संखुवासभाका ७ पालिकामा गठबन्धन, ३ मा मित्रवत प्रतिस्पर्धा गर्ने - स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

संखुवासभाका ७ पालिकामा गठबन्धन, ३ मा मित्रवत प्रतिस्पर्धा गर्ने 

दीपेन्द्र शाक्य

संखुवासभा — आगामी वैशाख ३० मा हुने स्थानीय तह निर्वाचनका लागि संखुवासभाका १० स्थानीय तहमध्ये ७ तहमा ५ दलीय गठबन्धनले संयुक्त उम्मेदवारी दर्ता गर्ने भएको छ ।

शनिबार खाँदबारीमा सम्पन्न बैठकले १० मध्ये ७ पालिकामा गठबन्धन गर्ने र ३ पालिकामा मित्रवत प्रतिस्पर्धा गर्ने निर्णय गरेको कांग्रेस सभापति दीपक खड्काले बताए । उनका अनुसार कांग्रेसले ४ वटा पालिकामा प्रमुख, नेकपा माओवादी केन्द्र र नेकपा एकीकृत समाजवादीको भागमा एउटा-एउटा प्रमुख परेको छ ।

त्यस्तै कांग्रेसले ३ उपप्रमुख, माओवादी केन्द्रले २ र नेकपा समाजवादीले २ वटा उपप्रमुख पाएका छन् । कांग्रेसले सभापोखरी गाउापालिका, खाँदबारी,पाँचखपन, र चैनपुर नगरपालिकाको प्रमुख पाएको छ । उसले भोटखोला गाउँपालिका, मादी र धर्मदेवी नगरपालिकामा उपप्रमुखमा चित्त बुझाएको छ । नेकपा एकीकृत समाजवादीले भोटखोला गाउँपालिका प्रमुख, सभापोखरी गाउँपालिका, पाँचखपन नगरपालिकामा उपप्रमुख पाएको छ । माओवादी केन्द्रले मादी नगरपालिकामा प्रमुख र खाँदबारी र चैनपुर नगरपालिकामा उपप्रमुख पाएको छ ।

चिचिला गाउँपालिका, मकालु गाउँपालिका र सिलिचो गाउँपालिकामा मित्रवत प्रतिस्पर्धा गरिने गठबन्धनले जनाएको छ । यी ३ पालिकामा गठबन्धनबाहेकका दलसँग मिलेर चुनाव नलड्ने पनि सहमति भएको छ । संखुवासभामा ७६ वटा वडा छन् । तीमध्ये गठबन्धनमा ६० वटा वडा परेका छन् । ४६ वटा कांग्रेसलाई, ६ वटा मा माओवादी केन्द्र, ५ वटा एकीकृत समाजवादी र ३ वटा जनता समाजवादीको भागमा परेको छ ।

दसवटै पालिकामा हरेक दलबाट २ जना निर्वाचन परिचालन समिति र सवै वडामा गठबन्धनको दलबाट २ जना सदस्य राखेर वडा परिचालन तथा प्रचारप्रसार समिति गठन गर्ने निर्णय पनि गरिएको छ । विज्ञप्तिमा कुन दललाई कुन–कुन वडा भन्ने उल्लेख गरिएको छैन ।

प्रकाशित : वैशाख १०, २०७९ १८:२५
प्रतिक्रिया
पठाउनुहोस्

बलात्कारविरुद्ध वरुण विद्यार्थी अभियान

दीपेन्द्र शाक्य

संखुवासभा — संखुवासभा सदरमुकाम खाँदबारीमा रहेको वरुण क्याम्पसका विद्यार्थीले बलात्कारविरुद्ध जुलुस निकालेका छन् । बुधबार क्याम्पसबाट निकालिएको जुलुसमा करिब ३ सय विद्यार्थी सहभागी थिए ।

दिनदिनै बलात्कारका घटना बढिरहेको भन्दै त्यसको न्यूनीकरणका लागि वरुण क्याम्पसका विद्यार्थीले बलात्कारविरुद्धको अभियान चलाएका हुन् । नेपाल विद्यार्थी संघ वरुण क्याम्पसको अगुवाइमा जुलुस निकालिएको जुलुसमा विद्यार्थीहरूले बलात्कारीलाई फाँसी दे, बलात्कार र यौन हिंसा रोकौँ लगायत नारा लगाएका थिए ।

बलात्कार र महिला हिंसाबाट पीडितले न्याय नपाएको भन्दै विद्यार्थीहरू अभियानमा उत्रिएका हुन् । संघका सभापति चिरञ्जीवी श्रेष्ठका अनुसार विद्यार्थीले जुलुसपछि १५ मिनेट प्ले कार्डसहित मौन प्रर्दशन गरेका थिए ।

प्रकाशित : चैत्र २३, २०७८ ०९:४६
पूरा पढ्नुहोस्
प्रतिक्रिया
पठाउनुहोस्
×