धनुषामा राति ११ बजेसम्म उम्मेदवारी दर्ता- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

धनुषामा राति ११ बजेसम्म उम्मेदवारी दर्ता

सन्तोष सिंह

धनुषा — धनुषाको १८ वटै स्थानीय तहमा उम्मेदवारको मनोनयन दर्ता सोमबार रातिसम्मै जारी रहने भएको छ । निर्वाचन अधिकृतको कार्यालय परिसरमा प्रवेश गरेका उम्मेदवारहरुको मनोनयन दर्ता राति ११ बजेसम्म चल्ने धनुषाका प्रमुख जिल्ला अधिकारी सुरेन्द्र पौडेलले बताए ।

'कुनै पनि स्थानीय तहमा उम्मेदवारको मनोनयन दर्ता सकिएको छैन,' पौडेलले भने,‘मनोनयन दर्ताका लागि निर्धारण गरिएको समयभित्र निर्वाचन अधिकृतको कार्यालय परिसरमा प्रवेश गरेका उम्मेदवारहरुको उम्मेदवारी दर्ता गर्नै पर्छ ।’ धनुषामा पहिलो दिन आइतबार स्वतन्त्र र जनमत पार्टीका उम्मेदवारले मात्रै मनोनयन दर्ता गराएका थिए । अन्य सबै दल सोमबार उम्मेदवारी दर्ताका लागि निर्वाचन कार्यालय पुग्दा भीड बढेको हो ।

जनकपुरधाम उपमहानगरपालिकामा राति ८ बजेसम्म मेयरमा २६ र उपमेयरमा २५ जनाले उम्मेदवारी दर्ता भएको र उम्मेदवारी दर्ता गर्नेको अझै रहेको प्रमुख निर्वाचन अधिकृत ब्रजेश प्याकुरेलले बताए ।

जनकपुरधाम उपमहानगरपालिकामा गठबन्धनको तर्फबाट जनता समाजवादी पार्टी(जसपा) नेपालका लालकिशोर साह, लोकतान्त्रिक समाजवादी पार्टी (लोसपा)बाट मनोज चौधरी, नेकपा एमालेबाट शिव शंकर साह (हिरा), तामलोपाबाट विभा ठाकुर, नेपाली काग्रेस पार्टीका बागी मनोज साह, एक साताअघि एमाले प्रवेश गरेर टिकट नपाएपछि जानकीराम साह, निर्माण व्यवसायी बलराम महतो, बैजनाथ साह र रविकान्त लाल स्वतन्त्र र नेपाल जनता पार्टीबाट मुरली मनोहर मिश्र लगायतकाले मेयर पदमा उम्मेदवारी दर्ता गराएका छन् ।

यसअघि आइतबार मेयरमा जनमत पार्टीबाट अनितादेवी साह र नेकपा मालेबाट गीताकुमारी मण्डल, स्वतन्त्रबाट राहुलकुमार ओझा, श्याम किशोर मण्डल, लक्ष्मण साह, रामसेवक यादव, बिक्की यादव, अनिल पजियार र सुधिरकुमार महतोले उम्मेदवारी दर्ता गराएका थिए ।


प्रकाशित : वैशाख १२, २०७९ २१:०७
प्रतिक्रिया
पठाउनुहोस्

जनकपुरधाममा गठबन्धनबाट लालकिशोर साहको मनोनयन दर्ता

सन्तोष सिंह

धनुषा — जनकपुरधाम उपमहानगरपालिकाको मेयरमा सत्तारुढ गठबन्धनको तर्फबाट जनता समाजवादी पार्टी (जसपा) नेपालका लालकिशोर साहले उम्मेदवारी दर्ता गराएका छन् । 

उम्मेदवारी दर्ता गराउन जनकपुरधाम उपमहनागरको परिसरमा पुगेका निवर्तमान मेयरसमेत रहेका साहले अधुरो काम पुरा गर्न र पार्टीले तोकेको जिम्मेवारीअनुसार दोश्रो कार्यकालका लागि उम्मेदवारी दर्ता गराएको बताए ।

जनकपुरधाम उपमहानगरपालिकाको मेयरमा लोकतान्त्रिक समाजवादी पार्टी (लोसपा) बाट मेयर पदमा मनोज चौधरी, नेकपा एमालेबाट शिवसंकर साहले उम्मेदवारी दर्ता गराएका छन् ।

तामलोपाबाट विभा ठाकुरले मेयर पदमा उम्मेदवारी दर्ता गराएकी छिन् । मेयर पदमा नेपाली काग्रेस पार्टी परित्याग गरेका मनोज साह, एक साताअघि एमाले प्रवेश गरेका थिए । त्यस्तै, जानकीराम साह, निर्माण व्यवसायी बलराम महतो र वैजनाथ साहले स्वतन्त्र उम्मेदवारी दर्ता गराएका छन् ।

नेपाल जनता पार्टीबाट मुरली मनोहर मिश्रले पनि जनकपुरधामको मेयर पदमा उम्मेदवारी दर्ता गराएका छन् । उम्मेदवारी दर्ताको कार्यक्रम जारी रहेको छ ।

प्रकाशित : वैशाख १२, २०७९ १६:५०
पूरा पढ्नुहोस्
प्रतिक्रिया
पठाउनुहोस्
×