अन्तिममा जसको टिकट खोसियो- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

अन्तिममा जसको टिकट खोसियो

टिकट नपाएपछि अर्कै पार्टी प्रवेश गरेर चुनाव लड्दै
मधेस ब्युरो

जनकपुर — धनुषाको मिथिला नगरपालिकाका निवर्तमान प्रमुख हरिनारायण महतो एमालेबाट यसपालि पनि चुनाव लड्ने सुरमा थिए । यसअघिका निर्वाचित प्रमुख भएकाले टिकटका लागि धेरै बढी मेहनत गर्नु नपर्ने उनको बुझाइ थियो । नभन्दै, उनले फेरि मिथिलाको नगर प्रमुखका लागि एमालेबाट टिकट पाए । तर, मनोनयनको अघिल्लो राति भने टिकट खोसियो । बागी उठेका उनले एमाले अध्यक्ष केपी ओलीसँगको भेटपछि शुक्रबार उम्मेदवारी फिर्ता लिए । महतोको टिकट खोसेर एमालेले व्यवसायी राजाराम महतोलाई दिएको छ । 

यस्तै, महोत्तरीको बल्वा नगरपालिकामा कांग्रेसबाट ममता महतोले उपप्रमुखको टिकट पाइन् । उनले चुनावी प्रचारप्रसार र घरदैलो समेत थालिसकेकी थिइन् । मनोनयनको तयारीमा जुटेकी ममताको टिकट भने अन्तिम समयमा खोसियो । उनको टिकट रामदुलारी ठाकुरलाई दिइयो । ममता पार्टीको निर्णयले स्तब्ध छिन् । ‘पार्टीमा गरेको योगदान उपल्लो तहका नेतृत्वका कारण गुम्यो । अघिल्लो निर्वाचनमा पनि अन्तिम समयमा मलाई टिकटबाट वञ्चित गरिएको थियो,’ उनले भनिन् ।

रौतहटको बृन्दावन नगरपालिका प्रमुखमा उम्मेदवार बन्न कांग्रेस मधेस प्रदेश समितिले वैशाख ९ गते बिहान प्रेमशंकर यादवलाई टिकट दियो । कांग्रेसको प्रदेश कार्यालय जनकपुरबाट टिकट लिएर उनी बृन्दावन पुगे । चुनावको तयारीमा जुटेका उनी वडाका उम्मेदवार छान्न व्यस्त भए । त्यहीबेला उनको टिकट खोसिएको खबर आयो । उनको टिकट निवर्तमान नगर प्रमुख रामस्नेही राय यादवलाई दिइएको थियो ।

टिकट पाएको भोलिपल्ट नै खोसुवामा परेका यादवले तत्कालै एमालेसित आफू कांग्रेस छाडेर आउने र नगर प्रमुखको टिकट दिन संवाद थाले । एमालेले पनि उक्त नगरपालिकामा यादव जतिको बलियो उम्मेदवार पाए हुन्छ भनेर टिकट दियो । उनले तत्कालै कांग्रेस छाडेको घोषणा गरेर टीका लगाउँदै एमाले प्रवेश गरे । लामो समय कांग्रेस राजनितिमा लागेका यादव अघिल्लो स्थानीय तहको निर्वाचनमा पनि नगर प्रमुखका बलिया दाबेदार दिए । त्यतिबेला रामस्नेहीले नै टिकट पाए र जिते । अहिले पनि उनैले पाएका छन् ।

पार्टीले आफुमाथि अन्याय गरेकाले त्यसको बदला चुनावबाट लिने यादवले बताए । ‘टिकट दिएर पनि खोस्नु भनेको अपमान गर्नु हो । पार्टीले ऐनमौकामा मूल्यांकन गर्न सकेन,’ उनले भने, ‘यही कारण कांग्रेस छाडे । अब वामपन्थी राजनीति गर्छु ।’ निवर्तमान नगर प्रमुख रामस्नेहीले पनि टिकट नपाउने देखिएपछि एमाले प्रवेशको तयारी गरेका थिए । यसको जानकारी कांग्रेस सांसद देवप्रसाद तिमल्सिनाले पार्टीको माथिल्लो तहमा पुर्‍याए । त्यसपछि शीर्ष नेताले प्रेमशंकरको टिकट खोसेर रामस्नेहीलाई दिन निर्देशन दियो ।

कांग्रेस मधेस प्रदेश सभापति कृष्ण यादवले केन्द्रीय नेताको निर्देशनअनुसार टिकटमा फेरबदल गरेको बताए । एउटै पार्टीका भए पनि यो नगरपालिकामा रामस्नेही र प्रेमशंकरबीच द्वन्द्व छ । रौतहटकै राजदेवी नगरपालिकाका निवर्तमान नगर प्रमुख शेख सकिलले एमालेबाट टिकट पाएर पनि अर्कालाई जिम्मा लगाएका छन् । कांग्रेसबाट नगर प्रमुख जितेका उनी टिकट नपाउने छाँट देखिएपछि एमाले प्रवेश गरेका थिए । तर एमालेले टिकट दिएर पनि माहोल सहज नदेखेपछि उनले एमाले नेतृ शर्मिका कोइरालालाई उम्मेदवारको जिम्मा दिएका हुन् ।

दुई महिनाअघि बाराको साना किसान कृषि सहकारी डुमरवानाको आठौं तहको आकर्षक जागिरबाट राजीनामा दिएर एमालेबाट जीतपुरसिमरा उपमहानगरको प्रमुख पदको लागि तयारीमा जुटेका नारायण क्षेत्री टिकट पाउनेमा ढुक्क थिए । मनोनयन दर्ता गर्ने वैशाख १२ मा उम्मेदवारीका लागि हौसिएका उनले सबै तयारी गरिसकेका थिए । पार्टी नेताको विश्वासमा झन्डै राजनीतिमा आएका उनले टिकट पाउने निर्णय भए पनि उनको हातमा भने आएन । क्षेत्रीलाई प्रमुख र निवर्तमान उपप्रमुख सरस्वती चौधरीलाई पुनः उपप्रमुखमा उम्मेदवार बनाउने निर्णय भएको भन्दै पार्टी कार्यालयबाट क्षेत्रीलाई मोबाइलमा बधाईसहित सन्देश पनि आयो । उनीहरूको टिकट पनि मधेस प्रदेश सचिव कृष्ण पौडेलको हातमा आएको थियो । तर उनले अन्तिम समयमा टिकट पाएनन् ।

उम्मेदवारी दर्ता गर्ने बेला भने चौधरीलाई प्रमुख र भोला अधिकारीलाई उपप्रमुखको उम्मेदवार बनाइयो । एमालेबाट ०५४ मा साविक साविक डुमरवाना गाविस अध्यक्ष निर्वाचित क्षेत्री टिकट नपाएपछि घरबाट निस्केका छैनन् । ‘पार्टीको पोलिटब्युरो सदस्यबाट बधाईसहित सन्देश आयो, जिल्ला अध्यक्ष विनोद साहलाई कलैया भेट्नुस्, त्यहाँ जाँदा पार्टी प्रदेश सचिव कृष्ण पौडेललाई भेट्नु भन्नु भो । त्यहाँ जाँदा भर्खरै अर्कैले टिकट लियो, निर्णय उल्टियो भन्ने जानकारी भयो,’ उनले भने । जीतपुरसिमरामा सत्ता गठबन्धनबाट प्रमुखमा माओवादीका राजन पौडेल र उपप्रमुखमा मेघा शाही उम्मेदवार छन् । यसैगरी कोल्हवी नगरपालिका उपप्रमुखमा कांग्रेसबाट टिकट पाएकी राधा चौधरीले टिकट नपाएर अर्कैले उम्मेदवारी दर्ता गराइन् ।

प्रकाशित : वैशाख १८, २०७९ ०९:१५
प्रतिक्रिया
पठाउनुहोस्

गठबन्धनमा आ-आफ्नै ताल

मधेस ब्युरो

जनकपुर — सत्तारूढ दलले स्थानीय तह निर्वाचनमा गठबन्धन गरेर अगाडि बढ्ने गृहकार्य गरिरहेकै बेला मधेस प्रदेशमा भने ती दलभित्रै आ–आफ्नै तरिकाले चुनावी मैदानमा होम्मिने सहमति गर्न थालेका छन् । पर्सामा सत्तारूढ दलको बैठकले स्थानीय निर्वाचनमा आफ्नै तरिकाले छुट्टाछुट्टै निर्वाचनमा प्रतिस्पर्धा गर्ने सहमति गरेको छ । धनुषामा भने कांग्रेसले जनकपुरधाम उपमहानगरपालिकामा आफ्ना उम्मेदवार घोषणा गरिसकेको छ । 

सप्तरीमा पनि गत साता सत्ता साझेदार दलबीच सहमति नहुँदा चुनाव आ–आफ्नै तरिकाले लड्ने भएको छ । केन्द्रीय नेतृत्वको चाहना हुँदा पनि स्थानीय तहमा दलहरू गठबन्धन गर्ने सोचमा देखिन्नन् । चुनावी आँकडा विश्लेषण गरेर बसेका दल र उम्मेदवारहरू आफू नै जित्ने दाबीसहित गठबन्धन नगर्ने पक्षमा उभिएका हुन् ।

सर्लाहीमा भने अनिर्वाचनका लागि पाँचदलीय गठबन्धनबीचको तालमेलमा प्रगति शून्य छ । गठबन्धनमा औपचारिक छलफलका लागि तोकिएको समय सर्दै आएको छ । आइतबारका लागि तोकिएको छलफल सोमबारका लागि सारिएको छ । आफ्नै पार्टीभित्र मिलाउनुपर्ने भन्दै गठबन्धनमा आबद्ध दलले समय सार्दै आएका हुन् । अनौपचारिक रूपमा भने सबैसँग कुरा भइरहेको दलका नेताहरूले बताएका छन् ।

चुनावी तालमेलका लागि सर्लाही कांग्रेस जिल्ला सभापति सुरेन्द्र सिंहको संयोजकत्वमा एक कमिटी बनाइएको कांग्रेसका जिल्ला सचिव नीरज कार्कीले बताए । कार्कीले पहिला आफ्नै दलभित्र छलफल गर्नुपर्दा केही ढिलो भएको जनाउँदै छलफल पनि जारी रहेको जानकारी दिए । गठबन्धनमा आबद्ध दलले पालिकाहरूमा प्रमुख पद नै ताकेको भन्दै कार्कीले गठबन्धनका लागि दलहरू गम्भीर नभएको बताए । उनले गठबन्धनको प्रगति अहिलेसम्म शून्य रहेको जनाउँदै सोमबार फेरि गठबन्धनको बैठक बस्ने बताए ।

‘गठबन्धनको वार्ता भइरहेको छ । कुरा मिलाउन गाह्रो छ,’ उनले भने, ‘सबैको माग धेरैभन्दा धेरै पालिकामा मेयरकै भो, सबैलाई मेयर नै चाहियो भने कसरी मिल्न सक्छ ?’ गठबन्धनमा आबद्ध कतिपय दलले ०७४ को मत परिणामअनुसार जाने कुरा राखिरहेका छन्, भने कसैले अहिलेको अवस्था फरक रहेको बताइरहेका छन् ।

नेकपा एकीकृत समाजवादीसहित अन्य दलले पनि गठबन्धनको बैठक त्यति सकारात्मक नरहेको बताएका छन् । नेकपा एकीकृत समाजवादीका नेता चूडामणि वाग्लेले गठबन्धनमा आबद्ध दलले केन्द्रले लाद्यो भने त्यसैलाई मान्ने, नभए प्रमुख पद नछोड्ने मनस्थिति रहेको पाइएको बताए ।

‘स्थानीय तहको चुनावमा मेयर र उपमेयर मात्र भाइटल पोस्ट हो, एकले मेयर पाए, अर्कोले उपमेयरमा चित्त बुझाउन सक्छन्, अन्य तीन दल त वडामै झर्नुपर्छ,’ उनले भने, ‘यसको व्यवस्थापन गर्न गाह्रो हुन्छ, केन्द्रले नै तोकेर पठाइदिए हुन्थ्यो भन्ने मनस्थिति दलहरूमा देखिन्छ ।’

प्रकाशित : वैशाख ५, २०७९ ११:०२
पूरा पढ्नुहोस्
प्रतिक्रिया
पठाउनुहोस्
×