सीके राउतको पार्टीद्वारा डेढ सय पालिकामा उम्मेदवारी- स्थानीय तह निर्वाचन २०७९ - कान्तिपुर समाचार

सीके राउतको पार्टीद्वारा डेढ सय पालिकामा उम्मेदवारी

सन्तोष सिंह

धनुषा — सीके राउत नेतृत्वको जनमत पार्टीले मुलुकभरका १ सय ५० भन्दा बढी पालिकामा उम्मेदवारी दिएको जनाएको छ । मधेस प्रदेशका ८ वटै जिल्लाका स्थानीय तहसँगै बाँके, बर्दिया, कञ्चनपुर, नवलपरासी, चितवन, उदयपुर, झापालगायतमा समेत उम्मेदवारी दिइएको पार्टीले जनाएको छ । 

‘१२ सयभन्दा बढी वडामा उम्मेदवारी परेको छ तर विवरण पूरै आइसकेको छैन,’ जनमत पार्टी सचिवालय प्रमुख राजेशकुमार मण्डलले भने ।

पार्टी अध्यक्ष राउतले झापादेखि बर्दियासम्म डेढ सय पालिकामा उम्मेदवारी दर्ता गराएको बताए । उनले गठबन्धन र अन्य दलले उम्मेदवारी दर्ताकै क्रममा निर्वाचन आचारसंहिता उल्लंघन गर्दा निर्वाचन आयोगका कर्मचारी मूकदर्शक बनेको आरोप लगाए । धनुषाको सबैला नगरपालिकामा प्रमुख पदमा उम्मेदवारी दर्ता गराएका बीपी साहले ग्रामीण क्षेत्रका मतदाताले आफ्नो पार्टीलाई पुरानो पार्टीको विकल्पका रूपमा लिएको दाबी गरे ।

‘हामीले उठाएको किसानको समस्या र स्थानीय तहमा जनप्रतिनिधिले गरेको भ्रष्टाचारविरुद्ध आन्दोलनले ग्रामीण क्षेत्रमा सकारात्मक छाप परेको छ,’ उनले भने, ‘मतदाताको झुकाव हामीतिर बढेपछि अन्य पार्टीले भ्रम फैलाउने चुनौती छ ।’

पुराना दलहरू डर, त्रास देखाएर मतदाता प्रभावित पार्न सक्रिय भएको आरोप पनि उनले लगाए । उनले निर्वाचन कार्यालयमाथि पनि टिप्पणी गर्दै भने, ‘हाम्रा उम्मेदवारको कागजातमा कैफियत देखाउने निर्वाचन अधिकृतले अन्यको मनोनयनपत्र अध्ययन नगरी दर्ता गरेको देखियो ।’

प्रकाशित : वैशाख १३, २०७९ ०६:४५
प्रतिक्रिया
पठाउनुहोस्

धनुषामा राति ११ बजेसम्म उम्मेदवारी दर्ता

सन्तोष सिंह

धनुषा — धनुषाको १८ वटै स्थानीय तहमा उम्मेदवारको मनोनयन दर्ता सोमबार रातिसम्मै जारी रहने भएको छ । निर्वाचन अधिकृतको कार्यालय परिसरमा प्रवेश गरेका उम्मेदवारहरुको मनोनयन दर्ता राति ११ बजेसम्म चल्ने धनुषाका प्रमुख जिल्ला अधिकारी सुरेन्द्र पौडेलले बताए ।

'कुनै पनि स्थानीय तहमा उम्मेदवारको मनोनयन दर्ता सकिएको छैन,' पौडेलले भने,‘मनोनयन दर्ताका लागि निर्धारण गरिएको समयभित्र निर्वाचन अधिकृतको कार्यालय परिसरमा प्रवेश गरेका उम्मेदवारहरुको उम्मेदवारी दर्ता गर्नै पर्छ ।’ धनुषामा पहिलो दिन आइतबार स्वतन्त्र र जनमत पार्टीका उम्मेदवारले मात्रै मनोनयन दर्ता गराएका थिए । अन्य सबै दल सोमबार उम्मेदवारी दर्ताका लागि निर्वाचन कार्यालय पुग्दा भीड बढेको हो ।

जनकपुरधाम उपमहानगरपालिकामा राति ८ बजेसम्म मेयरमा २६ र उपमेयरमा २५ जनाले उम्मेदवारी दर्ता भएको र उम्मेदवारी दर्ता गर्नेको अझै रहेको प्रमुख निर्वाचन अधिकृत ब्रजेश प्याकुरेलले बताए ।

जनकपुरधाम उपमहानगरपालिकामा गठबन्धनको तर्फबाट जनता समाजवादी पार्टी(जसपा) नेपालका लालकिशोर साह, लोकतान्त्रिक समाजवादी पार्टी (लोसपा)बाट मनोज चौधरी, नेकपा एमालेबाट शिव शंकर साह (हिरा), तामलोपाबाट विभा ठाकुर, नेपाली काग्रेस पार्टीका बागी मनोज साह, एक साताअघि एमाले प्रवेश गरेर टिकट नपाएपछि जानकीराम साह, निर्माण व्यवसायी बलराम महतो, बैजनाथ साह र रविकान्त लाल स्वतन्त्र र नेपाल जनता पार्टीबाट मुरली मनोहर मिश्र लगायतकाले मेयर पदमा उम्मेदवारी दर्ता गराएका छन् ।

यसअघि आइतबार मेयरमा जनमत पार्टीबाट अनितादेवी साह र नेकपा मालेबाट गीताकुमारी मण्डल, स्वतन्त्रबाट राहुलकुमार ओझा, श्याम किशोर मण्डल, लक्ष्मण साह, रामसेवक यादव, बिक्की यादव, अनिल पजियार र सुधिरकुमार महतोले उम्मेदवारी दर्ता गराएका थिए ।


प्रकाशित : वैशाख १२, २०७९ २१:०७
पूरा पढ्नुहोस्
प्रतिक्रिया
पठाउनुहोस्
×