जनकपुरको मेयर पद जसपालाई दिएपछि कांग्रेसमा असन्तुष्टि- स्थानीय तह निर्वाचन २०७९ - कान्तिपुर समाचार

जनकपुरको मेयर पद जसपालाई दिएपछि कांग्रेसमा असन्तुष्टि

निर्णय नसच्याए सामूहिक राजीनामा दिने
श्यामसुन्दर शशि

जनकपुर — जनकपुरधाम उपमहानगरपालिकाको मेयर पद जनता समाजवादी पार्टीको भागमा परेपछि नेपाली कांग्रेसभित्र असन्तोष चुलिएको छ । बुधबार कांग्रेस समर्थित युवाहरूले सत्तागठबन्धन दलका शीर्ष नेताहरूको पुत्ला दहन गरेका थिए भने कांग्रेस नगर समितिले प्रेस विज्ञप्ति प्रकाशित गरी निर्णय सच्याउन अपिल गरेको थियो । बिहीबार कांग्रेस नगर समितिका सभापति तथा मेयरका प्रत्यासी मनोज साहले निर्णय नसच्याए सामूहिक राजीनामा दिने चेतावनी दिएका छन् ।

बुधबार सत्तागठबन्धन दलका शीर्ष नेताहरूको बैठकले ६ महानगरपालिका र ११ उपमहानगरपालिकाका लागि मेयर र उपमेयरको पद बाँडफाँट गरेको थियो । बाँडफाँटको क्रममा जनकपुरधाम उपमहानगरपालिका जसपाको भागमा परेको हो ।

नगर सभापति साहले आफूसहित नगर समितिका २५ वटै वडा सभापति, पार्टीका समर्थक, शुभेच्छुकहरू गठबन्धनको विरोधमा रहेको बताए । कान्तिपुरसँगको भेटमा उनले भने‚ ‘जनकपुरधाम उपमहानगरपालिकाका मेयरले पाँच वर्षसम्म गरेको पापको भारी हामी उठाउन सक्दैनौं । कांग्रेस केन्द्रीय समितिले निर्णय सच्याएन भने २५ वटै वडामा स्वतन्त्र उम्मेदवारी दिन्छौं ।’

काठमाडौंमा पद बाँडफाँटका लागि गठबन्धन दलका शीर्ष नेताहरूको निर्णयक बैठक बसिरहँदा जनकपुरमा कांग्रेस नगर समितिको पनि बैठक बसिरहेको थियो । बैठक चल्दै गर्दा पद बाँडफाँटबारे विज्ञप्ति सार्वजनिक भयो । लगत्तै जनकपुर कांग्रेस नगर समितिका सचिव लालबाबु मिश्रले प्रेस विज्ञप्ति प्रकाशित गरी निर्णयको भर्त्सना गरेका थिए ।

विज्ञप्तिमा भनिएको छ‚ ‘पाँच दलीय गठबन्धनले जनता समाजवादी पार्टी नेपालको भागमा जनकपुरधाम उपमहानगरपालिका परेको समाचार सुनेर २५ वटै वडाका कांग्रेस सभापतिहरू, नगर सदस्यहरू, नगर पदाधिकारीहरू र बैठकमा सहभागी भएका सम्पूर्ण नेतागण तथा कार्यकर्ताहरू आक्रोशित बन्नुभयो । केन्द्रीय गठबन्धनको निर्णयको घोर भर्त्सना गर्दै आफूहरूले नमान्ने बैठकको आवाज प्रस्ट रुपमा मुखरित भयो ।’

२०७४ सालको स्थानीय तह निर्वाचनमा तत्कालीन राजपाका प्रत्यासी लालकिशोर साहले २१ हजार ९ सय ३ मत ल्याई विजयी भएका थिए भने कांग्रेस प्रत्यासी मनोज साह ११ हजार २ सय मत तथा त्यतिबेला उपेन्द्र यादवले नेतृत्व गरेको संघीय समाजवादी फोरमका उम्मेदवारले ३ हजार ३ सय मत प्राप्त गरेका थिए ।

प्राप्त मतभारको आधारमा पदको बाँडफाँट गर्नुको सट्टा गठबन्धन दलहरूले व्यक्ति विशेषको आधारमा पद बाँडफाँट गरेको आरोप मनोज साहको छ । ‘अहिले लालकिशोर साहजी उपेन्द्र यादव नेतृत्वको जसपामा हुनुहुन्छ । त्यतिबेलाको फोरम र आजको जसपा एउटै हो । मतभारको आधारमा जनकपुर उपमहानगरपालिकामा कांग्रेसले मेयर पाउनुपर्ने हो‚’ साहको तर्क छ ।

चुनावको पूर्वसन्ध्यामा दलबदल
जनकपुरधाम उपमहानगरपालिका ७ का वडाध्यक्ष जानकीराम साह र सेवानिवृत्त डिभिजनल ईन्जिनियर तथा मैथिल ब्राह्मण समाजका अध्यक्ष भगवान झा लोकतान्त्रिक समाजवादी पार्टी परित्याग गरी मंगलबार अध्यक्ष केपी शर्मा ओलीको हातबाट टिका ग्रहण गरेर एमालेमा प्रवेश गरे । बुधबार बिहान जनकपुरधाम-१ का वडाध्यक्ष शत्रुघ्न साह लोसपा परित्याग गरी जनता समाजवादी पार्टी प्रवेश गरेका थिए ।

दुई दिनभित्रका यी तीन प्रतिनिधि घटनामात्र हुन् । यसअघि जनकपुरधाम-२ मा स्वतन्त्ररुपमा वडाध्यक्ष जितेका शिवु साह एमालेमा प्रवेश गरिसकेका छन् भने समाजवादी पार्टीकी नेतृ तथा हंसपुर नगरपालिकाकी उपमेयर लोसपा परित्याग गरी जसपा प्रवेश गरिसकेकी छन् । उम्मेदवारीअघि अन्य केही नेता कार्यकर्ता दलबदल गर्ने सम्भावना छ ।

प्रकाशित : वैशाख ८, २०७९ १७:०३
प्रतिक्रिया
पठाउनुहोस्

आरोपित छुटेर विदेश, घाइतेको मृत्यु

श्यामसुन्दर शशि

जनकपुर — धनुषाको धनौजी गाउँपालिका–५ बहुअर्वाका ३७ वर्षीय सरोजकुमार मण्डलको शव बोकेको बाहन बुधबार बिहान ९ बजेतिर गाउँ पुग्यो । शव बाहन गाउँ पुग्दा मृतकका परिवार र स्थानीय शोकाकुल देखिन्थे ।


गत भदौ २६ मा गाउँमै आयोजित गणेश पूजाको मेलामा स्थानीय मनिषकुमार मण्डल र राजीवकुमार मण्डलसहितका युवाले गरेको तरबार प्रहारबाट घाइते भएका सरोजको सोमबार काठमाडौंस्थित ट्रमा सेन्टरमा मृत्यु भएको हो । मृतकको शव पोस्टमार्टमपछि बुधबार अन्त्येष्टिका लागि गाउँ ल्याइएको थियो ।

भदौ २६ को बिहान बहुअर्वा चोकस्थित गणेश मेलास्थलमा भएको झगडामा मनिष र राजिवले धारिलो हतियार प्रहार गरी सरोजसहित अमित मण्डल र बजरंग राउतलाई समेत घाइते बनाएको भन्दै रामनन्दनले प्रहरीमा उजुरी दिएका थिए । रामनन्दनका अनुसार अमित र बजरंगको उपचार स्थानीय अस्पतालमै भए पनि पेटमा गहिरो चोट लागेका सरोजलाई भने थप उपचारका लागि काठमाडौं लगिएको थियो । दोस्रो पटकको शल्यक्रियाको क्रममा उनको मृत्यु भएको हो । घटनाकै दिन प्रहरीले आरोपित मनिष र राजिवलाई भने पक्राउ गरेको थियो । तर, सरोजको उपचारकै अवस्थामा अदालतले उनीहरूलाई थुनामुक्त गरेको थियो । अहिले सरोजको मृत्यु भएपछि घटनाले नयाँ मोड लिएको छ । ज्यान मार्ने उद्योगमा उजुरी गरे पनि अदालतबाट न्याय नपाएको मृतकका बुबा रामनन्दनले गुनासो गरे । ‘न अदालतबाट न्याय पायौं, न भगवानले न्याय दियो,’ उनले भने ।

सरोज उपचाररत रहँदा गत पुस १९ मा जिल्ला अदालत धनुषाका न्यायाधीश पर्शुराम भट्टराईको एकल इजलासले विपक्षीलाई सामान्य खर्च तिर्न लगाई थुनामुक्त गर्ने आदेश दिएको थियो । पीडित पक्षले दायर गरेको ज्यान मार्ने उद्योगसम्बन्धी मुद्दालाई कुटपिट मात्र भन्दै दुवै आरोपितलाई थुनामुक्त गर्ने फैसला अदालतले सुनाएको थियो । उपचार खर्चबापत् सरोजलाई ४ लाख ९२ हजार २ सय ५९, अर्का घाइते अमितलाई ६९ हजार ३ सय र बजरंगलाई ३ हजार १ सय ३० रुपैयाँ उपलब्ध गराउन विपक्षीका नाममा आदेश भएको थियो । थुनामुक्त हुनासाथ मुख्य आरोपित मनिष विदेश गएका थिए ।

पीडिततर्फका कानुन व्यवसायी अधिवक्ता रमेशकुमार पाण्डेले जिल्ला अदालतको फैसलालाई ‘अचम्म’ भनेका छन् । आफूले दुवै पक्षका सबूत–प्रमाण हेर्न नभ्याउँदै अचानक फैसला आएको उनले प्रतिक्रिया दिए । ‘बकपत्र भएको चौथो दिन मुद्दा पेसी चढ्छ अनि अर्को दिन फैसला हुन्छ । मैले आफ्नो ३७ वर्षे कार्यकालमा यस्तो देखेको थिइनँ,’ उनले भने ।

पीडिततर्फका अर्का कानुन व्यवसायी अधिवक्ता बलराम सुवेदी पीडितको मृत्यु भइसकेको अवस्थामा पूरक वा थप अभियोगमार्फत यो मुद्दा जिल्ला अदालतमा पुनः चल्न सक्ने बताउँछन् । ‘पीडित पक्षले पुनः निवेदन दिँदा जिल्ला अदालतमा ज्यान मुद्दा चल्छ,’ उनले भने । जिल्ला सरकारी वकिलको कार्यालयका धर्मअवतार कोइरालाले जिल्ला प्रहरी कार्यालयलाई ज्यानसम्बन्धी मुद्दाको अनुसन्धान गर्न अनुमति दिइसकिएको बताए । ‘पीडितको मृत्यु भएको सूचना प्राप्त हुनासाथ थप अनुसन्धान गर्न प्रहरीलाई आग्रह गरिएको छ,’ उनले भने ।

प्रकाशित : वैशाख २, २०७९ १०:५१
पूरा पढ्नुहोस्
प्रतिक्रिया
पठाउनुहोस्
×