एमालेले दोलखाका सबै पालिकामा गरायो उम्मेदवारी दर्ता- स्थानीय तह निर्वाचन २०७९ - कान्तिपुर समाचार

एमालेले दोलखाका सबै पालिकामा गरायो उम्मेदवारी दर्ता

केदार सिवाकोटी

दोलखा — नेकपा एमाले दोलखाले जिल्लाका सबै पालिकामा वैशाख ३० गते हुने स्थानीय तहको चुनावका लागि मनोनयन दर्ता गराएको छ । भीमेश्वर नगरपालिकामा एमालेबाट हरिवंश चौलागाईं प्रमुख र कमला बस्नेतले उपप्रमुखमा मनोनयन दर्ता गराएका छन् । एमाले चरिकोट सातदोबाटोबाट बाजागाजासहित र्‍याली निकालेर मनोनयन दर्तामा गएको थियो । 

जिरीमा एमालेका मित्र जिरेल प्रमुख र कृष्णमाया बुढाथोकीले मनोनयन दर्ता गराएका छन् । बैत्यश्वर गाउँपालिकामा प्रमुखमा माधवप्रसाद घिमिरे र उपप्रमुखमा नविना लामाले उम्मेदवारी दर्ता गराएका छन् ।

गौरीशंकरमा जंग गुरुङ र मुना शिवाकोटी, विगूमा अच्युतम कटुवाल र देविका थामी, कालिञ्चोकमा गणेश शिवाकोटी र कविता थामी तामाकोसीमा अभिषेक सुवेदी र अम्बिका पोखरेलले उमेदवारी मनोनयन दर्ता गराएका छन् ।

यस्तै मेलुङ गाउँपालिकामा एमालेका हिराकुमार थोकर र गायत्री आर्चायले प्रमुख र उपप्रमुखमा उमेदवारी दर्ता गराएका छन् । सत्ता गठबन्धनका दलहरूले भने सोमबार मात्र मनोनय दर्ता गर्ने बताएका छन् ।

गठबन्धनमा नेपाली कांग्रेसले ४ माओवादीले ३ र नेकपा एकीकृत समाजवादीले २ वटा स्थानीय तहको प्रमुखमा उम्मेदवारी दिने भएका छन् ।

प्रकाशित : वैशाख ११, २०७९ १६:२५
प्रतिक्रिया
पठाउनुहोस्

पानीको संकटसँगै हट्यो विभेद

केदार सिवाकोटी

दोलखा — बिहान ४ बजे नै उठेर एक घण्टा हिँडेर घट्टे खोलामा पुगेर पानी भरेर ल्याउनुपर्ने बाध्यतामा थिइन्, शान्ता नेपाली । शैलुङ गाउँपालिका–५ खुम्चाङमा घट्टे खोलाको सिममा कुवा बनाएर पानी भर्नुपर्थ्यो ।

खोलाको सिम, त्यसमाथि बर्खामा धमिलो, हिउँदमा सुक्ने समस्या । पानीकै निहुँमा छिमेकीसँग झगडा र बोलचालसमेत बन्द हुन्थ्यो । गाउँमा केही ढुंगे धारा र एक–दुई अन्य धारा पनि थिए तर त्यहाँ शान्तालाई दलित भनेर भेदभाव गरिन्थ्यो । अहिले अवस्था फेरिएको छ । उनको घरमै धारा जडान भएको छ । घरमा धारा जडान भएपछि छिमेकीसँग पानीको निहुँमा झगडा गर्नुपर्ने बाध्यता हटेको छ । ‘पानीकै निहुँमा दैनिक खोलाको सिममा झगडा हुन्थ्यो,’ उनले भनिन्, ‘माथिल्लो टोलमा भएका धारामा पानी भर्न गए दलित भनेर भेदभाव गर्थे ।’

चन्द्रबहादुर नेपाली पनि वर्षौंदेखि खानेपानीको समस्या झेल्दै आएका थिए । बस्तुभाउका लागि समेत घण्टौं पानी लिन जानुपर्ने बाध्यता रहेको उनी सुनाउँछन् । ‘भएका ढुंगेधारामा दलितले पानी भर्न पाउँदैनथ्यौं,’ उनले भने, ‘कहिलेकाहीं पानी भर्न पुग्यौं भने सबैले दलितले धारा छोयो भनेर भन्थे ।’ वर्षौंदेखि पानीकै निहुँमा दलित भएकै कारण भेदभावको सिकार भएको उनले गुनासो गरे । ‘अझै पनि भेदभाव बाँकी छ,’ उनले भने, ‘तर अब पानीकै निहुँमा भेदभावको सिकार हुन भने पर्दैन ।’

‘वाटरएड’ को आर्थिक सहयोगमा सामुदायिक विकास मञ्चले गाउँमा धारा बनाइदिएपछि दलित बस्तीमा खानेपानीको समस्या हटेको छ । काटाकुटीको सबलचोक र खुम्चाङका ७ दलित घरसहित गाउँभरि ६१ वटा धारा बनेका छन् । दुई वटा सामुदायिक धारा पनि छन् । अहिले सबैभन्दा खुसी दलित बस्तीमा छाएको छ ।

वर्षौंदेखि कथित उपल्लो जातिको भेदभावबाट पानीकै निहुँमा हुने भेदभाव टरेको चन्द्रले बताए । पानीको वर्षौंदेखिको संकटसमेत टरेको छ । दाताको ३८ लाख ३० हजार, गाउँपालिकाको ६ लाख ४५ हजार र स्थानीयको ८ लाख ८७ हजार रुपैयाँ लगानीमा धारा बनाइएको सामुदायिक विकास मञ्चका कार्यकारी निर्देशक प्रेमप्रसाद अधिकारीले बताए ।

प्रकाशित : चैत्र १६, २०७८ १०:३०
पूरा पढ्नुहोस्
प्रतिक्रिया
पठाउनुहोस्
×