बाँकेको जानकीमा श्रीमान-श्रीमतीको आलोपालो नेतृत्व- स्थानीय तह निर्वाचन २०७९ - कान्तिपुर समाचार

बाँकेको जानकीमा श्रीमान-श्रीमतीको आलोपालो नेतृत्व

ठाकुरसिंह थारु

नेपालगन्ज — बाँकेको साविक खजुराखुर्द गाविस‚ हालको जानकी गाउँपालिकाको नेतृत्व ०५४ देखि नेकपा (एमाले) बाँकेका नेता पदम धिताल र पत्नी भूमिसरा धितालले आलोपालो नेतृत्व गर्दै आएका छन् ।

धितालकी पत्नी भूमिसराले हाल जानकी गाउँपालिकाको उपप्रमुख तथा वैशाख ३० गते हुने स्थानीय तहको निर्वाचनमा फेरि उपप्रमुखमा उम्मेदवारी दिएकी छन् ।

२०७४ मा भएको स्थानीय तहको निर्वाचनमा पदम धितालले पालिका प्रमुखमा दाबी गरेका थिए । तर, एमालेले पालिकामा मधेसी समुदायको बाक्लो उपस्थिति रहेको भन्दै सोही समुदायकै नेता रामनिवास यादवलाई प्रमुखमा उठाएपछि धितालले श्रीमती भूमिसरालाई उपप्रमुख बनाउने सर्तमा दाबी छाडेका थिए । यसअघि उक्त पालिका प्रमुख र उपप्रमुखमा एमालेले जितेको थियो । २०५४ मा भएको खजुराखुर्द गाविसको अध्यक्षमा पदम धिताल विजयी भएका थिए ।

यसपटक धितालपत्नी भूमिसराले पालिका प्रमुखमा दाबी गरेकी थिइन् । तर, एमालेले फेरि पनि मधेसी समुदायबाटै उम्मेदवार बनाउने निर्णय गरेपछि उनले उपप्रमुखमा पुनः उम्मेदवारी दिएकी हुन् । पालिका प्रमुखमा व्यवसायी हिमान्सु यादवले प्रमुखमा उम्मेदवारी दिएका छन् । उनी पालिका प्रमुख रामनिवास यादवका छोरा हुन् ।

पालिका प्रमुख रामनिवासको मृत्युपछि भूमिसरा कार्यवाहक प्रमुखका रुपमा काम गर्दै आएका थिइन् ।

प्रकाशित : वैशाख १३, २०७९ १३:१३
प्रतिक्रिया
पठाउनुहोस्

नेपालगन्ज उपमहानगर प्रमुखमा गठबन्धनका विष्ट र एमालेका मिश्राको उम्मेदवारी

ठाकुरसिंह थारु

नेपालगन्ज — बाँकेको नेपालगन्ज उपमहानगरपालिकाको प्रमुखमा नेकपा (एमाले) का पशुपति दयाल मिश्रा र गठबन्धनका उम्मेदवार प्रशान्त विष्टले उम्मेदवारी दर्ता गराएका छन् । त्यस्तै, उपप्रमुखमा एमालेले शान्ति ढकाल र गठबन्धनका तर्फबाट कमरुद्दिन राईले उम्मेदवारी दिएका छन् ।

गठबन्धनको निर्णयअनुसार नेपालगन्जको प्रमुखमा कांग्रेस र उपप्रमुख जनता समाजवादीको भागमा परेको छ । प्रमुखका उम्मेदवार विष्ट कांग्रेसका नगर सभापति हुन् भने राई जसपा बाँकेका जिल्ला अध्यक्ष हुन् ।

त्यस्तै, एमालेका तर्फबाट प्रमुख र उपप्रमुखमा उम्मेदवारी दर्ता गर्ने मिश्रा र ढकाल केन्द्रीय सदस्य हुन् । मिश्रा यसअघिको स्थानीय तहको निर्वाचनमा नेपालगन्जको प्रमुखमा उम्मेदवार बनेका थिए ।


प्रकाशित : वैशाख १२, २०७९ १८:००
पूरा पढ्नुहोस्
प्रतिक्रिया
पठाउनुहोस्
x
×