मकवानपुर र रामेछापमा १२ उम्मेदवारविरुद्ध उजुरी- स्थानीय तह निर्वाचन २०७९ - कान्तिपुर समाचार

मकवानपुर र रामेछापमा १२ उम्मेदवारविरुद्ध उजुरी

उजुरी परेका उम्मेदवारबारे आयोगले बिहीबार अपराह्नसम्म अन्तिम निर्णय गर्ने
प्रताप विष्ट, टीकाप्रसाद भट्ट

हेटौंडा,रामेछाप — मकवानपुर र रामेछापका विभिन्न स्थानीय तहका उम्मेदवारविरुद्ध उजुरी परेको छ । निर्वाचन कार्यक्रम अनुसार दाबी विरोध दर्ता भएका विषयमा प्रमाण खोज्ने र छानबिन गरी बिहीबार अपराह्नसम्म निर्णय दिने निर्वाचन आयोगले जनाएको छ ।

वैशाख ३० गते हुने स्थानीय तहको निर्वाचनका लागि उम्मेदवारी दर्ता गरेका मकवानपुरका १० स्थानीय तहमध्ये ३ स्थानीय तहका उम्मेदवारविरुद्ध उजुरी परेको छ । हेटौंडा उपमहानगरपालिका, मनहरी गाउँपालिकामा र बकैया गाउँपालिकामा गरी ६ जना उम्मेदवारविरुद्ध उजुरी परेको निर्वाचन अधिकृतको कार्यालयले जानकारी दिएको छ ।

हेटौंडा–१९ मा नेपाल कम्युनिस्ट पार्टी एमालेका तर्फबाट वडा अध्यक्षमा उम्मेदवारी दर्ता गराएका नरनाथ सुवेदीमाथि करछलीको उजुरी परेको छ । यस्तै, मनहरी गाउँपालिकामा उपाध्यक्ष र ३ नम्बर वडा अध्यक्षका उम्मेदवारविरुद्ध उजुरी परेको छ । उजुरी पर्नेमा नेकपा एकीकृत समाजवादीबाट गाउँपालिकाको उपाध्यक्षमा उम्मेदवारी दर्ता गरेकी मनिला विष्ट छन् । उपाध्यक्षको उम्मेदवार विष्टलाई गाउँपालिकाभित्र बेरुजु र अख्यितियारको मुद्दा छानबिन गरी असुलउपर गर्नुपर्ने रकम बाँकी रहेको भन्दै उजुरी परेको हो । यस्तै, ३ नम्बर वडाका उम्मेदवार नेपाली कांग्रेसका अनन्तप्रसाद अर्यालमाथि विद्यालयको राजीनामा पत्र पेस गर्नुपर्ने मागसहित उजुरी परेको हो ।

त्यसैगरी, बकैया गाउँपालिकामा ३ जना उम्मेदवारविरुद्ध उजुरी परेको निर्वाचन अधिकृतको कार्यलयले जानकारी दिएको छ । उजुरी पर्नेमा नेपाली कांग्रेसका तर्फबाट उपाध्यक्षका उम्मेदवारी छावा अधिकारी र नेपाल कम्युनिस्ट पार्टी माओवादी केन्द्रका भक्तबहादुर खत्रीविरुद्ध उजुरी दर्ता भएको छ । ५ नम्बर वडाका नेपाल कम्युनिस्ट पार्टी माओवादी केन्द्रका उम्मेदवारमा उजुरी दर्ता भएको र १६ गतेसम्म छानबिन हुने निर्वाचन अधिकृतको कार्यालयले बताएको छ ।

यसैगरी, रामेछापको स्थानीय तहका विभिन्न पदमा उम्मेदवारी दिएका विभिन्न दलका ६ जना उम्मेदवारविरुद्ध दाबी विरोधको उजुरी परेको छ । उजुरी परेका उम्मेदवारमा १ जना नगरप्रमुख ४ जना वडा अध्यक्ष र १ जना वडा सदस्य पदका उम्मेदवार छन् ।

रामेछाप नगरपालिकाको नगर प्रमुख पदमा उम्मेदवारी दर्ता गराएका रत्न नेवारविरुद्ध माओवादी केन्द्रबाट उम्मेदवार भएका नरेशबाबु श्रेष्ठले दाबी विरोध गर्दै उनले नगरपालिकाभित्र ठेक्का गरेको उल्लेख छ । त्यसैगरी रामेछापकै ७ नम्बर वडामा नेपाली कांग्रेसबाट उम्मेदवार भएका समीर कार्कीविरुद्ध एमालेबाट उम्मेदावार भएका ध्रुव बस्नेतले दर्ता गरेको उजुरीमा ठेक्का लिएको धरौटी रकम बाँकी रहेको उल्लेख छ ।

खाँडादेवी गाउँपालिका वडा नं ३ मा माओवादी केन्द्रबाट वडाध्यक्षको उम्मेदवार बनेका ज्ञानकुमार लामा र कांग्रेसबाट वडा अध्यक्षको उम्मेदवार बनेका शंकरदास श्रेष्ठविरुद्ध उपभोक्ता समितिमा बसेर हिसाब फरफारक नगरेको भन्दै एमालेबाट वडा अध्यक्षका उम्मेदवार बनेका केशवकुमार प्रधानले उजुरी दर्ता गराएका छन् ।

रामेछाप नगरपालिका–१ मा एमालेबाट वडा सदस्यको उम्मेदवार बनेकी दिलकुमारी श्रेष्ठविरुद्ध महिला स्वास्थ्य स्वयंसेवकबाट राजीनामा नगरी उम्मेदवार बनेको भन्दै कांग्रेसकी उम्मेदवार सुकुमाया श्रेष्ठले दाबीविरोधको उजुरी दर्ता गराएकी हुन् । निर्वाचन कार्यक्रमअनुसार दाबी विरोध दर्ता भएका विषयमा प्रमाण खोज्ने र छानबिन गरी बिहीबार अपराह्नसम्म निर्णय दिनुपर्नेछ ।

प्रकाशित : वैशाख १५, २०७९ ०८:१९
प्रतिक्रिया
पठाउनुहोस्

प्रमुख पदमा महिला उम्मेदवार

अघिल्लो निर्वाचनमा पराजित भएकाहरुसमेत पुनः नेतृत्व सम्हाल्ने योजनामा
ओमप्रकाश ठाकुर, घनश्याम खड्का

सर्लाही,म्याग्दी — आसन्न स्थानीय तह निर्वाचनमा प्रमुख पदमा महिलाले पनि उम्मेदवारी दाबी गरेका छन् । सर्लाहीमा प्रमुख राजनीतिक दलसहित केही स्वतन्त्रबाट समेत उम्मेदवारी परेको छ । प्रमुख पदमा उम्मेदवारी दिने ६ महिलामा ५ जना भने प्रमुख दलकै छन् ।

नेकपा एमालेले तीन तथा माओवादी केन्द्र र नेकपा (एकीकृत समाजवादी) ले एक/एक स्थानीय तहमा महिला उम्मेदवार अघि सारेका हुन् । एक महिलाले भने स्वतन्त्रबाट उम्मेदवारी दिएकी छन् । एमालेले बरहथवा नगरपालिको प्रमुखमा कल्पना कटुवाल, चन्द्रनगर गाउँपालिकामा संगीतादेवी महतो नुनिया र ब्रह्मपुरी गाउँपालिकाको अध्यक्षमा रीता साहलाई उम्मेदवार बनाएको छ । चन्द्रनगरमा एमालेले अध्यक्ष र उपाध्यक्ष दुवैमा महिलालाई उम्मेदवार बनाएको छ । उसले दलित समुदायबाट राजन्ती पासवानलाई उपाध्यक्षको उम्मेदवार बनाएको हो ।

२०७४ को स्थानीय तह निर्वाचनमा एमालेबाट पालिका प्रमुखको उम्मेदवार बनेकी बरहथवाकी कटुवालले तेस्रो धेरै मत ल्याएकी थिइन् । ब्रह्मपुरीमा अध्यक्षमा उम्मेदवारी दिएकी साह २०७४ को निर्वाचनमा नेकपा माओवादी केन्द्रबाट उम्मेदवार बनेकी थिइन् । त्यसबेला उनले पाँचौं सर्वाधिक मत ल्याएकी थिइन् ।

नेकपा माओवादी केन्द्रले गोडैता नगरपालिकामा अनिता देवीलाई दोस्रो पटक नगरप्रमुखका लागि उम्मेदवार बनाएको छ । उनले गत निर्वाचनमा तेस्रो ठूलो मत ल्याइन् । यसपटक पनि उनको सामना लोसपाका निवर्तमान प्रमुख देवेन्द्र यादव र कांग्रेस नेता उपेन्द्र कुशवाहासँग हुनेछ । पहिलो पटक स्थानीय निर्वाचनमा सहभागी भएको नेकपा समाजवादीले भने लालबन्दीको प्रमुखमा रमा पौडेललाई उठाएको छ ।

वाग्मती नगरपालिकामा स्वतन्त्रबाट प्रहरी ‘इन्काउन्टर’ मा मारिएका नेत्रविक्रम चन्द समूहका तत्कालीन जिल्ला इन्चार्ज कुमार पौडेलकी श्रीमती धनकुमारी पौडेलले उम्मेदवारी दर्ता गराएकी छन् ।

म्याग्दीमा भने अघिल्लो स्थानीय निर्वाचनमा भन्दा यसपटक पालिका प्रमुख र उपप्रमुखमा महिलाको संख्या बढेको छ । अहिले पालिका प्रमुख र उपप्रमुखमा २५ महिलाले उम्मेदवारी दर्ता गरेका छन् । ०७४ को निर्वाचनमा धवलागिरी गाउँपालिका प्रमुखमा उम्मेदवारी दिने एमालेकी थमसरा पुन एक्ली थिइन्, उनी विजयी पनि भइन् । यसपटक जिल्लाका ६ पालिकामा ३ महिलाले प्रमुखमा मनोनयन दर्ता गरेका छन् । उपप्रमुखमा २३ महिलाको उम्मेदवारी परेको छ ।

धवलागिरीको अध्यक्षमा पुनले दोहोर्‍याएर उम्मेदवारी दिएकी छन् भने रघुगंगा गाउँपालिका प्रमुखमा माओवादी केन्द्रकी मीना विक र बेनी नगरप्रमुखमा राप्रपाकी मीना शर्माले मनोनयन दर्ता गरेका छन् । उपप्रमुखमा बेनी नगरपालिका र मंगला गाउँपालिकामा ६–६ जना, मालिकामा ५, रघुगंगामा २, अन्नपूर्णमा ३ र धवलागिरीमा १ जना महिलाको उम्मेदवारी परेको छ ।

‘संघीयतापछिको पहिलो निर्वाचन भएकाले ०७४ मा सबैमा अन्योल थियो । अहिले सबैले स्थानीय तहमा स्रोत र शक्ति देखेका छन्, त्यसैले स्थानीय तहमा पुरुषको मात्र होइन महिलाको पनि आकर्षण बढेको छ,’ महिला अधिकारको क्षेत्रमा सक्रिय दिलमाया बिटालुले भनिन्, ‘दलको संख्या बढेसँगै महिला सशक्तीकरणमा वृद्धि भएकाले प्रमुख पदमा पुग्ने महिला चाहना बलियो भएको हो ।’

जिल्ला निर्वाचन कार्यालयका अनुसार ०७४ को निर्वाचनमा उप्रमुख पदमा ९ महिलाको मात्र उम्मेदवारी परेको थियो । कांग्रेस–माओवादी र एमाले–राप्रपा गठबन्धनले प्रमुख र उपप्रमुखमा महिला–पुरुष बाँडेर उम्मेदवार बनाएका थिए । यसपटकको निर्वाचनमा प्रमुख/उपप्रमुख पदमा दलबीच गठबन्धन नभएको, एकीकृत समाजवादी र मंगोल नेसनल अर्गनाइजेसन पार्टी थपिएकाले पनि महिला उम्मेदवार संख्या बढेको हो ।

०७४ को निर्वाचनमा मुख्य पदमध्ये मालिका गाउँपालिका उपप्रमुखमा एमालेकी खरमाया बिटालु एक्ली दलित महिला थिइन् । यसपटक रघुगंगा गाउँपालिका प्रमुखमा माओवादी केन्द्रकी मीना विक मनोनयन गर्ने एक्ली दलित महिला हुन् । उपप्रमुखमध्ये मालिकामा माओवादी केन्द्रबाट गौरी सेन्चुरी दलित महिला उम्मेदवार बनेकी छन् ।

प्रकाशित : वैशाख १५, २०७९ ०८:१६
पूरा पढ्नुहोस्
प्रतिक्रिया
पठाउनुहोस्
×