रद्द गरेको थियो । वडा नं. ६ का उम्मेदवार शेष उमैदले गाउँपालिका कार्याललबाट बुझिलिएको मालसमानहरु खर्च भएर नजाने बुझबुझारथ नगरेको र वडा नं २ का उम्मेदवार आलमको नाउमा असुलउपर गर्नु पर्ने २ हजार ४५० रुपैयाँको विषयमा उजुरी परेको थियो । वडा सदस्यका उम्मेदवार मकसुदबाट ५ हजार रुपैयाँ असुलउपर गर्न महालेखा परीक्षकको प्रतिवेदनमा उल्लेख रहेको भन्दै परेको उजुरीमा छानबिन गरी उनीहरुको उम्मेदवारी रद्द गरिएको थियो ।

माओवादी केन्द्रका तीन जना उम्मेदवारको उम्मेदवारी रद्द भएपछि निर्वाचन अधिकृत कार्यालय अगाडि उनीहरुले प्रदर्शन गरेका थिए । उम्मेदवारी रद्दा भएकाहरुलाई उम्मेदवार बनाउन निर्वाचन आयोगले अधिकृत फेरेर फेरि निर्वाचनको तालिका सार्वजनिक गरेको नेकपा एमालेबाट मेयर पदका उम्मेदवार शेष फारुकले आरोप लगाएका छन् ।

प्रकाशित : वैशाख १८, २०७९ १६:४४
प्रतिक्रिया
पठाउनुहोस्

जनकपुरधाममा मेयर पदका दुईसहित १५ जनाको उम्मेदवारी फिर्ता

सन्तोष सिंह

धनुषा — जनकपुरधाम उपमहानगरको मेयर पदका २ जनासहित १५ जनाले उम्मेदवारी फिर्ता लिएका छन् ।

मेयर पदमा उम्मेदवारी दर्ता गराएका बैजनाथ प्रसाद साह, नन्दकुमार भगत र उपमेयर पदका उम्मेदवार विश्वनाथ साह सुडीले उम्मेदवारी फिर्ता लिएको प्रमुख निर्वाचन अधिकृत ब्रजेश प्याकुरेलले बताए ।

वडा अध्यक्षका ११ जना र वडा सदस्यका १ जना गरी १५ जनाले उम्मेदवारी फिर्ता लिएको प्याकुरेलले बताए । नकपुरधाममा १ हजार ५४ जनाको उम्मेदवारीमध्ये ४० जनाको रिट नपुगेर उम्मेदवारी रद्द भएको छ भने शुक्रबार १५ जनाले उम्मेदवारी फिर्ता लिएका छन् ।

वैशाख ३० मा हुने स्थानीय तह निर्वाचनको लागि उम्मेद्वारी दर्ता गराएका एक उपमेयर र एक वडाध्यक्षले उम्मेद्वारी फिर्ता लिएका छन् । लोकतान्त्रिक समाजवादी पार्टी (लोसपा) नेपालका तर्फबाट धनुषाधाम नगरपालिकामा उपमेयर पदका उम्मेद्वार मेनकाकुमारी सिंह र सोही नगरपालिका वडा नम्बर ५ का वडाध्यक्षका उम्मेदवार रामइश्वर यादवले उम्मेदवारी फिर्ता लिएका हुन् ।

उम्मेदवारी फिर्ता लिए लगत्तै लोसपा परित्याग गरी उपमेयर उम्मेदवार सिंह र वडाध्यक्ष पदका उम्मेदवार यादव जसपामा प्रवेश गरेका छन् । दुबै जनालाई जनता समाजवादी पार्टी नेपालका केन्द्रीय सदस्य दीपक कार्की र पूर्वमाननीय प्रमिला यादवले अबिर माला लगाएर जसपा प्रवेश गराएका हुन् । यस्तै, गणेशमान चारनाथ नगरपालिका वडा नं. ७ मा लोसपाबाट उम्मेदवारी दिएका दुई जना सदस्यले उम्मेदवारी फिर्ता लिएका छन् ।

प्रकाशित : वैशाख १६, २०७९ १९:३०
पूरा पढ्नुहोस्
प्रतिक्रिया
पठाउनुहोस्
×